ئانار بۇلۇت\شىنجاڭ گېزىتى مۇخبىرى جاڭ شياۋمىنىڭ تۇڭچېڭ ساياھەتچىلىكى سۇپىسىدىن ئىگىلىشىچە، 6 - ئاينىڭ ئوتتۇرىلىرىدىن بۇيان، شىنجاڭ ساياھەتچىلىكىنىڭ توردا ئىزدەش قىزغىنلىقى زەنجىرسىمان سېلىشتۇرغاندا ％78 ئاشقان، شىنجاڭدىكى مەنزىرە رايونلىرىنىڭ ئىشىك بېلىتىنىڭ زاكاز قىلىنىپ سېتىلىش مىقدارى زەنجىرسىمان سېلىشتۇرغاندا ％300 ئاشقان، ئايروپىلان بېلىتى، ساياھەت لىنىيەسى قاتارلىق مەھسۇلاتلارنىڭ سېتىلىش مىقدارى سىجىل ئاشقان.
تۇڭچېڭ ساياھەتچىلىك سۇپىسىدىكى سانلىق مەلۇماتتا كۆرسىتىلىشىچە، 6 - ئاينىڭ ئوتتۇرىلىرىدىن بۇيان، شىنجاڭغا ئايروپىلان بىلەن يولغا چىقىدىغان ئون چوڭ جاي ئايرىم - ئايرىم ھالدا خېنەن، شەنشى، سىچۇەن، گەنسۇ، چۇڭچىڭ، گۇاڭدۇڭ، جېجياڭ، جياڭسۇ، شەندۇڭ ۋە خۇبېي بولغان، بۇنىڭ ئىچىدە گۇاڭجوۋ، شېنجېن، نەنجىڭ، سۇجوۋ قاتارلىق جۇجياڭ دېلتىسى، چاڭجياڭ دېلتىسى رايونىدىكى شەھەرلەردىن شىنجاڭغا بارىدىغان ئايروپىلان بېلىتىنى زاكاز قىلىش مىقدارى كۆرۈنەرلىك ئاشقان. ئائىلە بويىچە ساياھەتكە چىققانلار، ئوقۇش پۈتكۈزۈش ساياھىتىگە چىققان ئوقۇغۇچىلار توپى شۇ پەسىللىك ساياھەت بازىرىنىڭ ئاساسىي كۈچى بولۇپ قالغان. 6 - ئاي كىرگەندىن بۇيان، «ئائىلىۋى ساياھەت»كە ئالاقىدار توردا ئىزدەش قىزغىنلىقىنىڭ ئېشىش نىسبىتى زەنجىرسىمان سېلىشتۇرغاندا ％100تىن ئاشقان، «ئوقۇش پۈتكۈزۈش ساياھىتى»نىڭ ％300كە يېقىن ئۆرلىگەن.
كۆل، ئوتلاق قاتارلىق تەبىئىي مەنزىرە تۈرىدىكى مەنزىرە رايونلىرى يەنىلا ساياھەتچىلەرنىڭ ئەڭ قارشى ئېلىشىغا ئېرىشتى. سانلىق مەلۇماتتا كۆرسىتىلىشىچە، بۇ يىل يازدا، شىنجاڭدىكى قىزىق نۇقتا مەنزىرە رايونلىرى ئىچىدە ئالدىنقى بەش ئورۇندا تۇرغىنى: سايرام كۆلى مەنزىرە رايونى، تىيانشان بوغدا كۆلى مەنزىرە رايونى، قاناس مەنزىرە رايونى، نارات مەنزىرە رايونى ۋە يالقۇنتاغ مەنزىرە رايونى ئىكەن. بۇنىڭدىن باشقا، مۇزېي، ئويۇن قويۇش، غەيرىي ماددىي مەدەنىيەت مىراسلىرى تەسىراتى قاتارلىق مەدەنىيەت تۈرىدىكى مەنزىرە نۇقتىلىرى ۋە پائالىيەتلەرگە دىققەت قىلىش دەرىجىسىمۇ سىجىل ئاشقان.
7 - ئاينىڭ 6 - كۈنى، سايرام كۆلى مەنزىرە رايونىدىكى ساياھەتچىلەرنىڭ سانى 22 مىڭدىن ئېشىپ، بۇ يىل كىرگەندىن بۇيانقى ئەڭ يۇقىرى سەۋىيە يارىتىلدى. بۇ مەنزىرە رايونىنىڭ 6 - ئايدىكى كۈندىلىك ئوتتۇرىچە ساياھەتچى سانى 13 مىڭدىن، 7 - ئايدىكىسى 16 مىڭدىن ئاشتى، بۇنىڭ ئىچىدە ％65ى شىنجاڭ سىرتىدىن كەلگەن ساياھەتچىلەر. چوڭ سانلىق مەلۇمات ئانالىزىغا ئاساسلانغاندا، مۆلچەرلىنىشىچە، 7 - ئاينىڭ 10 - كۈنى مەنزىرە رايونى ساياھەتچىلەر يۇقىرى پەللىسىنى كۈتۈۋالىدىكەن. سايرام كۆلى مەنزىرە رايونى باشقۇرۇش كومىتېتىنىڭ مۇئاۋىن مۇدىرى جياڭ خۇا مۇنداق دېدى: «بۇلتۇردىن بۇيان، مەنزىرە رايونىدا سەككىز ئاپتوموبىل توختىتىش مەيدانى ياساپ، 4000غا يېقىن ئاپتوموبىل توختىتىش ئورنىنى كۆپەيتتۇق؛ بۇ يىل سەيلە كېمىسى، پىيادە ئېكسپېدىتسىيە قىلىش، دىنامىكىلىق پاراشۇت قاتارلىق سۇ، قۇرۇقلۇق، ھاۋا پائالىيەتلىرىنى يولغا قويدۇق، 7 - ئايدا يەنە ئارقا - ئارقىدىن دالىدا قونۇش يىغىلىشى، تۇنجى نۆۋەتلىك تۆۋەن ھاۋا بوشلۇقىدا ئۇچۇش بايرىمى، ۋېلىسىپىتلىك كۆلنى ئايلىنىش مۇسابىقىسى، كۆلنى ئايلىنىپ مارافونچە يۈگۈرۈش قاتارلىق پائالىيەتلەرنى ئۆتكۈزۈپ، ساياھەت كەسىپ ھالىتىنى بېيىتىپ، ساياھەتچىلەرنىڭ تەسىرات دەرىجىسىنى ئاشۇرىمىز».
تۇڭچېڭ تەتقىقات يۇرتىنىڭ ئالىي تەتقىقاتچىسى جاڭ مىڭياڭ مۇنداق دېدى: «بۇ يىل شىنجاڭنىڭ ساياھەت مەھسۇلاتلىرىنىڭ موللۇق دەرىجىسى، مەھسۇلات سۈپىتى بىردەك يۇقىرى كۆتۈرۈلدى، نۇرغۇن ساياھەتچى ھەپتە ئاخىرىغا دەم ئېلىش ۋاقتىنى قوشۇپ، شىنجاڭغا بېرىپ سالقىنداپ دەم ئېلىشنى تاللىدى».
