گېزىتىمىز ئۈرۈمچى 4 ـ ئاينىڭ 2 ـ كۈنى خەۋىرى ئانار بۇلۇت\شىنجاڭ گېزىتى مۇخبىرى لى ياڭ خەۋەر قىلىدۇ: يېقىندا، ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، ئاپتونوم رايوننىڭ رەئىسى ئەركىن تۇنىياز جۇڭگو پەنلەر ئاكادېمىيەسى شىنجاڭ فىزىكا ـ خىمىيە تېخنىكا تەتقىقات ئورنىدا تەكشۈرۈپ تەتقىق قىلغاندا مۇنداق تەكىتلىدى: پارتىيە 20 ـ قۇرۇلتىيى روھىنى چوڭقۇر ئۆگىنىپ، ئىزچىللاشتۇرۇپ، باش شۇجى شى جىنپىڭنىڭ پەن ـ تېخنىكىدا يېڭىلىق يارىتىش توغرىسىدىكى مۇھىم بايانلىرىنى ئىزچىللاشتۇرۇپ، ئەمەلىيلەشتۈرۈپ، دۆلەتنىڭ ئىستراتېگىيەلىك ئېھتىياجى ۋە ئاپتونوم رايوننىڭ مۇھىم، زور ئېھتىياجىغا تەشەببۇسكارلىق بىلەن مۇلازىمەت قىلىپ، يۇقىرى سەۋىيەلىك پەن ـ تېخنىكىدا ئۆزىگە تايىنىش، ئۆزىنى قۇدرەت تاپقۇزۇشنى تېز ئىشقا ئاشۇرۇپ، بىر تۈركۈم «گالنى بوغىدىغان» ئاچقۇچلۇق يادرولۇق تېخنىكىلاردا جاسارەت بىلەن ئۆتكەلنى بۆسۈپ ئۆتۈپ، شىنجاڭنىڭ يۇقىرى سۈپەتلىك تەرەققىياتىنى كۈچلۈك پەن ـ تېخنىكا تىرىكى بىلەن تەمىنلەش كېرەك.
جۇڭگو پەنلەر ئاكادېمىيەسى شىنجاڭ فىزىكا ـ خىمىيە تېخنىكا تەتقىقات ئورنى ئەسلىدىكى جۇڭگو پەنلەر ئاكادېمىيەسى شىنجاڭ فىزىكا تەتقىقات ئورنى ۋە ئەسلىدىكى جۇڭگو پەنلەر ئاكادېمىيەسى شىنجاڭ خىمىيە تەتقىقات ئورنى ئاساسىدا بىرلەشتۈرۈلۈپ قۇرۇلغان بولۇپ، يېقىنقى يىللاردىن بۇيان كىرىستال ماتېرىيال، بىيو تېببىي دورا، ئۇچۇر تېخنىكىسى، ئىسسىقلىققا سەزگۈر قارشىلىق، قاتتىق جىسىم رادىياتسىيە فىزىكىسى قاتارلىق تەتقىقات ساھەسىدە ئالدىنقى قاتاردا تۇرۇش ئەۋزەللىكىنى شەكىللەندۈرۈپ، پەن ـ تېخنىكىدا يېڭىلىق يارىتىش ئىقتىدارىنى كۆرۈنەرلىك ئۆستۈرۈپ، شىنجاڭنىڭ ئىقتىساد، جەمئىيەت تەرەققىياتىغا مۇھىم تۆھپە قوشتى.
«ھازىر مۇتەخەسسىسلەردىن قانچە كىشى بار؟» «بۇ خىل كىرىستال ماتېرىيال قانداق تېخنىكا بوغما ھالىتىنى بۇزۇپ تاشلىدى؟» «شىنجاڭ تەتقىق قىلىپ ئاچقان خاس دورا قانچە تۈرگە يەتتى؟» ئەركىن تۇنىياز ئىلگىرى ـ كېيىن بولۇپ كىرىستال ماتېرىيال تەتقىقات مەركىزى، بايلىق خىمىيەسى تەتقىقات ئىشخانىسى، پەن ـ تېخنىكا نەتىجىلىرى كۆرگەزمە زالىنى ئېكسكۇرسىيە قىلىپ، ئىختىساسلىقلار قوشۇنى ئەھۋالى، پەن تەتقىقات نەتىجىلىرىنى ئايلاندۇرۇش، شىنجاڭنىڭ تەرەققىياتىغا مۇلازىمەت قىلىشقا ئالاقىدار ئەھۋاللارنى تەپسىلىي ئىگىلەپ، ياش پەن تەتقىقات خادىملىرى بىلەن يۈزتۇرا پىكىر ئالماشتۇرۇپ، ئۇلارنىڭ ئەمەلىي ئىلتىماس ـ تەلەپلىرىنى ئىگىلەپ، پىكىر ـ تەكلىپلىرىنى ئاڭلىدى. ئۇ مۇنداق كۆرسەتتى: ھازىر شىنجاڭ يۇقىرى سۈپەتلىك تەرەققىياتنىڭ مۇھىم ئىستراتېگىيەلىك پۇرسەت مەزگىلىنى كۈتۈۋالدى، يۇقىرى سەۋىيەلىك پەن ـ تېخنىكىدا ئۆزىگە تايىنىش، ئۆزىنى قۇدرەت تاپقۇزۇشنى تېز ئىشقا ئاشۇرۇش يۇقىرى سۈپەتلىك تەرەققىياتقا تۈرتكە بولۇشتىكى مۇقەررەر يول. جۇڭگو پەنلەر ئاكادېمىيەسى شىنجاڭ فىزىكا ـ خىمىيە تېخنىكا تەتقىقات ئورنى شىنجاڭنىڭ پەن تەتقىقات ئاپپاراتلىرى ئىچىدىكى «دۆلەت كوماندىسى» بولۇپ، باشلامچىلىق رولىنى ياخشى جارى قىلدۇرۇپ، شىنجاڭنىڭ تەرەققىيات ئېھتىياجى، ئۆزىنىڭ تېخنىكا جەھەتتىكى ئارتۇقچىلىقىنى چۆرىدەپ، دىققەتنى نېفىت ـ تەبىئىي گاز، كۆمۈر، قېزىلما بايلىق، ئاشلىق، پاختا، مېۋە ـ چېۋە، كۆكتات قاتارلىق خاس ئەۋزەل كەسىپلەر ۋە يېڭى ئېنېرگىيە، يېڭى ماتېرىيال، رەقەملىك ئىقتىساد، ئاقىل يېزا ئىگىلىكى قاتارلىق ئالدىنقى قاتاردىكى ساھەلەرگە مەركەزلەشتۈرۈپ، قېتىرقىنىپ پەن ـ تېخنىكا ئۆتكىلىگە ھۇجۇم قىلىپ، ئاچقۇچلۇق، يادرولۇق تېخنىكا ئۆتكىلىگە ھۇجۇم قىلىش جېڭىدە قەتئىي غەلىبە قىلىشى كېرەك.
ئەركىن تۇنىياز تەكشۈرۈپ تەتقىق قىلغاندا مۇنداق تەكىتلىدى: شىنجاڭنىڭ يۇقىرى سۈپەتلىك تەرەققىياتىنى پۇختا ئالغا سىلجىتىپ، سوتسىيالىستىك زامانىۋىلاشقان دۆلەت قۇرۇش مۇساپىسىدە تېخىمۇ كۆپ شىنجاڭ تۆھپىسىنى قوشۇشقا ھەقىقىي كاپالەتلىك قىلىشنىڭ ئاچقۇچى پەن ـ تېخنىكىدا يېڭىلىق يارىتىش ۋە ئىختىساسلىقلاردا. سىياسىي يۈكسەكلىكنى ھەقىقىي ئۆستۈرۈپ، پەن ـ تېخنىكا بىرىنچى ئىشلەپچىقىرىش كۈچى، ئىختىساسلىقلار بىرىنچى بايلىق، يېڭىلىق يارىتىش بىرىنچى ھەرىكەتلەندۈرگۈچى كۈچ بولۇشتا باشتىن ـ ئاخىر چىڭ تۇرۇپ، يېڭىلىق يارىتىش ئارقىلىق تەرەققىياتقا تۈرتكە بولۇش يولىدا قەتئىي تەۋرەنمەي مېڭىش كېرەك. تۈرلۈك تېخنىكىلاردا يېڭىلىق يارىتىش ئۆتكىلىگە ھۇجۇم قىلىش سالمىقىنى زورايتىپ، يېڭىلىق يارىتىش زەنجىرى، كەسىپ زەنجىرىنىڭ چوڭقۇر يۇغۇرۇلۇشىغا تۈرتكە بولۇش كېرەك. دۆلەت دەرىجىلىك يېڭىلىق يارىتىش سۇپىسىنى يېتىلدۈرۈپ قۇرۇپ، دۆلەت تەجرىبىخانىسىنىڭ شىنجاڭدا يېڭىلىق يارىتىش بازىسى تەسىس قىلىشى، مەملىكەت بويىچە نۇقتىلىق تەجرىبىخانىلارنى شىنجاڭدا ئورۇنلاشتۇرۇش، قۇرۇشنى تېز ئالغا سىلجىتىپ، پەن ـ تېخنىكىنىڭ ئىستراتېگىيەلىك تىرەكلىك كۈچىنى كۈچەيتىش كېرەك. پەن ـ تېخنىكىدا يېڭىلىق يارىتىش تۈزۈلمە ـ مېخانىزمى ئىسلاھاتىنى چوڭقۇرلاشتۇرۇپ، پەن ـ تېخنىكا نەتىجىلىرىنى ئايلاندۇرۇشقا تىرەك بولۇش مۇلازىمىتىنى كۈچەيتىپ، تېخىمۇ كۆپ پەن ـ تېخنىكا نەتىجىلىرىنى ئەمەلىيلەشتۈرۈپ يىلتىز تارتقۇزۇش كېرەك. ئاپتونوم رايوننىڭ ئىختىساسلىقلار تەرەققىيات فوندى ۋە نۇقتىلىق ئىختىساسلىقلار قۇرۇلۇشىدىن تولۇق، ياخشى پايدىلىنىپ، ئىختىساسلىقلار «سىياسەت توپلانمىسى» بەرپا قىلىپ، ھازىر بار بولغان ئىختىساسلىقلارنى ھەقىقىي مۇقىملاشتۇرۇپ، جىددىي ئېھتىياجلىق ئىختىساسلىقلارنى يېتىشتۈرۈپ، باشلامچى ئىختىساسلىقلارنى جەلپ قىلىپ، ئىختىساسلىقلارنىڭ يېڭىلىق يارىتىش، ئىجاد قىلىش ھاياتىي كۈچىنى تولۇق ئۇرغۇتۇش كېرەك.
قەيسەر ئابدۇكېرىم تەكشۈرۈپ تەتقىق قىلىشقا قاتناشتى.
