ئانار بۇلۇت\شىنجاڭ گېزىتى مۇخبىرى ۋاڭ جىڭجىڭنىڭ شىنجاڭ تاغقا چىقىش جەمئىيىتىدىن ئىگىلىشىچە، 6 - ئاينىڭ ئوتتۇرىلىرىدىن 8 - ئاينىڭ ئوتتۇرىلىرىغىچە، ئاقتۇ ناھىيەسىگە جايلاشقان مۇزتاغ چوققىسى چوڭ لاگېرى مەملىكەت بويىچە تاغقا چىقىش ئەترەتلىرىنىڭ 300دىن ئارتۇق ئەزاسىنى كۈتۈۋالىدىكەن، ئىككى يىل ۋاقتىنچە توختىتىپ قويۇلغان مۇزتاغ چوققىسىغا چىقىش پائالىيىتى قايتىدىن باشلىنىدىكەن.
دېڭىز يۈزىدىن ئېگىزلىكى 7546 مېتىر كېلىدىغان مۇزتاغ چوققىسى گەرچە دېڭىز يۈزىدىن ناھايىتى ئېگىز بولسىمۇ، لېكىن تاغقا چىقىش تېخنىكىسىغا قويۇلىدىغان تەلەپنىڭ قىيىنلىق دەرىجىسى بىرقەدەر تۆۋەن، يېقىنلىشىش بىرقەدەر ئاسان بولۇپ، تاغقا چىقىش ھەۋەسكارلىرىنىڭ تۇنجى قېتىم 7000 مېتىر ئېگىزلىكتىكى تاغ چوققىسىغا چىقىشنى سىناپ بېقىشىدىكى ئەڭ ياخشى تاللىشى، شۇنداقلا دېڭىز يۈزىدىن ئېگىزلىكى 8000 مېتىردىن ئاشىدىغان تاغ چوققىسىغا جەڭ ئېلان قىلىشتىكى مۇقەررەر يول. دۆلىتىمىزنىڭ دېڭىز يۈزىدىن ئېگىزلىكى 7000 مېتىردىن ئاشىدىغان تاغ چوققىسىغا چىقىشنى تەكشۈرۈپ تەستىقلاش ھوقۇقى جۇڭگو تاغقا چىقىش جەمئىيىتىدە بولۇپ، بۇ قېتىم مۇزتاغ چوققىسىغا چىقىش ئېكسپېدىتسىيە پائالىيىتىگە قاتنىشىدىغان تۆت تاغقا چىقىش ئەترىتى يىل بېشىدىلا تەكشۈرۈپ تەستىقلاشنى تاماملىغان.
«ئارىدىن ئىككى يىل ئۆتۈپ، مۇزتاغ چوققىسىغا چىقىش قايتا باشلاندى، كۆپچىلىك ناھايىتى تەقەززا بولدى.» شىنجاڭ كەيتۇ ئېگىز تاغ دالا ھەرىكىتى چەكلىك مەسئۇلىيەت شىركىتىنىڭ مەسئۇلى لو بياۋ مۇنداق دېدى: بۇ قېتىمقى تاغقا چىقىش پائالىيىتىدىكى تۆت ئەترەتنىڭ بىرى بولۇش سۈپىتى بىلەن، كەيتۇ تاغقا چىقىش ئەترىتى 120 ئەزادىن تەشكىللەنگەن بولۇپ، ئۈچ تۈركۈمگە بۆلۈنۈپ مۇزتاغ چوققىسىغا چىقىدۇ، «ئەترەت ئەزالىرى پۈتۈن مەملىكەتنىڭ ھەرقايسى جايلىرىدىن كەلگەن، دەسلەپكى مەزگىلدىكى تەربىيەلەش تاماملاندى، 1 - تۈركۈمدىكى ئەترەت ئەزالىرى 6 - ئاينىڭ 16 - كۈنى يىغىلىپ بولىدۇ».
مۇخبىرنىڭ ئاپتونوم رايونلۇق تەنتەربىيە ئىدارىسى تاغقا چىقىش تەنھەرىكىتى مۇلازىمەت مەركىزىدىن ئىگىلىشىچە، بۇ قېتىمقى تاغقا چىقىش پائالىيىتىنىڭ بىخەتەر، تەرتىپلىك ئېلىپ بېرىلىشىغا كاپالەتلىك قىلىش ئۈچۈن، جۇڭگو تاغقا چىقىش جەمئىيىتى سەككىز كىشىدىن تەركىب تاپقان كەسپىي قۇتقۇزۇش - ياردەم بېرىش ئەترىتى ئەۋەتىپ، شىنجاڭ تاغقا چىقىش جەمئىيىتىنىڭ كەسپىي قۇتقۇزۇش - ياردەم بېرىش خادىملىرى بىلەن قول تۇتۇشۇپ، بۇ قېتىمقى تاغقا چىقىش پائالىيىتىنىڭ بىخەتەرلىكىنى ئورتاق قوغدايدىكەن. تاغقا چىقىش پائالىيىتى باشلىنىشتىن ئىلگىرى يەنە ھەرقايسى تاغقا چىقىش ئەترەتلىرىنىڭ مەسئۇللىرى، ئېگىز تاغ يول باشلىغۇچىلىرى، تاغقا چىقىش ئەترىتى ئەزالىرى ۋە ئارقا سەپ كاپالەت خادىملىرىنى تەشكىللەپ، ئېگىز تاغدىكى ئەخلەتلەرنى تۈرگە ئايرىپ بىر تەرەپ قىلىدىكەن ھەمدە مۇھىت قوغداش تەشەببۇسى ئېلان قىلىدىكەن.
مۇزتاغ چوققىسى چوڭ لاگېرى تۇرۇشلۇق ئاقتۇ ناھىيەسىمۇ تاغقا چىقىش ئەترىتى ئەزالىرىنى كۈتۈۋېلىشقا ياخشى تەييارلىق قىلدى. «بىز چارۋىچىلارنى تۆگە بورداشقا تەشكىللىدۇق، تاغقا چىقىش ئەترىتى ئەزالىرى كەلگەندىن كېيىن، بىز تۆگە بىلەن تاغقا چىقىش ماددىي ئەشيالىرىنى توشۇش، تاغقا چىقىش ئەخلەتلىرىنى تازىلاپ قايتۇرۇپ چۈشۈش، ماددىي ئەشيالارنى تەقسىملەش - يەتكۈزۈش قاتارلىق خىزمەتلەرنى قانات يايدۇرىمىز.» قىزىلسۇ قىرغىز ئاپتونوم ئوبلاستلىق تاغقا چىقىش ۋە تاغقا چىقىش بويىچە مۇھىت قوغداش جەمئىيىتىنىڭ جەمئىيەت باشلىقى ۋۇ ۋېي مۇنداق دېدى: بىز چارۋىچىلارغا قارىتا دالا ماھارىتى، دالا بىخەتەرلىكى تەربىيەسى ۋە دالا مۇھىت قوغداش لېكسىيەسىنى قانات يايدۇردۇق، چارۋىچىلارنىڭ تاغقا چىقىش پائالىيىتىگە بىخەتەر قاتنىشىشىغا ھەقىقىي كاپالەتلىك قىلىپ، چارۋىچىلارنىڭ كىرىمىنى ئاشۇرۇشىغا كۈچ قوشىمىز.
ئىگىلىنىشىچە، بۇ يىلقى مۇزتاغ چوققىسىغا چىقىش پائالىيىتىدە، ئاپتونوم رايونلۇق تەنتەربىيە ئىدارىسى كۆپ تۈرلۈك ئالدىنقى قارارلىق تەكشۈرۈش خىزمىتىنى قانات يايدۇرۇپ، كېلەر يىلقى مۇزتاغ چوققىسىغا چىقىش پەسلى ئۈچۈن تەييارلىق قىلىدىكەن. كېلەر يىلى تاغقا چىقىش پائالىيىتىدىن باشقا يەنە ئېگىزلىكتە قار تېيىلىش، ياشلار، ئۆسمۈرلەر تەتقىقات - ئۆگىنىش ۋە دېڭىز يۈزىدىن 4400 مېتىر ئېگىزلىكتە پىيادە كېسىپ ئۆتۈش پائالىيىتى ئۆتكۈزۈلىدىكەن.
مۇزتاغ چوققىسى بىرقەدەر تەكشى يانتۇلۇققا ئىگە، قار سۈپىتى ياخشى، كۆرۈش دائىرىسى كەڭ بولۇپ، دۆلەت ئىچى - سىرتىدىكى تاغقا چىقىش، قار تېيىلىش ساھەسىدە داڭقى بار. 2015 - يىلىدىن باشلاپ، مۇزتاغ چوققىسىغا چىققۇچىلارنىڭ سانى شىددەت بىلەن ئاشتى. 2018 - يىلى تاغقا چىققۇچىلار ئومۇمىي سانى 300 ئادەم قېتىمدىن ئاشتى، كېلەر يىلى 500 ئادەم قېتىمدىن كۆپرەككە يېتىدىغانلىقى مۆلچەرلەندى.
