شىنجاڭ گېزىتى، قەشقەر، 6-ئاينىڭ 14-كۈنى خەۋىرى ئانار بۇلۇت\شىنجاڭ گېزىتى مۇخبىرى ھەبىبە خەۋەر قىلىدۇ: شىنجاڭنىڭ ساياھەت ئەۋزەللىكى نەدە؟ 6-ئاينىڭ 13-كۈنى قەشقەردە ئۆتكۈزۈلگەن مەدەنىيەت ۋە ساياھەت مىنىستىرلىقى كەسىپ تۈرى مۇلازىمەت سۇپىسىنىڭ 33-قارارلىق سەرخىل تۈرلەرنى ئالماشتۇرۇش، ئۇدۇللاشتۇرۇش پائالىيىتى ۋە شىنجاڭ مەدەنىيەت ۋە ساياھەت كەسىپلىرىگە مەبلەغ سېلىش، مەبلەغ يۈرۈشتۈرۈشنى ئىلگىرى سۈرۈش پائالىيىتى يۇمىلاق ئۈستەل سۆھبىتىدە مۇتەخەسسىسلەر بۇ مەسىلە توغرىسىدا مۇزاكىرىلەشتى.
«شيېچېڭ، تېڭشۈن، تۇڭچېڭ قاتارلىق كۆپلىگەن ساياھەت ئىستېمال سۇپىلىرىنىڭ سانلىق مەلۇمات ئانالىزىدىن شۇنى كۆرۈۋېلىشقا بولىدۇكى، كەلگۈسىدە پۈتۈن مەملىكەتنىڭ ساياھەت ئىستېمالىدا كىچىك دائىرىلىك ئۆزگىچە ساياھەت قىلىش، ئەركىن ئىستىراھەت قىلىش، چوڭقۇر ھېس قىلىشتىن ئىبارەت ئۈچ چوڭ يۈزلىنىش نامايان بولىدۇ، شىنجاڭ بۇلارنىڭ ھەممىسىدە ئەۋزەللىككە ئىگە.» شىنلۈجيې مەدەنىيەت - ساياھەت تەرەققىيات (بېيجىڭ) چەكلىك شىركىتىنىڭ قۇرغۇچىسى، باش لىدىر لى ياڭ مۇنداق دېدى: دۆلىتىمىز ساياھەتچىلىكىنىڭ تېز تەرەققىي قىلىشىغا ئەگىشىپ، ساياھەتچىلەرنىڭ ياش باسقۇچى بارغانسېرى كېڭەيدى، ساياھەتتە ئاساسىي گەۋدە قىسمىنى ئىگىلىگەن ياشلار كىچىك دائىرىلىك ئۆزگىچە مەنزىرە نۇقتىلىرىنى بارغانسېرى ياقتۇرىدىغان بولدى. بۇ توپتىكىلەر خاسلاشقان نۇقتىلارغا، بولۇپمۇ ئۆزىنىڭ ئېستېتىك قارىشى بىلەن ئورتاقلىققا ئىگە مەنزىرە رايونلىرىغا بېرىشنى تېخىمۇ خالايدۇ، «بۇ دەل شىنجاڭنىڭ ئەۋزەللىكى، مەنزىرە نۇقتىلىرىدا تاللاش كۆپ، نۇرغۇن جايلاردا ئۆزگىچە ساياھەت نۇقتىلىرى بار».
ساياھەت سەپىرى سۇپىسىنىڭ سانلىق مەلۇمات ئانالىزىغا ئاساسلانغاندا، خەلق تۇرمۇشى بەخت كۆرسەتكۈچىنىڭ ئۆسۈشىگە ئەگىشىپ، كۆپ قىسىم ساياھەتچىلەر ئەركىن ئىستىراھەت ھەمدە چوڭقۇر ھېس قىلىشتىن ئىبارەت ساياھەت شەكلىنى قوغلىشىشقا باشلىغان. ماڭغاچ كۆرۈپ، شۇ جاينىڭ خاسلىقىنى چوڭقۇر ھېس قىلىش ساياھەتچىلەرنى بۇ يەردە قېلىپ ئىستېمال قىلىشقا جەلپ قىلىدىغان مۇھىم نۇقتىغا ئايلانغان. «قەشقەر قەدىمىي شەھىرىنى مىسالغا ئالساق، ساياھەتچىلەر بۇ يەردە مەنزىرىلەردىن ھۇزۇرلىنىپلا قالماي، يەنە شۇ جاينىڭ خەلق ئۆرپ - ئادىتىنى چوڭقۇر ھېس قىلىدۇ، بۇ، ساياھەتچىلەرنى بۇ يەردە قېلىپ ئىستېمال قىلىشقا جەلپ قىلىدۇ» دېدى لى ياڭ.
2023-يىللىق ئاپتونوم رايوننىڭ ساياھەت تەرەققىيات يىغىنى ۋە «شىنجاڭ ياخشى جاي» تېمىسىدىكى ساياھەت تونۇشتۇرۇش يىغىنى مەزگىلىدە، لى ياڭ شىنجاڭنىڭ ئۆزى ئاپتوموبىل ھەيدەپ ساياھەت قىلىش لاگېرى، ئائىلىۋى قونالغۇ قاتارلىق كەسىپ ھالىتى تەرەققىياتىنىڭ ھەممىسىدە ئۆزىگە خاس ئالاھىدىلىك بارلىقىنى بايقىدى، «شىنجاڭدا كونىسىنى چىقىرىپ تاشلاپ يېڭىسىنى يارىتىدىغان نۇرغۇنلىغان ساياھەت مەھسۇلاتلىرى بار، بۇلارنىڭ ھەممىسى يېقىنقى مەزگىلدىكى پۈتۈن مەملىكەتنىڭ ساياھەت يۈزلىنىشىگە ئۇيغۇن، شىنجاڭنىڭ چوقۇم ساياھەتچىلەر ئارزۇدىكىدەك جايلارنى ئىزدەيدىغان مۇھىم مەنزىلگاھقا ئايلىنىدىغانلىقىغا ئىشىنىمەن».
