گېزىتىمىز، ئۈرۈمچى، 5-ئاينىڭ 22-كۈنى خەۋىرى ئانار بۇلۇت\شىنجاڭ گېزىتى مۇخبىرى رېن جياڭ خەۋەر قىلىدۇ: «بۇنىڭدىن كېيىن، جۇڭگو شىنجاڭ ۋە ئوتتۇرا ئاسىيادىكى بەش دۆلەت ئارىسىدىكى مەدەنىيەت-ساياھەت جەھەتتىكى ئالماشتۇرۇش تېخىمۇ قويۇقلىشىدۇ، شىنجاڭدىن ئوتتۇرا ئاسىيادىكى ھەرقايسى دۆلەتلەرگە ساياھەتكە بېرىش تېخىمۇ قولايلىشىدۇ، راۋانلىشىدۇ» دېدى 5-ئاينىڭ 22-كۈنى شىنجاڭ جۇڭگو خەلقئارا ساياھەت كوپىراتىپى چەكلىك مەسئۇلىيەت شىركىتىنىڭ باش دىرېكتورى جوۋ دى.
بۇ چاغدا، ئۇ ئەمدىلا ئاپتونوم رايونلۇق مەدەنىيەت ۋە ساياھەت نازارىتى ئاچقان يىغىنغا قاتنىشىپ كەلگەن بولۇپ، 6-نۆۋەتلىك جۇڭگو شىنجاڭ خەلقئارا مىللىي ئۇسسۇل بايرىمىغا چەت ئەل ئۆمەكلىرى تەكلىپ قىلىنىدىكەن، شىنجاڭ جۇڭگو خەلقئارا ساياھەت كوپىراتىپى قىسمەن چەت ئەل ئۆمەكلىرىنى كۈتۈۋېلىش خىزمىتىنى ئۈستىگە ئالىدىكەن.
بۇ بىرنەچچە كۈندە، جوۋ دى ۋە ساياھەت كوپىراتىپىدىكى كەسىپداشلار جۇڭگو−ئوتتۇرا ئاسىيا باشلىقلار يىغىنىغا ئىزچىل كۆڭۈل بۆلۈپ كەلدى، ئۇلار جۇڭگولۇق ساياھەتچىلەرنى ئوتتۇرا ئاسىيادىكى بەش دۆلەتكە بېرىپ ساياھەت قىلىشقا تەشكىللەشنىڭ ئىستىقبالىدىن ئۈمىدۋار بولدى. بۇ يىل 4-ئاينىڭ ئاخىرىدا، بۇ ساياھەت كوپىراتىپى تەشكىللىگەن «100 ئۆمەك، 1000 كىشى ئوتتۇرا ئاسىيانى ساياھەت قىلىش» بويىچە قازاقىستانغا بارىدىغان تۇنجى ئۆمەك ئۈرۈمچىدىن يولغا چىقتى. گۇاڭدۇڭ، سىچۇەن، خېيلۇڭجياڭ، گۇاڭشى، شاڭخەي، شىنجاڭ قاتارلىق جايلاردىن كەلگەن 36 ساياھەتچى يول بويى غەربكە قاراپ مېڭىپ، قورغاس پورتى ئارقىلىق دۆلەت دەرۋازىسىدىن چىقىپ، ئوتتۇرا ئاسىيا سەپىرىنى باشلىدى. «نۆۋەتتە، بىز بۇ مەھسۇلاتنى ئەلالاشتۇرۇۋاتىمىز. شىنجاڭ سىرتىدىن كەلگەن ساياھەتچىلەر، بولۇپمۇ گۇاڭجوۋ، شاڭخەيلىك ساياھەتچىلەرنىڭ ئوتتۇرا ئاسىياغا بېرىپ ساياھەت قىلىشقا بولغان قىزىقىشى كۈچلۈك، مەسلىھەت سوراش مىقدارى ناھايىتى كۆپ، 5-ئاينىڭ ئاخىرىدا يەنە ئۆمەك ئەۋەتىشنى ئويلىشىۋاتىمىز» دېدى جوۋ دى.
بۇ، ئاپتونوم رايونلۇق مەدەنىيەت ۋە ساياھەت نازارىتى باشلىغان «100 ئۆمەك، 1000 كىشى ئوتتۇرا ئاسىيانى ساياھەت قىلىش» پائالىيىتىنىڭ بىر قىسمى. بۇ نازارەت مۇكاپاتلاش لايىھەسى تۈزۈپ، مۇكاپاتلاش، تولۇقلىما بېرىش تەدبىرلىرىنى ئېلان قىلىپ، ساياھەت كوپىراتىپى، كارخانىلارنىڭ ئوتتۇرا ئاسىياغا بېرىپ چېگرادىن كىرىش - چىقىش بويىچە ساياھەت بازارلىرىنى پائال ئېچىشىغا ئىلھام بېرىپ ۋە يۆلەپ، چېگرادىن چىقىپ ساياھەت لىنىيەسى تاللايدىغان ئۆمەكنى قازاقىستانغا بېرىپ شۇ جايدىكى ساياھەت كارخانىلىرى بىلەن سۆھبەتلىشىش ۋە پىكىر ئالماشتۇرۇش ئارقىلىق ھەمكارلىق مۇناسىۋىتى ئورنىتىشقا تەشكىللەپ، بىر تۈركۈم «شىنجاڭ + ئوتتۇرا ئاسىيا» ساياھەت يېڭى لىنىيەسى، يېڭى مەھسۇلاتلىرىنى ئوتتۇرىغا چىقاردى.
نۆۋەتتە، ئاپتونوم رايونلۇق مەدەنىيەت ۋە ساياھەت نازارىتى جۇڭگو شىنجاڭ بىلەن قازاقىستاننىڭ تۆت ئوبلاست، بىر شەھىرىنىڭ ساياھەت ھەمكارلىقى سۆھبەت يىغىنى، جۇڭگو شىنجاڭ بىلەن ئۆزبېكىستاننىڭ ئىككى ئوبلاستىنىڭ ساياھەت ھەمكارلىقى سۆھبەت يىغىنىنى ئېچىشقا تەييارلىق قىلىۋاتىدۇ، كېيىنكى يېرىم يىلدا ئوتتۇرا ئاسىيا دۆلەتلىرىگە بېرىپ قانات يايدۇرۇلىدىغان سودا پائالىيەتلىرىگە پائال ماسلىشىپ، ئوتتۇرا ئاسىيادىكى بەش دۆلەتتە «شىنجاڭ ياخشى جاي» تېمىسىدىكى مەدەنىيەت ۋە ساياھەتنى تەشۋىق قىلىش، تونۇشتۇرۇش يۈرۈشلۈك پائالىيەتلىرىنى ئۆتكۈزىدۇ، سىجىل تۈردە سۇپا قۇرۇپ، خەلقئارا ساياھەت كوپىراتىپى، ساھە جەمئىيىتى، ئالاقىدار جەمئىيەت ئاپپاراتلىرىنىڭ ھەمكارلىق كېلىشىمى ئىمزالىشىنى ئىلگىرى سۈرىدۇ.
بۇنىڭدىن سىرت، شىنجاڭ يەنە بىر تۈركۈم چوڭ تىپتىكى مەدەنىيەت-ساياھەت پائالىيەتلىرى، جۈملىدىن 6-نۆۋەتلىك جۇڭگو شىنجاڭ خەلقئارا مىللىي ئۇسسۇل بايرىمى، «گۈزەل جۇڭگو، جۇڭگودىكى بايقاش سەپىرى» پائالىيىتى، تۇنجى نۆۋەتلىك شىنجاڭ خەلقئارا ساياھەت فوتو سۈرەت يىغىنى قاتارلىقلارنى ئۆتكۈزۈپ، ئوتتۇرا ئاسىيا دۆلەتلىرى ئۆمەكلىرىنى قاتنىشىشقا تەكلىپ قىلىدۇ.
«<بىر بەلباغ، بىر يول»نى ئورتاق قۇرۇش تەشەببۇسىنىڭ ئوتتۇرىغا قويۇلغىنىغا ئون يىل بولغان پەيتتە، بىز جۇڭگو−ئوتتۇرا ئاسىيا باشلىقلار يىغىنىنىڭ نەتىجىلىرىدىن يەنىمۇ ياخشى پايدىلىنىپ، مەۋقەنى ئەۋزەللىككە قويۇپ، ئالماشتۇرۇش سۇپىسى قۇرۇپ، ئوتتۇرا ئاسىيادىكى بەش دۆلەت بىلەن بولغان مەدەنىيەت ۋە ساياھەت جەھەتتىكى ئالماشتۇرۇش، ھەمكارلىقنى كۈچەيتىپ، يەنىمۇ ئىلگىرىلىگەن ھالدا مەدەنىيەت ۋە ساياھەتنىڭ خەلق رىشتىنى تۇتاشتۇرۇشتىكى رولىنى جارى قىلدۇرىمىز» دېدى ئاپتونوم رايونلۇق مەدەنىيەت ۋە ساياھەت نازارىتى پارتىيە گۇرۇپپىسىنىڭ مۇئاۋىن شۇجىسى، مۇئاۋىن نازىر يەن نەيمىن.
