ئانار بۇلۇت\شىنجاڭ گېزىتى مۇخبىرى لۇ فېڭباۋ
4 ـ ئاينىڭ 19 ـ كۈنى، «شىندۇڭفاڭ تېز پويىزى» تەكلىماكاننى ئايلىنىش ساياھەت مەخسۇس پويىزى ئۈرۈمچىگە قايتىپ كەلدى، 11 كۈنلۈك تەكلىماكاننى ئايلىنىش ساياھىتى مۇۋەپپەقىيەتلىك ئاخىرلاشتى.
تەكلىماكاننى ئايلىنىش ساياھەت مەخسۇس پويىزى «تۆمۈريول+ ساياھەت» چوڭقۇر يۇغۇرما تەرەققىياتىنىڭ جانلىق نامايەندىسى. شىنجاڭ كۈنسېرى مۇكەممەللىشىۋاتقان تۆمۈريول قاتنىشى ئۇل ئەسلىھەلىرىگە تايىنىپ، ساياھەت بايلىقى بىلەن پويىز قاتنىشىنى زىچ بىرلەشتۈرۈپ، ساياھەتچىلەرنى «بىر بېلەت بىلەن كۆپ ساياھەت قىلىش، كۆپ مەنزىرە نۇقتىلىرىنى بىرلەشتۈرۈپ ساياھەت قىلىش، پويىز ئادەمگە ئەگىشىپ مېڭىش، مەنزىرە پويىزغا ئەگىشىپ يۆتكىلىش»تەك يېڭى تەسىراتقا ئېرىشتۈرۈپ، شىنجاڭنىڭ ساياھەت تەرەققىياتىنى تېخىمۇ يېتەرلىك زاپاس كۈچ بىلەن تەمىنلىدى.
«سەپەر ئۇزۇن، ساياھەت قىسقا بولۇش» قىيىن ئەھۋالىنى ھەل قىلىش
«ئۈچ تاغ ئارىسىدىكى ئىككى ئويمانلىق»تەك ئۆزگىچە يەر شەكلى شىنجاڭنىڭ تۈرلۈك ـ تۈمەن قىياپەتتىكى ھەيۋەتلىك ۋە گۈزەل مەنزىرىسىنى شەكىللەندۈرگەن. لېكىن شىنجاڭنىڭ يېرى كەڭ، شەھەر بىلەن شەھەر، مەنزىرە رايونى بىلەن مەنزىرە رايونى ئارىسىدىكى يول يىراق، مۇساپە ئۇزۇن بولغاچقا، ساياھەت بازىرى «سەپەر ئۇزۇن، ساياھەت قىسقا بولۇش»تەك قىيىن ئەھۋالغا دۇچ كەلدى.
«سەپەر ئۇزۇن، ساياھەت قىسقا بولۇش» دېگەنلىك، ساياھەتچىلەرنىڭ سەپەرگە سەرپ قىلغان ۋاقتى بىرقەدەر ئۇزاق، گۈزەل مەنزىرىدىن ھۇزۇرلىنىدىغان ۋاقتى بىرقەدەر قىسقا بولۇشنى كۆرسىتىدۇ. بۇ خىل ئەھۋال شىنجاڭ ساياھەتچىلىكىنىڭ تەرەققىياتىغا تەسىر كۆرسەتمەكتە» دېدى ئاپتونوم رايونلۇق ساياھەت جەمئىيىتىنىڭ مۇئاۋىن باشلىقى جاڭ شياۋيۈ.
يېقىنقى يىللاردىن بۇيان، ئاپتونوم رايونىمىز قاتناش ئۇل ئەسلىھە قۇرۇلۇشىنى زور كۈچ بىلەن تەرەققىي قىلدۇردى، پۇقراۋى ئايرودۇرۇمنىڭ سانى 25كە يەتتى، يۇقىرى سۈرئەتلىك (1 ـ دەرىجىلىك) يول مۇساپىسى 11 مىڭ كىلومېتىردىن ئاشتى، جەنۇبىي ـ شىمالىي شىنجاڭ تۆمۈريولىدا قوش ئايلانما لىنىيە شەكىللەندى. كۈنسېرى مۇكەممەللىشىۋاتقان ئىستېرېئولۇق قاتناش تورى شىنجاڭ ساياھىتىنىڭ تېز تەرەققىياتىنى مۇھىم ئاساس بىلەن تەمىنلىدى.
بولۇپمۇ، لىنىيەلەر تۇتاشتۇرۇلۇپ تورلاشتۇرۇلغان تۆمۈريول لىنىيەلىرى ئاساسىدا، شىنجاڭ تۆمۈريولى ئۇل ئەسلىھەلەرنى ياخشىلاش، پويىزلارنى يېڭىلاش، پويىزلارنىڭ يۈرۈش شەكلىنى تەڭشەش، يۈرۈش ۋاقتىنى مۇۋاپىق تەقسىملەش قاتارلىق شەكىللەر ئارقىلىق، تۆمۈريول سەپەر ۋاقتىنى يەنىمۇ قىسقارتىپ، ئۈرۈمچىنى مەركەز قىلغان ئىككى سائەتلىك، ئۈچ سائەتلىك، تۆت سائەتلىك بېرىش ـ كېلىش قاتناش چەمبىرىكى قاتارلىقلارنى شەكىللەندۈرۈپ، «تېز سەپەر قىلىپ، ئاستا ساياھەت قىلىش» ساياھەت شەكلىنى كۈچلۈك تىرەك بىلەن تەمىنلىدى.
«نۆۋەتتە، بىر قىسىم پويىزلاردا <ئاممىۋى قاتناش> شەكلىدە يۈرۈش شەكىللىنىپ، يولۇچىلار مەنزىلگە تېز يېتىپ بېرىپ ساياھەت قىلالايدىغان بولدى» دېدى جۇڭگو تۆمۈريولى ئۈرۈمچى ئىدارىسى گۇرۇھى چەكلىك شىركىتى يولۇچى توشۇش بۆلۈمىنىڭ مۇئاۋىن مۇدىرى سۇڭ چياڭ.
ساياھەتچىلەرنىڭ سەپەرگە سەرپ قىلىدىغان ۋاقتى بارغانسېرى قىسقىراپ، مەنزىرە رايونى، مەنزىرە نۇقتىلىرىدا تۇرىدىغان ۋاقتى بارغانسېرى ئۇزاردى، ساياھەت ئەمدى «ئات ئۈستىدە گۈل كۆرۈش» ئەمەس. «<تېز سەپەر قىلىپ، ئاستا ساياھەت قىلىش> ساياھەتچىلەرنى چوڭقۇر ساياھەت قىلىش ئىمكانىيىتىگە ئىگە قىلدى، بۇمۇ شىنجاڭنىڭ ساياھەت تەرەققىياتىنىڭ مۇھىم يۆنىلىشىنىڭ بىرى» دېدى جاڭ شياۋيۈ.
ساياھەتچىلەرگە تېخىمۇ كۈچلۈك تەسىرات تۇيغۇسى بېغىشلاش
4 ـ ئاينىڭ 17 ـ كۈنى چۈشتىن بۇرۇن، چاقىلىق ناھىيەسىدىكى مىرەن قەدىمىي شەھىرى خارابىسى ئاسمىنىدا قۇياش پارلاپ تۇراتتى، ساياھەت مەخسۇس پويىزىدىكى ساياھەتچىلەر چۈشەندۈرگۈچىنىڭ قەدىمىگە ئەگىشىپ، مىرەن قەدىمىي شەھىرىنىڭ تارىخى بىلەن تونۇشتى.
ساياھەتچى شۈ يىنپىڭ چاقلىق ئورۇندۇقتا ئولتۇرغان ئانىسىنى ئىتتىرىپ ياغاچ ئاسما يولدا ئاستا ماڭدى. بىلمىگەن جايلىرىنى چۈشەندۈرگۈچىدىن سورىدى، بەزىدە توختاپ خارابىلىكتىكى خارابىلەرنى سۈرەتكە تارتتى.
«ساياھەت مەخسۇس پويىزى ئارقىلىق ساياھەت قىلىش بىزگە بەك ماس كېلىدىكەن.» شۈ يىنپىڭ مۇنداق دېدى: ساياھەتنىڭ رىتىمى ئاستا بولۇشى كېرەك. تەكلىماكاننى ئايلىنىش ساياھىتى سەپىرىدە، ئۇ ئانىسىغا ھەمراھ بولۇپ ئاستا ساياھەت قىلىپ، مەنزىرە كۆرۈپ، مىللەتلەر ئۆرپ ـ ئادىتىنى تاماشا قىلىپ، مەززىلىك تائاملاردىن ھۇزۇرلىنىپ، جىسمانىي ۋە روھىي جەھەتتىن تولۇق ئارام ئالدى.
«شىندۇڭفاڭ تېز پويىزى» تەكلىماكاننى ئايلىنىش ساياھەت مەخسۇس پويىزى جەنۇبىي شىنجاڭ تۆمۈريولى، خوتەن ـ چاقىلىق تۆمۈريولى، گولمۇد ـ كورلا تۆمۈريولىنىڭ شىنجاڭ بۆلىكىنى بويلاپ تەكلىماكان قۇملۇقىنى بىر ئايلىنىپ چىقتى، ساياھەتچىلەر كۇچا، قەشقەر، خوتەن، كورلا قاتارلىق جەنۇبىي شىنجاڭدىكى ئاساسلىق ناھىيە، شەھەرلەرنى ساياھەت قىلىپ، جەنۇبىي شىنجاڭنىڭ گۈزەل مەنزىرىسى ۋە مىللەتلەر ئۆرپ ـ ئادىتىدىن ھۇزۇرلاندى.
«ساياھەت مەخسۇس پويىزى تۆمۈريول بىلەن ساياھەتنى يۇغۇرۇپ يېڭىلىق يارىتىپ تەرەققىي قىلدۇرۇشنىڭ نەتىجىسى» دېدى جاڭ شياۋيۈ. پويىز سەپەر ۋاقتىنى تەدرىجىي قىسقارتىپ، «سەپەر ئۇزۇن، ساياھەت قىسقا بولۇش» قىيىن ئەھۋالىنى ھەل قىلغاندىن كېيىن، شىنجاڭ تۆمۈريول ئەۋزەللىكى ۋە ساياھەت بايلىقى ئەۋزەللىكىنى جارى قىلدۇرۇپ، ساياھەت مەخسۇس پويىزىنى يولغا قويۇپ، ساياھەتچىلەرنىڭ چوڭقۇر ساياھەت قىلىش ئېھتىياجىنى تېخىمۇ ياخشى قاندۇرالايدۇ.
شىنجاڭ تۆمۈريول ساياھەت تەرەققىيات گۇرۇھى چەكلىك شىركىتىنىڭ مۇئاۋىن باش دىرېكتورى خۇاڭ تىڭفېن مۇنداق دېدى: ساياھەت مەخسۇس پويىزى بىر لىنىيەدە كۆپ مەنزىرە بولۇشتەك ئالاھىدىلىككە ئىگە، كۈنسېرى مۇكەممەللىشىۋاتقان شىنجاڭ تۆمۈريول تورىغا تايىنىپ ساياھەت مەخسۇس پويىزى يولغا سېلىنىپ، يول بويىدىكى مەنزىرە نۇقتىلىرى ئۈنۈملۈك تۇتاشتۇرۇلۇپ، ساياھەتچىلەرنىڭ بىر قېتىملىق ساياھەت بىلەنلا نۇرغۇن مەنزىرە نۇقتىسىنى ساياھەت قىلىش ئارزۇسى قاندۇرۇلۇپ، «بىر بېلەت بىلەن كۆپ ساياھەت قىلىش، كۆپ مەنزىرە نۇقتىلىرىنى بىرلەشتۈرۈپ ساياھەت قىلىش، پويىز ئادەمگە ئەگىشىپ مېڭىش، مەنزىرە پويىزغا ئەگىشىپ يۆتكىلىش» ئىشقا ئاشۇرۇلدى. «پويىزدا ئولتۇرۇپمۇ مەنزىرىنى كۆرگىلى بولىدۇ، سەپەر ساياھەت قىلىشقا ئۆزگەردى، ساياھەتچىلەرنىڭ تەسىرات تۇيغۇسى تېخىمۇ كۈچەيدى» دېدى خۇاڭ تىڭفېن.
شىنجاڭ ساياھىتىنىڭ تەرەققىيات زاپاس كۈچىنى ئاشۇرۇش
1 ـ پەسىلدە، شىنجاڭ بويىچە كۈتۈۋېلىنغان ساياھەتچى 35 مىليون 226 مىڭ 800 ئادەم قېتىم بولۇپ، بۇلتۇرقى ئوخشاش مەزگىلدىكىدىن %18.64 ئاشتى؛ ئىشقا ئاشۇرۇلغان ساياھەت كىرىمى 27 مىليارد 514 مىليون يۈەن بولۇپ، بۇلتۇرقى ئوخشاش مەزگىلدىكىدىن %36.05 ئاشتى.
ساياھەت نەتىجىسىنىڭ بۇنداق يارقىن بولۇشىدا، «تۆمۈريول + ساياھەت»نىڭ چوڭقۇر يۇغۇرما تەرەققىياتىنىڭ بىر ئۈلۈش تۆھپىسى بار.
بۇ يىل، شىنجاڭ تۆمۈريول تارماقلىرى دىققەتنى شىنجاڭنى ساياھەت ئارقىلىق گۈللەندۈرۈش ئىستراتېگىيەسىگە مەركەزلەشتۈرۈپ، مەدەنىيەت ـ ساياھەت يۇغۇرما تەرەققىياتىنى پۇختا ئالغا سىلجىتىپ، «ساياھەت مەنزىرە رايونلىرىنى چوڭ دائىرىدە تۇتاشتۇرۇش، ساياھەتچىلەر سەپەرگە چىققاندا چوڭ ئاممىۋى قاتناشنى تاللاش، ساياھەت پويىزى چوڭ ئايلىنىش»تىن ئىبارەت «تۆمۈريول+ساياھەت» يۇغۇرما ھەمتۈرتكىلىك تەرەققىيات يېڭى ئەندىزىسىنى بەرپا قىلدى، ساياھەت داڭلىق ماركىسى پويىزلىرى ئارقا ـ ئارقىدىن قاتنىدى.
3 ـ ئايدىكى تۇرپان ئۆرۈك چېچىكى، 5 ـ ئايدىكى تارباغاتاي تاغ گۈلىدىن 6 ـ ئايدىكى ئىلى ئۈستىقۇددۇسىغىچە، شىمالىي شىنجاڭنى ئايلىنىپ ساياھەت قىلىش، جەنۇبىي شىنجاڭنى ئەركىن تاماشا قىلىشتىن جەنۇبىي ۋە شىمالىي شىنجاڭنى ئەركىن ساياھەت قىلىشقىچە، شىنجاڭ تۆمۈريول تارماقلىرى ھەرقايسى جايلارنىڭ ساياھەت بايلىقىغا بىرلەشتۈرۈپ، «چېچەك سەيلىسى ساياھىتى» «باھار سەيلىسى ساياھىتى» «سىر ئۈستىدە ئىزدىنىش ساياھىتى» قاتارلىق بىر قاتار باش تېمىلىق ساياھەت مەھسۇلاتلىرىنى ئوتتۇرىغا چىقىرىپ، پۈتۈن يىلدا 100 ساياھەت مەخسۇس پويىزى سېلىشنى پىلانلىدى.
خۇاڭ تىڭفېن مۇنداق دېدى: ساياھەت مەخسۇس پويىزى مەھسۇلاتلىرى يولغا قويۇلۇشى بىلەنلا بازارنىڭ قارشى ئېلىشىغا ئېرىشتى، تۆمۈريول تارماقلىرى بازار جەلپ قىلىش كۈچىگە ئىگە ساياھەت لىنىيەلىرىنى داۋاملىق ئاچىدۇ ھەم پويىزنىڭ يۇمشاق، قاتتىق دېتال سۈپىتىنى ئۆستۈرۈپ، مەخسۇس پويىزنىڭ داڭلىق ماركا قىممىتىنى سىجىل قېزىپ، ساياھەت مەخسۇس پويىزى كەسىپ زەنجىرىنى ئۇزارتىپ، شىنجاڭ ساياھىتىگە تېخىمۇ كۆپ كۈچ قوشىدۇ.
«تۆمۈريول بىلەن ساياھەتنىڭ چوڭقۇر يۇغۇرۇلۇشى شىنجاڭنىڭ ساياھەت تەرەققىياتىنىڭ ئېلاستىكلىقىنى تېخىمۇ كۈچەيتتى، ھاياتىي كۈچىنى تېخىمۇ ئۇرغۇتتى، زاپاس كۈچىنى تېخىمۇ ئاشۇردى.» جاڭ شياۋيۈ مۇنداق دېدى: كېيىنكى مەزگىلدە ساياھەت جەمئىيىتىنىڭ كۈچىنى جارى قىلدۇرۇپ، «تاشيول + ساياھەت» «خەلق ئاۋىياتسىيەسى + ساياھەت»نىڭ چوڭقۇر يۇغۇرما تەرەققىياتىنى تىرىشىپ ئالغا سىلجىتىپ، شىنجاڭ ساياھەتچىلىكىنىڭ يۇقىرى سۈپەتلىك تەرەققىيات يولىدا داۋاملىق پۇختا قەدەم بىلەن ئالغا ئىلگىرىلىشىگە تۈرتكە بولىمىز.
