− چەت ئەل تاراتقۇ ئۆمىكى جۇڭگو قار - مۇز شەھىرىنىڭ جەلپكارلىقىنى ھېس قىلدى
ئانار بۇلۇت\شىنجاڭ گېزىتى مۇخبىرلىرى سۇڭ خەيبو، ئارمان رازاق
12 - ئاينىڭ 5 - كۈنى، «ئوتتۇرا ئاسىيا + رۇسىيە تاراتقۇ زىيارەت ئۆمىكى» ئارقا - ئارقىدىن جۇڭگو شىنجاڭ ئالتاي شەھىرى جياڭجۈنشەن تېغى خەلقئارا قار تېيىلىش ئىستىراھەت رايونى، ۋۇبەيلى مەنزىرە كوچىسىدىكى ياقۇت رەسىم خىزمەت ئىشخانىسىنى زىيارەت قىلىپ، شۆدۇ مەھەللىسىدە دومبىرادا ئورۇنلانغان نومۇرلارنى كۆرۈپ، ئالتاينىڭ تەبىئىي مەنزىرىسى ۋە مەدەنىيەت ئالاھىدىلىكىنى چوڭقۇر ئىگىلەپ، قار - مۇز شەھىرىنىڭ جەلپكارلىقىنى ھېس قىلدى.
تاراتقۇ زىيارەت ئۆمىكىدىكىلەر ئالدى بىلەن مەملىكەت بويىچە بىردىنبىر شەھەر بىلەن تۇتىشىدىغان ئېگىز تاغ قار تېيىلىش مەيدانى − جياڭجۈنشەن تېغى قار تېيىلىش مەيدانىغا كەلدى، بۇ يەردە نەچچە ئون قار تېيىلىش يولى تەسىس قىلىنغان بولۇپ، مۇكەممەل ئۇل ئەسلىھە ۋە ئىلغار قار تېيىلىش ئۈسكۈنىلىرى بار ئىدى. تاراتقۇ زىيارەت ئۆمىكىنىڭ ئەزالىرى قار تېيىلىش خۇشاللىقىنى ھېس قىلغاندىن باشقا، يەنە قەدىمىي تېرە چاڭغىدا قار تېيىلىش ئويۇن قويۇش كوماندىسىنىڭ ئويۇنىدىن ھۇزۇرلاندى. قازاقىستان «بۈگۈنكى يىپەك يولى گېزىتى»نىڭ رۇس تىل - يېزىقى مۇھەررىرى راۋال بۇدۇكوف مۇنداق دېدى: «تېرە چاڭغىدا قار تېيىلىش بىر تۈرلۈك تەنھەرىكەت بولۇپلا قالماي، يەنە بىر خىل مەدەنىيەتكە ۋارىسلىق قىلىشتۇر. كوماندا ئەزالىرىنىڭ ئۇچىسىدىكى تېرە كىيىم ۋە قار تېيىلىش ماھارىتى ئۇلارنىڭ بۇ تەنھەرىكەتكە بولغان قىزغىن مۇھەببىتى ۋە ھۆرمىتىنى نامايان قىلدى».
«مېنىڭ جۇڭگو شىنجاڭغا تۇنجى قېتىم كېلىشىم، بۇ يەرنىڭ قار - مۇز ساياھىتىنىڭ بۇنچىلىك قىزىپ كەتكەنلىكىنى ئويلاپ باقماپتىكەنمەن، قار تېيىلىش مەيدانىنىڭ قۇرۇلۇشى ئىنتايىن ئىلغار، بېلەت باھاسى ئەرزان، مۇلازىمىتى ئەتراپلىق ئىكەن.» ئۆزبېكىستان دۆلەت تېلېۋىزىيە ئىستانسىسىدىن كەلگەن مۇخبىر رەھىمەتىلا قۇدرەتوف مۇنداق دېدى: ئالتاينىڭ قار - مۇز بايلىقى ۋە ساياھەت كەسپىگە بولغان تەسىراتىم چوڭقۇر بولدى، دۆلىتىمگە قايتقاندىن كېيىن، خىزمەتداشلىرىم ۋە دوستلىرىمغا شىنجاڭنىڭ قار - مۇز ساياھەت لىنىيەسىنى تەۋسىيە قىلىشنى ئويلىشىۋاتىمەن.
ئارقىدىن، تاراتقۇ زىيارەت ئۆمىكى ئالتاي شەھىرىدىكى ۋۇبەيلى مەنزىرە كوچىسىغا كېلىپ، ياقۇت رەسىم خىزمەت ئىشخانىسىنى ئېكسكۇرسىيە قىلىپ، ھەر خىل تېمىدىكى ياقۇت رەسىم ئەسەرلىرىدىن ھۇزۇرلاندى. ياقۇت رەسىم تەبىئىي ياقۇت ۋە مىنېرال ماددىلاردىن پايدىلىنىپ ئىجاد قىلىنىدىغان بولۇپ، رەڭگى ئوچۇق، نەپىس، پارقىراق بولۇشتەك ئالاھىدىلىكلەرگە ئىگە. قازاقىستان خەلقئارا ئاخبارات ئاگېنتلىقىدىن كەلگەن مۇخبىر ئالىما مۇكانوۋا مۇنداق دېدى: «ناھايىتى نەپىس ئىكەن، بىز مۇئەللىم بىلەن كېلىشىپ قويدۇق، كېلەر قېتىم شىنجاڭغا كەلگەندە، ئۇنىڭدىن ياقۇت رەسىم ئىجاد قىلىشنى ئۆگىنىمىز».
تاراتقۇلار ۋەكىللەر ئۆمىكى يەنە ئالتاي شەھىرى چياشيۇ يولى كوچا باشقارمىسى شۆدۇ مەھەللىسىگە كېلىپ، دومبىرا بىلەن ئورۇنلانغان ناخشا - مۇزىكىلاردىن ھۇزۇرلاندى، كۆپچىلىك بىر تەرەپتىن ئاڭلىغاچ، بىر تەرەپتىن رىتىمغا ئەگىشىپ ئۇسسۇل ئوينىدى. دومبىرا بىر خىل ئەنئەنىۋى تارىلىق چالغۇ بولۇپ، ئىككى تال تار، بىر مويىن ۋە ياغاچتىن ياسالغان بىر چاناقتىن تەركىب تاپقان، ئاۋاز تۈسى قەدىمىي، نەپىس ۋە يېقىملىق.
«دومبىرا بىلەن ئورۇنلانغان مۇزىكىلار مېنى تەسىرلەندۈردى، ئۇ كىشىلەرنىڭ بەختلىك تۇرمۇشتىكى ئىچكى ھېسسىياتىنى يەتكۈزدى.» قىرغىزىستان دۆلەتلىك كابار ئاگېنتلىقى خەلقئارا بۆلۈمىنىڭ مۇدىرى نۇرجان قاسمارىيېۋا مۇنداق دېدى: مەن دومبىرا بىلەن ناخشا - مۇزىكا ئورۇنلاش سەنئىتىگە ناھايىتى قىزىقىپ قالدىم، خەۋەر قىلىش ئارقىلىق، تېخىمۇ كۆپ كىشىگە جەلپكارلىققا تولغان بۇ جۇڭگو خەلق مۇزىكا سەنئىتىنى چۈشەندۈرىمەن.
تاراتقۇ ۋەكىللەر ئۆمىكىنىڭ ئەزالىرى بەس - بەستە مۇنداق بىلدۈردى: ئالتاي ۋىلايىتى ھەم قار - مۇز گۈزەللىكىگە، ھەم مەدەنىيەت پۇرىقىغا ئىگە جاي، قايتا بېرىشقا ئەرزىيدىغان ساياھەت مەنزىلگاھى ئىكەن.
