ئانار بۇلۇت\شىنجاڭ گېزىتى مۇخبىرى مېھرىگۈل غوپۇر
ھۆكۈمەت خىزمىتىدىن دوكلاتتا، يېمەك - ئىچمەك، مەدەنىيەت، ساياھەت، تەنتەربىيە قاتارلىق تۇرمۇش مۇلازىمىتى ئىستېمالىنىڭ ئەسلىگە كېلىشىگە تۈرتكە بولۇش كېرەك، دەپ ئوتتۇرىغا قويۇلدى. شىنجاڭ ئىشلەپچىقىرىش - قۇرۇلۇش بىڭتۇەنى 8 - شى شىخەنزە شەھىرى مەدەنىيەت - ساياھەت تارماقلىرى مەملىكەتلىك ئىككى يىغىن روھىنى ئەستايىدىل ئۆگىنىپ، تەشۋىق قىلىپ، ئىزچىللاشتۇرۇپ، مەدەنىيەت ۋە ساياھەت مەھسۇلاتلىرى تەمىناتىنى ئۈزلۈكسىز بېيىتىپ، ھەربىيلەر بوز يەر ئۆزلەشتۈرۈش مەدەنىيەت تەتقىقات - ئوقۇتۇش ساياھىتىنى زور كۈچ بىلەن راۋاجلاندۇرۇپ، مەدەنىيەت ۋە ساياھەت مۇلازىمىتىنىڭ سۈپىتىنى پۈتۈن كۈچ بىلەن ئۆستۈرۈپ، مەدەنىيەت ۋە ساياھەت ئىستېمالىنىڭ ئومۇميۈزلۈك ئەسلىگە كېلىشىگە تۈرتكە بولدى.
3 - ئاينىڭ 25 - كۈنى باشلانغان 8 - شى شىخەنزە شەھىرى تۇنجى نۆۋەتلىك لەگلەك مەدەنىيەت بايرىمىدا كۈتۈۋېلىنغان ساياھەتچى 100 مىڭ ئادەم قېتىمدىن ئېشىپ، تەخمىنەن 20 مىليون يۈەن ساياھەت ئىستېمالىغا تۈرتكە بولدى. 8 - شى شىخەنزە شەھەرلىك مەدەنىيەت - تەنتەربىيە - رادىيو - تېلېۋىزىيە ۋە ساياھەت ئىدارىسىنىڭ سانلىق مەلۇماتىدا كۆرسىتىلىشىچە، بۇ يىل 1 - پەسىلدە، شىخەنزە شەھىرى كۈتۈۋالغان ساياھەتچى 2 مىليون 800 مىڭ ئادەم قېتىمغا يېتىپ، بۇلتۇرقى ئوخشاش مەزگىلدىكىدىن %5.4 ئاشقان، 1 مىليارد 370 مىليون يۈەن ساياھەت كىرىمى يارىتىپ، بۇلتۇرقى ئوخشاش مەزگىلدىكىدىن %2.2 ئاشقان.
بۇ يىل ئەتىيازدا، شىخەنزە شەھىرى شەھەر ساياھىتى، يېقىن شەھەر ئەتراپى ساياھىتى سەرخىل لىنىيەلىرىنى قەدەم - باسقۇچلۇق، نۇقتىلىق، ۋاقىت بۆلىكىگە ئايرىپ بەرپا قىلدى ۋە يولغا قويدى، شۇنىڭ بىلەن بىللە بىر قاتار مەدەنىيەت ۋە ساياھەت مەھسۇلاتلىرى ھەمدە مول مەزمۇنلۇق، رەڭدار بايرام تەبرىكلەش پائالىيەتلىرىنى ئۆتكۈزۈپ، كەڭ ساياھەتچىلەرنى پائال قاتنىشىشقا جەلپ قىلدى، ساياھەتچىلەر سانى ۋە كىرىم مۇقىم ئاشتى. 8 - شى شىخەنزە شەھەرلىك مەدەنىيەت - تەنتەربىيە - رادىيو - تېلېۋىزىيە ۋە ساياھەت ئىدارىسى يەنە ئىستېمال بېلىتى تارقىتىش، ئىشىك بېلىتىدە ئېتىبار بېرىش قاتارلىق ئېتىبار سىياسەتلەرنى يولغا قويۇپ، قار تېيىلىش مەيدانى، كىتابخانا، بەدەن چېنىقتۇرۇش سارىيى، مېھمانخانا، دېھقانلار ئارامگاھى قاتارلىق سورۇنلارنىڭ 10 مىليون يۈەنگە يېقىن مەدەنىيەت - ساياھەت ئىستېمالىغا تۈرتكە بولدى.
«بۇ يىل بىز شى، شەھەر دەرىجىلىك بايرام تەبرىكلەش پائالىيىتىدىن 13نى، تۇەن - مەيدان دەرىجىلىك بايرام تەبرىكلەش پائالىيىتىدىن 14نى، ھەرقايسى مەنزىرە رايون، مەنزىرە نۇقتىسىدىكى بايرام تەبرىكلەش پائالىيىتىدىن يەتتىنى ئۆتكۈزدۇق، بايرام پائالىيىتى ئارقىلىق كىشىلەرنى جەلپ قىلىپ، ئىستېمالغا تۈرتكە بولۇپ، بازارنى جانلاندۇرۇپ، 8 - شى شىخەنزە شەھىرىنىڭ ساياھەت رىقابەت كۈچى ۋە تونۇلۇش دەرىجىسىنى يەنىمۇ ئۆستۈردۇق.» 8 - شى شىخەنزە شەھەرلىك مەدەنىيەت - تەنتەربىيە - رادىيو - تېلېۋىزىيە ۋە ساياھەت ئىدارىسى پارتىيە گۇرۇپپىسىنىڭ شۇجىسى، ئىدارە باشلىقى جاڭ ۋېنشىڭ تونۇشتۇرۇپ مۇنداق دېدى: مەدەنىيەت بىلەن ساياھەتنىڭ چوڭقۇر يۇغۇرۇلۇشىنى سىجىل ئالغا سىلجىتىپ، مەدەنىيەت ۋە ساياھەتكە ئالاقىدار كەسىپ زەنجىرىنى تەدرىجىي ئۇزارتىمىز؛ قار - مۇز ساياھىتى، قىزىل ساياھەت، يېقىن شەھەر ئەتراپى ساياھىتى، شەھەر ساياھىتى قاتارلىق جەھەتلەردە يېڭى بۆسۈش ھاسىل قىلىپ، يېڭى مەھسۇلات، يېڭى كەسىپ ھالىتى بەرپا قىلىش ئارقىلىق مەدەنىيەت - ساياھەت ئىستېمالىغا تۈرتكە بولىمىز.
