ئانار بۇلۇت\شىنجاڭ گېزىتى مۇخبىرلىرى خېي خۇڭۋېي، جېڭ جو
باھاردا ياڭرىغان گۈلدۈرماما ساداسى بارلىق شەيئىلەرنى ئويغاتتى. ھاۋانىڭ تەدرىجىي ئىللىشىغا ئەگىشىپ، شىنجاڭنىڭ ئىستېمال بازىرى بارغانسېرى جانلاندى. مەيلى ئۈرۈمچى «15 ـ مارت» خەلقئارا ئاپتوموبىل كۆرگەزمىسى بولسۇن، ياكى ھەرقايسى جايلاردا ئەۋج ئالغان چېچەك سەيلىسى قىزغىنلىقى بولسۇن، ھەممىسىدە قىزغىن ئىستېمال كەيپىياتى نامايان بولدى.
بۇ يىل كىرگەندىن بۇيان، ئىچكى ئېھتىياجنى كېڭەيتىپ، ئىستېمالنى ئىلگىرى سۈرىدىغان بىر قاتار تەدبىرلەر سىجىل كۈچ بېرىپ، ئاممىنىڭ ئىستېمال ئىشەنچى ئۈزلۈكسىز ئېشىپ، ئىستېمال بازىرىدا تېز قايتا ئۆرلەش ھالىتى كۆرۈلدى. بۇ يىل 1 ـ ئايدىن 2 ـ ئايغىچە، ئاپتونوم رايون بويىچە جەمئىيەت ئىستېمال بۇيۇملىرىنىڭ پارچە سېتىلىش ئومۇمىي سوممىسى 57 مىليارد 758 مىليون يۈەن بولۇپ، بۇلتۇرقى ئوخشاش مەزگىلدىكىدىن %3.7 ئېشىپ، ئېشىش سۈرئىتى پۈتۈن مەملىكەتنىڭكىدىن 0.2 پىرسەنت پوئېنت يۇقىرى بولدى.
ئادەم ئېقىمى ئۈزۈلمىدى
ئىستېمال بازىرى سىجىل جانلاندى
3 ـ ئاينىڭ 26 ـ كۈنى سائەت 21دە، ئۈرۈمچى ئىقتىساد ـ تېخنىكا تەرەققىيات رايونى (تۇدۇڭخابا رايونى) ۋەندا جىنجيې كوچىسىدا كىشىلەرنىڭ ئايىغى ئۈزۈلمەيتتى. كۆزنى قاماشتۇرىدىغان رەڭگارەڭ چىراغلار ئاستىدا، شەھەر ئاھالىلىرى ئۈچتىن، بەشتىن توپ بولۇشۇپ پاراڭلاشقاچ ئايلىنىۋاتاتتى، يولنىڭ ئىككى تەرىپىدىكى سودىگەرلەر ئالدىراشچىلىقتا بېشىنى كۆتۈرۈشكىمۇ ئۈلگۈرمەيۋاتاتتى، ۋەيمەي يەتكۈزگۈچىلەر كىشىلەر توپى ئارىسىدا ئۇياقتىن ـ بۇياققا ئۆتۈشۈپ تۇراتتى...
بۇ يىل كىرگەندىن بۇيان، ئاپتونوم رايونىمىز ئىلگىرى ـ كېيىن بولۇپ ئىستېمالنى ئەسلىگە كەلتۈرۈش، كېڭەيتىش خىزمىتىنى يولغا قويۇش لايىھەسى قاتارلىق سىياسەت ـ تەدبىرلەرنى ئوتتۇرىغا قويۇپ، «2023 ـ يىللىق ئىستېمالنى ئىلگىرى سۈرۈش يىلى» «ئەيشاڭ شىنجاڭ، ئىستېمالدىن خۇشال ـ خۇرام بەھرىلىنىش» ئومۇمىي خەلق يېڭى يىلنى كۈتۈۋېلىش ئىستېمال بايرىمى ھەم يەرشارىۋى سېتىۋېلىش . باھار بايرىمىلىق مال سېتىۋېلىش مەۋسۇمى پائالىيىتى قاتارلىقلارنى چوڭقۇر ئالغا سىلجىتىپ، ھۆكۈمەت قوللاش، يېتەكلەش، كارخانىلار باھانى چۈشۈرۈپ پايدىنى ئۆتۈنۈپ بېرىش، ئىستېمالچىلار نەپكە ئېرىشىش شەكلى ئارقىلىق، ئىستېمال بازىرىنىڭ ھاياتىي كۈچىنى يەنىمۇ ئۇرغۇتۇپ، ئىستېمالنىڭ تەكشى، مۇقىم ئېشىشىغا تۈرتكە بولدى.
ئىستېمال بازىرىنىڭ سىجىل ئەسلىگە كېلىشى ۋە ئىستېمال ئېھتىياجىنىڭ كۆرۈنەرلىك قويۇپ بېرىلىشى تېخىمۇ كۆپ بازار تىجارەتچىلىرىگە ئىللىقلىق ھېس قىلدۇردى.
ئۈرۈمچى شەھىرى شىمىگۇ رايونى شىنمىن شەرقىي كوچىسى بازىرى ئەتىگەنلىك بازار، كەچلىك بازار قاتارلىقلار بىر گەۋدە قىلىنغان خەلققە قولاي بازار. ھەر كۈنى كەچ سائەت 8 ـ 9لاردا بازار خېرىدارلار بېسىق ۋاقىتنى كۈتۈۋالىدۇ. «نۇرغۇن شەھەر ئاھالىسى ئىشتىن چۈشكەندىن كېيىن بازار ئايلىنىشنى ياخشى كۆرىدۇ، مەن بىر كۈندە 400 ـ 500 يۈەنلىك سودا قىلالايمەن» دېدى بازاردا سۈرلەنگەن گۆش ساتىدىغان تيەن شو.
سانلىق مەلۇماتلاردا كۆرسىتىلىشىچە، ئالدىنقى ئىككى ئايدا ئاپتونوم رايون بويىچە نورمىدىن يۇقىرى كۆلەمدىكى ئورۇنلار ئىشقا ئاشۇرغان تاۋارلارنىڭ پارچە سېتىلىش سوممىسى 25 مىليارد 867 مىليون يۈەن بولۇپ، بۇلتۇرقى ئوخشاش مەزگىلدىكىدىن %3.7 ئاشقان؛ نورمىدىن يۇقىرى كۆلەمدىكى ئورۇنلار ئىشقا ئاشۇرغان يېمەك ـ ئىچمەك كىرىمى 1 مىليارد 449 مىليون يۈەن بولۇپ، بۇلتۇرقى ئوخشاش مەزگىلدىكىدىن %6.6 ئاشقان، تاۋارلارنىڭ پارچە سېتىلىشى، يېمەك ـ ئىچمەك كەسپىدە قوش ئېشىش بولغان.
ئاپتوموبىل قاتارلىق كۆپ مىقدارلىق ئىستېمال بۇيۇملىرىدىمۇ يارقىن نەتىجىلەر نامايان بولغان. ھەرقايسى جايلار ئاپتوموبىل ئىستېمالىغا ياردەم تولۇقلىمىسى بېرىش پائالىيىتى ۋە ئاپتوموبىلنى يېزىلارغا يەتكۈزۈش مەخسۇس ھەرىكىتىنى پائال ئالغا سىلجىتقان، 2 ـ ئايدا، ئاپتونوم رايونىمىزدا نورمىدىن يۇقىرى ئاپتوموبىل تۈرىدىكى تاۋارلاردا ئىشقا ئاشۇرۇلغان پارچە سېتىلىش سوممىسى 4 مىليارد 889 مىليون يۈەن بولۇپ، بۇلتۇرقى ئوخشاش مەزگىلدىكىدىن %21.6 ئاشقان.
ئىچكى ئېھتىياجنى پائال كېڭەيتىپ، ئىستېمال ئىشەنچىنى ئاشۇرۇش ئۈچۈن، شىنجاڭ ئوخشاش بولمىغان كىشىلەر توپىنىڭ كۆپ مەنبەلىك، كۆپ قاتلاملىق ئىستېمال ئېھتىياجىنى چۆرىدەپ، سىياسەت ياردەم تولۇقلىمىسىنى گىرەلەشتۈرۈپ سودىگەرلەرگە ئېتىبار بېرىش قاتارلىق كۆپ خىل شەكىللەر ئارقىلىق ئىستېمالنىڭ ئېشىشىغا كۈچ قوشتى.
ئاپتونوم رايونلۇق سودا نازارىتى پارتىيە گۇرۇپپىسىنىڭ ئەزاسى، مۇئاۋىن نازىر خې گوچىڭ مۇنداق بىلدۈردى: بۇ يىل كۆپ ساھەلىك، كۆپ قاتلاملىق، كۆپ مەنبەلىك ئىستېمالنى ئىلگىرى سۈرۈش پائالىيىتىنى داۋاملىق ئۆتكۈزۈپ، «ھەر ھەپتىدە كۆرۈنۈش بولۇش، ھەر ئايدا پائالىيەت بولۇش، ھەر پەسىلدە باش تېما بولۇش»نى قانات يايدۇرۇپ، پۈتۈن يىل ئىزچىللاشتۇرۇش، تۆت پەسىل داۋاملاشتۇرۇشنى ئىشقا ئاشۇرىمىز.
ئېھتىياج ئاشتى
يېشىل، ئەقلىي ئىقتىدارلىق ئىستېمال تەدرىجىي ياخشى ھالەتكە ئۆتتى
3 ـ ئاينىڭ 26 ـ كۈنى، ئائىلە ئېلېكتىر سايمانلىرى ئارقىلىق خەلققە نەپ يەتكۈزۈش ئىستېمال ياردەم تولۇقلىمىسىنىڭ بارلىقىنى ئاڭلىغان ئۈرۈمچى شەھىرى ئاھالىسى گۇڭ خۇڭلياڭ ئەتىگەندىلا خوتۇنى بىلەن بىللە ئائىلە ئېلېكتىر سايمانلىرىنى سېتىش مەيدانىغا كېلىپ ئېلېكتىر سايمانلىرىنى تاللىدى.
«بىز بۇرۇنلا سۇ، توكنى تېخىمۇ تېجەيدىغان ئايلانما سىلىندىرلىق كىرئالغۇدىن بىرنى ئالماشتۇرۇشنى ئويلىغانىدۇق، بۇ قېتىم ياردەم تولۇقلىمىسى بېلىتى بار بولغاچقا، خېلى كۆپ پۇلنى تېجەپ قالالايدىغان بولدۇق.» گۇڭ خۇڭلياڭ مۇنداق دېدى: يېقىنقى يىللاردىن بۇيان ئائىلە ئېلېكتىر سايمانلىرىنىڭ يېڭىلىنىشى ناھايىتى تېز بولۇۋاتىدۇ، مەن ئېلېكتىر سايمانلىرىنىڭ ئەقلىي ئىقتىدارىغا بەكرەك ئەھمىيەت بېرىمەن، ئەقلىي ئىقتىدارلىق كىرئالغۇ ئىشلەتكەندە، يان تېلېفون تېرمىنالىدا مەشغۇلاتنى ئالدىن تەڭشەپ قويغىلى بولىدىكەن، ئۆزىمىز ئۆيدە بولمىساقمۇ كىيىملەر پاكىز يۇيۇلۇپ قالىدىكەن.
يېقىندا، خەيئېر جىجيا پاي چەكلىك شىركىتى شىنجاڭ شۆبە شىركىتى 2023 ـ يىللىق «يېشىل، ئەقلىي ئىقتىدارلىق ئائىلە ئېلېكتىر سايمانلىرىنى يېزىلارغا يەتكۈزۈش خەيئېر خەلققە قولايلىق مۇلازىمىتىنى كەنت، مەھەللىلەرگە يەتكۈزۈش»تىن ئىبارەت نەپ يەتكۈزۈشتىن بەھرىلىنىش پەسىللىك پائالىيىتىنى باشلىدى، شىركەتنىڭ تىجارەت باش نازارەتچىسى گاۋ شيۇپېڭ مۇنداق تونۇشتۇردى: پائالىيەت مەزگىلىدە، 170 مىڭ پارچە ئىستېمال بېلىتى تارقىتىشنى مۆلچەرلىدۇق، ھەر مىللەت ئاممىنىڭ تۆۋەن كاربونلۇق، يېشىل، ئەقلىي ئىقتىدارلىق، مودا ئائىلە ئېلېكتىر سايمانلىرىنىڭ ئىستېمال دەرىجىسىنى ئۆستۈرۈشكە بولغان ئېھتىياجىنى قاندۇرۇش مۆلچەرلەندى.
ھەرقايسى چوڭ ئائىلە ئېلېكتىر سايمانلىرى بازارلىرىدا، يېشىل، ئەقلىي ئىقتىدارلىق بولۇش ئاساس قىلىنغان ئېلېكتىر سايمانلىرى ھەر خىل بولۇپ، نەچچە ئون يۈەنلىك ئەقلىي ئىقتىدارلىق تېرمومېتىردىن نەچچە مىڭ يۈەنلىك يەر سۈپۈرىدىغان ماشىنا ئادەم، دېرىزە سۈرتىدىغان ماشىنا ئادەمگىچە، يەنە نەچچە ئونمىڭ يۈەنلىك پۈتۈن گەۋدىلىك ئەقلىي ئىقتىدارلىق ئائىلە سايمانلىرىغىچە، كىيىم ـ كېچەك، يېمەك ـ ئىچمەك، تۇرالغۇ، يۈرۈش قاتارلىق نۇرغۇن ئىستېمال ساھەلىرىنى ئۆز ئىچىگە ئالدى، يېشىل ئەقلىي ئىقتىدارلىق ئائىلە ئېلېكتىر سايمانلىرى ئائىلە ئېلېكتىر سايمانلىرى ئىستېمالىدىكى يېڭى ئەتىۋارلىق بۇيۇمغا ئايلاندى.
يېشىل ئەقلىي ئىقتىدارلىق ئائىلە ئېلېكتىر سايمانلىرى ئىستېمالىنى يەنىمۇ كېڭەيتىپ، ئائىلە ئېلېكتىر سايمانلىرى مەھسۇلاتلىرىنىڭ مۇلازىمەت دەرىجىسىنى ئۆستۈرۈش ۋە ئىستېمال سىغىمىنى كېڭەيتىشنى ئىلگىرى سۈرۈش ئۈچۈن، ئاپتونوم رايونلۇق سودا نازارىتى ئاپتونوم رايونلۇق تەرەققىيات ۋە ئىسلاھات كومىتېتى قاتارلىق 13 تارماق بىلەن بىرلىكتە «شىنجاڭ ئۇيغۇر ئاپتونوم رايونىنىڭ يېشىل، ئەقلىي ئىقتىدارلىق ئائىلە ئېلېكتىر سايمانلىرى ئىستېمالىنى ئىلگىرى سۈرۈشنى يولغا قويۇش لايىھەسى»نى بېسىپ تارقىتىپ، دىققەتنى ئائىلە ئېلېكتىر سايمانلىرى ئىستېمالى، سېتىشتىن كېيىنكى مۇلازىمەت، قايتۇرۇپ يىغىۋېلىش قاتارلىق پۈتكۈل جەرياندىكى ھەرقايسى ساھەلەرگە مەركەزلەشتۈرۈپ، ئائىلە ئېلېكتىر سايمانلىرى كارخانىلىرىنى ئائىلە ئېلېكتىر سايمانلىرىنى يېزىلارغا يەتكۈزۈش، كونىنى يېڭىغا ئالماشتۇرۇش، خەلققە نەپ يەتكۈزۈش، پايدىنى ئۆتۈنۈپ بېرىش پائالىيەتلىرىنى قانات يايدۇرۇشقا رىغبەتلەندۈردى ۋە ئۇنى قوللىدى.
ئوخشاشلا، ئاپتوموبىل ساھەسىدە يېڭى ئېنېرگىيەلىك ئاپتوموبىل بارغانسېرى كۆپ كىشىنىڭ دىققىتىنى تارتتى. ئەمدىلا ئۆتۈپ كەتكەن ئۈرۈمچى «15 ـ مارت» خەلقئارا ئاپتوموبىل كۆرگەزمىسىدە، جەمئىي 16 مىڭ 256 ئاپتوموبىل سېتىلىپ، سېتىلىش سوممىسى 2 مىليارد 462 مىليون 300 مىڭ يۈەنگە يەتتى، يېڭى ئېنېرگىيەلىك ئاپتوموبىللارنىڭ سېتىلىش مىقدارى كۆرۈنەرلىك بولدى، بۇ جەرياندا جەمئىي 1461 ئاپتوموبىل سېتىلىپ، سېتىلىش مىقدارىدا يېڭى يۇقىرى پەللە يارىتىلدى.
يېڭى مەنزىرە بەرپا قىلىندى
ئىستېمالنىڭ يېڭى ھاياتىي كۈچى ئۇرغۇتۇلدى
ھازىر، تىيانشاننىڭ جەنۇبى ۋە شىمالىدا ئۆرۈك چېچىكى، نەشپۈت چېچىكى كەينى ـ كەينىدىن ئېچىلىپ، نۇرغۇن ساياھەتچىنى جەلپ قىلدى.
مېيتۇەننىڭ سانلىق مەلۇماتىدا كۆرسىتىلىشىچە، يېقىنقى ئىككى ھەپتىدە، شىنجاڭدىكى مەنزىرە نۇقتىلىرىنىڭ بېلەت زاكاز مىقدارى بۇلتۇرقى ئوخشاش مەزگىلدىكىدىن %147 ئاشقان، بۇ، شىنجاڭدىكى يەرلىك ساياھەتچىلەر مەنبەسىدىن باشقا، يەنە گۇاڭدۇڭ، بېيجىڭ، خېنەن، سىچۇەن، جېجياڭ قاتارلىق جايلاردىكى ساياھەتچىلەر مەنبەسىنىمۇ ئۆز ئىچىگە ئالىدىكەن.
مول مەزمۇنلۇق، رەڭدار مەدەنىيەت ئىستېمالى تېخىمۇ كۆپ دىققەت ـ ئېتىبارغا ئېرىشىشكە باشلىدى. مودا ئېقىم مەدەنىيىتى بىلەن ئەنئەنىۋى مەدەنىيەت يۇغۇرۇلۇپ، ئىستېمالنىڭ يېڭى ھاياتىي كۈچى ئۇرغۇتۇلدى.
يېقىندا، ئۈرۈمچى شەھەرلىك سەنئەت تىياتىرخانىسى مېيمېي مال سېتىۋېلىش مەركىزىدە شەھەر ئاھالىلىرىگە بىر مەيدان سىمفونىيە كېچىلىكى تەقدىم قىلىپ، شەھەر ئاھالىلىرىگە ئېسىل سەنئەتنى يېقىن ئارىلىقتىن ھېس قىلدۇردى. 3 ـ ئاينىڭ 18 ـ كۈنى، ئۈرۈمچى شەھەرلىك مەدەنىيەت ۋە ساياھەت ئىدارىسى (مەدەنىيەت يادىكارلىقلىرى ئىدارىسى) پۈتۈن شەھەردىكى يەتتە رايون، بىر ناھىيەدە «مەدەنىيەت ـ ساياھەت ئارقىلىق ئىستېمالنى ئىلگىرى سۈرۈش، ئېسىل سەنئەت نومۇرلىرى سىزنى كۈتمەكتە» يۈرۈشلۈك ئويۇن قويۇش پائالىيىتىنى ماس قەدەمدە باشلىدى، ئۈرۈمچى شەھىرىدىكى ھەرقايسى سەنئەت ئۆمەكلىرىدىن كەلگەن كەسپىي ئارتىسلار ھەم ھەرقايسى رايون، ناھىيەلەردىكى ئەدەبىيات ـ سەنئەت ئۆمەكلىرى، پۈتۈن شەھەردىكى ھەرقايسى مەنزىرە رايونلىرى، چوڭ تىپتىكى سودا ساراي، تاللا بازارلىرى قاتارلىقلارغا چوڭقۇر چۆكۈپ، شەھەر ئاھالىلىرىگە 60 مەيداندىن ئارتۇق ئېسىل ئەدەبىيات ـ سەنئەت نومۇرلىرىنى تەقدىم قىلدى.
ئۈرۈمچى شەھەرلىك جىڭجۈ تىياتىرى ئۆمىكى پارتىيە ياچېيكىسىنىڭ شۇجىسى، ئۈرۈمچى شەھەرلىك مەدەنىيەت ۋە ساياھەت ئىدارىسى (شەھەرلىك مەدەنىيەت يادىكارلىقلىرى ئىدارىسى) سەنئەت بۆلۈمىنىڭ بۆلۈم باشلىقى گو يۇڭخۇڭ مۇنداق تونۇشتۇردى: بۇ بىر قاتار پائالىيەتلەرنىڭ قانات يايدۇرۇلۇشى ئىستېمال مۇھىتىنى ياخشىلاپ، مەدەنىيەت ـ ساياھەت ئىستېمالىنىڭ ئومۇميۈزلۈك جانلىنىشىغا تۈرتكە بولۇش ئۈچۈندۇر.
ئىستېمال بازىرىنىڭ سىجىل ئەسلىگە كېلىشىگە ئەگىشىپ، قانغۇچە ئويناش، دالىدا قونۇش قاتارلىق يېڭىچە ئىستېماللارمۇ ياشلارنىڭ ياقتۇرۇشىغا ئېرىشتى.
كەچ كىرىشى بىلەن ئۈرۈمچى شەھىرىنىڭ شىمىگۇ رايونىغا جايلاشقان نەنخۇ قايناق ھايات يارىتىش پائالىيەت مەركىزى قاينام تاشقىنلىققا چۆمدى. كۆڭۈل ئېچىش، ئىستىراھەت، يېمەك ـ ئىچمەك بىر گەۋدە قىلىنغان باغچە رايونىدا «بىرەر ئورۇن تېپىشمۇ تەس بولۇش» دائىملىق ھالەتكە ئايلاندى.
بۇ مەركەزنىڭ تىجارىتىنى باشقۇرغۇچى تەرەپ ئۈرۈمچى نەنخۇ چۇاڭزاۋ تەنتەربىيە ـ مەدەنىيەت تەرەققىيات چەكلىك شىركىتىنىڭ باش دىرېكتورى ۋاڭ جياۋېي مۇنداق تونۇشتۇردى: باغچە رايونىدا ئادەتتە ساياھەتچىلەر 3000 ـ 4000غا، ھەپتە ئاخىرىدا 5000 ـ 6000 غا يېتىدۇ.
توردا ئىستېمال قىلىش ئېھتىياجى سىجىل قويۇپ بېرىلدى. ئالدىنقى ئىككى ئايدا شىنجاڭدا تور سودا سوممىسى 47 مىليارد 60 مىليون يۈەنگە يېتىپ، بۇلتۇرقى ئوخشاش مەزگىلدىكىدىن %16.72 ئاشتى؛ توردا پارچە سېتىش سوممىسى 10 مىليارد 727 مىليون يۈەنگە يېتىپ، بۇلتۇرقى ئوخشاش مەزگىلدىكىدىن %18.2 ئاشتى.
مېيتۇەننىڭ تېز سېتىۋېلىش سانلىق مەلۇماتىدا كۆرسىتىلىشىچە، بۇ يىل 3 ـ ئايدا، شىنجاڭ مېيتۇەننىڭ تېز سېتىۋېلىش زاكاز مىقدارى بۇلتۇرقى ئوخشاش مەزگىلدىكىدىن %40كە يېقىن ئاشقان، ئۇنىڭدىكى قۇلاي تاللا بازاردا، گۈل ـ گىياھ، يېشىل ئۆسۈملۈك، مېۋە ـ چېۋە، يېمەكلىك تۈرىدىكى تاۋارلار ئىستېمالچىلارنىڭ ئەڭ قارشى ئېلىشىغا ئېرىشكەن، كىيىم ـ كېچەك، ئاياغ، باش كىيىم، ئەرمەك ھايۋانلارنىڭ سېتىلىش مىقدارى ئەڭ تېز ئاشقان بولۇپ، بۇلتۇرقى ئوخشاش مەزگىلدىكىدىن ئايرىم ـ ئايرىم %508 ۋە %126 ئاشقان.
خې گوچىڭ مۇنداق بىلدۈردى: بۇ يىل ئاپتونوم رايونىمىز يەنە ئىستېمالنى ئىلگىرى سۈرۈش سۇپىسى بەرپا قىلىپ، ناھىيە سودا سىستېمىسى قۇرۇلۇشىنى كۈچەيتىپ، كېچىلىك ئىقتىساد توپلاشقان رايون قۇرۇلۇشىغا تۈرتكە بولۇپ، ئىستېمال كەسىپ ھالىتىنى مۇكەممەللەشتۈرۈپ، بىر پونكىت شەكلىدىكى ئۇنىۋېرسال ئىستېمال سۇپىسى بەرپا قىلىپ، ئىستېمال يېڭى ئەندىزىسى، يېڭى كۆرۈنۈشىنى پائال كىرگۈزۈپ، تېخىمۇ كۆپ ئىستېمال قىزىق نۇقتىسى ۋە يارقىن نۇقتىلارنىڭ بارلىققا كېلىشىنى ئىلگىرى سۈرىدۇ.
