□شىن شىجيەن
شاڭخەي كارخانىلىرى يەكەن ناھىيەسىدە يېتىشتۈرگەن «ئالماس كەسىپ» جەنۇبىي شىنجاڭ يېڭى ماتېرىيال كەسپىنىڭ «تاجىسى»دا چاقنىدى؛ شېنجېن ياردەم بېرىپ قۇرغان پۇتبول مەشىق بازىسى قەشقەردىكى ياش - ئۆسمۈرلەرنىڭ يېشىل چىم ئارزۇسىنى رېئاللىققا ئايلاندۇردى؛ فۇجيەن داۋالاش مۇتەخەسسىسلىرى سانجى خۇيزۇ ئاپتونوم ئوبلاستىدا قۇرغان سەكتە مەركىزىنىڭ قۇتقۇزۇش - داۋالاش ئۈنۈمى شەرقىي قىسىمدىكى تەرەققىي تاپقان رايونلار بىلەن تەڭ ئورۇنغا ئۆتتى... ئالتۇن كۈز پەسلىدە، شىنجاڭ مېۋە - چېۋىلەر مەي باغلاپ پىشقان خۇشاللىقتىن بەھرىلىنىپلا قالماي، تېخىمۇ مۇھىمى، شىنجاڭغا نىشانلىق ياردەم بېرىش چىن ھېسسىيات ۋە جاپالىق ئەجىر بىلەن سۇغارغان تەرەققىيات مول نەتىجىلىرىگە ئېرىشتى.
يېقىندا، ئاپتونوم رايونلۇق پارتىيە كومىتېتى تەشۋىقات بۆلۈمى تەشكىللەپ قانات يايدۇرغان «شىنجاڭغا نىشانلىق ياردەم بېرىش تىيانشاندا مەۋج ئۇردى» باش تېمىلىق زىيارەت پائالىيىتى باشلىنىپ، شەكلى يېڭى، مەزمۇنى مۇكەممەل بولغان بىر تۈركۈم پۈتۈن تاراتقۇ خەۋەرلىرى ئارقا - ئارقىدىن ئوتتۇرىغا چىقىرىلىپ، شىنجاڭغا نىشانلىق ياردەم بېرىش خىزمىتىدىكى مول نەتىجىلەرنى جانلىق نامايان قىلىپ بەردى. پامىر ئېگىزلىكىدىن جۇڭغار ئويمانلىقىغىچە، تارىم دەرياسى بويىدىن ئالتاي تېغى ئېتىكىگىچە بولغان بۈگۈنكى شىنجاڭدىن ئىبارەت بۇ بىپايان تۇپراقتىكى ھەربىر تەرەققىيات ئىزناسىغا شىنجاڭغا نىشانلىق ياردەم بېرىشتىكى چوڭقۇر دوستلۇق سىڭگەن بولۇپ، تاغ - دەريالاردىن ھالقىغان بۇ چوڭقۇر مېھىر - مۇھەببەتنى شىنجاڭدىكى ھەر مىللەت خەلق مەڭگۈ ئېسىدە ساقلايدۇ.
مىڭ گەز ئېگىزلىكتىكى دەرەخمۇ يىلتىزىدىن ئايرىلالمايدۇ، تۈمەن چاقىرىملىق دەريانىڭمۇ مەنبەسى بولىدۇ. پارتىيە 18 - قۇرۇلتىيىدىن بۇيان، يولداش شى جىنپىڭ يادرولۇقىدىكى پارتىيە مەركىزىي كومىتېتى شىنجاڭ خىزمىتىنى ئىستراتېگىيەلىك ئومۇملۇق يۈكسەكلىكىدىن پىلانلاپ، پۈتۈن پارتىيەنىڭ ئەقىل - پاراسىتىنى مۇجەسسەملەپ، پۈتۈن مەملىكەتنىڭ كۈچىنى سەپەرۋەر قىلىپ، شىنجاڭغا نىشانلىق ياردەم بېرىش خىزمىتىنى چوڭقۇر ئالغا سىلجىتتى، سېلىنغان مەبلەغنىڭ زورلۇقى، قاتناشقان ئادەملەرنىڭ كۆپلۈكى، قاپلاش دائىرىسىنىڭ كەڭلىكى، قولغا كەلتۈرۈلگەن نەتىجىلەرنىڭ زورلۇقى مىسلىسىز بولدى. دەل يولداش شى جىنپىڭ يادرولۇقىدىكى پارتىيە مەركىزىي كومىتېتىنىڭ كۈچلۈك رەھبەرلىكى، ۋەتەن چوڭ ئائىلىسىنىڭ ئىللىق غەمخورلۇقى، شىنجاڭغا ياردەم بېرىش كۈچلىرىنىڭ خالىس تۆھپە قوشۇشى بولغاچقا، بولۇپمۇ شىنجاڭغا ياردەم بەرگىلى كەلگەن تۈركۈم - تۈركۈم كادىرلار، ئىختىساسلىقلارنىڭ كەسپىي بىلىم، ئىلغار ئىدىيە ۋە مول تەجرىبىلەرنى ئېلىپ، شىنجاڭدىكى ھەر مىللەت ئامما ئويلىغاننى ئويلاپ، ئامما بىلەن بىللە ئىشلىشى بولغاچقا، بۈگۈنكى شىنجاڭدا ئۈچ تاغ، ئىككى ئويمانلىق كۈنسېرى يېڭىلانغان، ئانارگۈللىرى ئالاھىدە چىرايلىق ئېچىلغان گۈزەل مەنزىرە بارلىققا كەلدى.
بىر خىل كۈچ بار، قەتئىيلىكى بىلەن تاغ - دەريانى تەۋرىتىدۇ؛ بىر خىل ئېتىقاد بار، مۇستەھكەملىكى بىلەن زاماننى يېرىپ ئۆتىدۇ. 2024 - يىلى شىنجاڭنىڭ رايون ئىشلەپچىقىرىش ئومۇمىي قىممىتى 2 تىرىليون يۈەندىن ئېشىپ، كۈچلۈك تەرەققىيات ئەۋرىشىملىكىنى نامايان قىلدى. كەلگۈسىدە، شىنجاڭ قانداق قىلغاندا ۋەزىيەتكە تايىنىپ ئالغا ئىلگىرىلەپ، جۇڭگوچە زامانىۋىلاشتۇرۇش يېڭى مۇساپىسىدە سەپتىن چۈشۈپ قالمايدۇ؟ مەسىلىنى ھەل قىلىشنىڭ مۇھىم نۇقتىسى ھەم ئۆزىنىڭ قەتئىي ئىرادىسى بىلەن ئىلگىرىلىشىدىن، ھەم كۆپ تەرەپنىڭ بىرىكمە كۈچ تەشكىللەپ قوللىشىدىن ئايرىلالمايدۇ. دەل مۇشۇ پەيتتە، 10 - قېتىملىق مەملىكەتلىك شىنجاڭغا نىشانلىق ياردەم بېرىش خىزمىتى يىغىنى ئېچىلىپ، نەتىجىلەر خۇلاسىلەندى، ۋەزىيەت تەھلىل قىلىندى، كېيىنكى قەدەمدىكى شىنجاڭغا نىشانلىق ياردەم بېرىش خىزمىتى ۋەزىپىسى پىلانلاندى، ئورۇنلاشتۇرما قىلىندى، «شىنجاڭغا نىشانلىق ياردەم بېرىش خىزمىتىنى بوشاشماي تىرىشىپ ياخشى ئىشلەش» سەپەرۋەرلىك بۇيرۇقى چىقىرىلدى. ئۇزاققىچە داۋاملىشىدىغان شىنجاڭغا ياردەم بېرىدىغان بۇ دوستلۇق قەلبلەرنى ئىللىتىدۇ، كىشىلەرنى جاسارەت بىلەن ئىلگىرىلەشكە ئۈندەيدۇ، مۇقەررەركى شىنجاڭغا نىشانلىق ياردەم بېرىش خىزمىتىنىڭ تىيانشاننىڭ جەنۇبى - شىمالىدا يەنە مول نەتىجىلەرنى قولغا كەلتۈرۈشىگە تۈرتكە بولۇپ، شىنجاڭنىڭ تەرەققىيات ئۇلىنى يەنىمۇ پۇختىلايدۇ.
ھەرىكەت ئەڭ جاراڭلىق قەسەم، ئەمەلىيلەشتۈرۈش ئەڭ تەسىرلىك مەسئۇلىيەتچانلىق. 10 - قېتىملىق مەملىكەتلىك شىنجاڭغا نىشانلىق ياردەم بېرىش خىزمىتى يىغىنى ئېچىلغاندىن كېيىن، شىنجاڭغا ياردەم بېرىۋاتقان ھەرقايسى ئۆلكە، بىۋاسىتە قاراشلىق شەھەرلەر تېزدىن ھەرىكەتكە كېلىپ، سىياسەتنى ئۇدۇللاشتۇرۇش، نەتىجىلەرنى نامايان قىلىش، تۈرلەردە كېلىشىم ئىمزالاش قاتارلىق ئۇسۇللار ئارقىلىق، تىيانشاننىڭ جەنۇبى - شىمالىدا كەسىپلەرنى ئۇدۇللاشتۇرۇش دولقۇنىنى قوزغىدى. يېقىندا مۇۋەپپەقىيەتلىك ئۆتكۈزۈلگەن ئاپتونوم رايوننىڭ تۇنجى مەيدان شىنجاڭغا كەسىپ ئارقىلىق ياردەم بېرىش بويىچە مەركەزلىك تونۇشتۇرۇش پائالىيىتىدە، كېلىشىم ئىمزالانغان تۈرلۈك مەبلەغ سېلىش تۈرلىرى ھەم ھەمكارلىق كېلىشىمى ھاسىل قىلىنغانلىرى (بىڭتۇەننىمۇ ئۆز ئىچىگە ئالىدۇ) جەمئىي 126 تۈر بولۇپ، كېلىشىمدىكى سومما 73 مىليارد 500 مىليون يۈەن بولدى، بۇ، يېڭى ماتېرىيال، يېڭى ئېنېرگىيە، توقۇمىچىلىق، كىيىم - كېچەك، مەدەنىيەت - ساياھەت قاتارلىق 14 كەسىپ، ساھەگە مۇناسىۋەتلىك. يۇقىرى ئۈنۈملۈك، ئەمەلىي بولغان ھەرىكەت جەزمەن شىنجاڭنىڭ جۇڭگوچە زامانىۋىلاشتۇرۇشتىكى ئۇلۇغۋار مەنزىرىسىدە تېخىمۇ گۈزەل سەھىپە پۈتۈشىگە كۈچ قوشىدۇ.
چوڭقۇر مېھىر - مۇھەببەت قەلىمى ئارقىلىق شىنجاڭنىڭ سۈرەتتەك گۈزەل تاغلىرى سىزىپ چىقىلدى. شىنجاڭدىكى ھەر مىللەت خەلق تاغ - دەريالار ھالقىغان بۇ خالىس تۆھپە قوشۇشنى مەڭگۈ ئېسىدە ساقلايدۇ، شۇنداقلا چوڭقۇر مىننەتدارلىقنى مەزمۇت ئالغا ئىلگىرىلەشنىڭ كۈچلۈك ھەرىكەتلەندۈرگۈچى كۈچىگە ئايلاندۇرۇپ، قەلب ۋە كۈچنى مۇجەسسەملەپ، جاسارەت بىلەن كۈرەش قىلىپ، تىرىشىپ تېخىمۇ نادىر جۇڭگوچە زامانىۋىلاشتۇرۇشنىڭ شىنجاڭ سەھىپىسىنى پۈتۈپ چىقىدۇ.
