باش ياز مەزگىلىدە، ئىلى قازاق ئاپتونوم ئوبلاستى تېكەس ناھىيەسىنىڭ ھەرقايسى مەنزىرە رايونلىرىدا گۈللەر پورەكلەپ ئېچىلىپ، «گۈل سەيلىسى» بەس-بەستە يولغا قويۇلۇپ، گۈل ۋاسىتە قىلىنغان «گۈل ئىگىلىكى»، گۈل ئارقىلىق ساياھەت گۈللەندۈرۈلىدىغان «گۈل كەسىپ ھالىتى» پۈتۈن رايون ساياھىتى، يېزا-كەنتلەرنى گۈللەندۈرۈشتىكى يېڭى يارقىن نۇقتىغا ئايلانماقتا.
6-ئاينىڭ 2-كۈنى، تېكەس ناھىيەسى قاراجون مەنزىرە رايونىنىڭ گۈل تاماشا قىلىش سۇپىسى مەنزىرە نۇقتىسىدا، تاغ-دالىنى قاپلىغان ئالتۇنگۈللەر ئوتلاقنى زىننەتلەپ، گۈزەل رەڭلەر نۇرغۇن ساياھەتچى ۋە فوتو سۈرەت ھەۋەسكارلىرىنى كېلىپ سۈرەتكە تارتىپ داكا قىلىشقا جەلپ قىلدى.
تاغ-دالىنى قاپلىغان ئالتۇنگۈللەر ئوتلاقنى زىننەتلىدى
ئۈرۈمچىلىك ساياھەتچى لېي يۆ مۇنداق دېدى: «بىز بۈگۈن گۈل تاماشا قىلىش سۇپىسىغا كەلدۇق، بۇ يەر كىچىك نەغەزگۈل بىلەن پۈركەنگەن بولۇپ، بەكلا چىرايلىق ئىكەن، قارلىق تاغ، ئاق بۇلۇت، ئوتلاق بىر گەۋدە بولۇپ يۇغۇرۇلغان، مۇشۇنداق مەنزىرە ئىچىدە تۇرغاندىلا، ئاندىن مۇشۇنداق ھاياجانلىق ھېس-تۇيغۇسىدا بولىدىكەن. ئىككى يىلدىن كېيىن، جەزمەن يەنە بالىلىرىمىزنى ئېلىپ كېلىپ، تەبىئەت بىزگە ئېلىپ كەلگەن گۈزەللىكنى ھېس قىلىمىز».
ساياھەتچىلەر كىچىك نەغەزگۈل بىلەن قاپلانغان ئوتلاقتا قوزا كۆتۈرۈپ سۈرەتكە چۈشمەكتە
گۈللەرنىڭ پورەكلەپ ئېچىلىشى ساياھەتچىلەرنى جەلپ قىلىپلا قالماي، يەنە شۇ جايدىكى ئاممىنى «ساياھەت تامىقى» يېيىش ئىمكانىيىتىگە ئىگە قىلدى. شۇ جايدىكى نۇرغۇن چارۋىچى تۇغۇلغىنىغا ئۇزاق بولمىغان قوزىلارنى يېتىلەپ ساياھەتچىلەرنى سۈرەتكە چۈشۈشكە جەلپ قىلدى. ئۈنەر ئاۋباكىر قاراجون كەنتىدىكى چارۋىچى، ھەر قېتىم قاراجون مەنزىرە رايونىدا گۈللەر پورەكلەپ ئېچىلغان مەزگىل يېتىپ كەلگەندە، ئۇ ئۆيىدىكى قوزىلارنى مەنزىرە رايونىغا يېتىلەپ كېلىپ، ساياھەتچىلەرنى سۈرەتكە تارتىپ قويىدىغان مۇلازىمەت بىلەن تەمىنلەيدۇ، بۇ ھەم ئۇنىڭغا خېلى ياخشى كىرىم ئېلىپ كەلدى.
گۇاڭدۇڭلۇق ساياھەتچى جىن زىشۇەن مۇنداق دېدى: «مەن بۇ قېتىم ئۆمەككە قاتنىشىپ شىنجاڭغا ئوينىغىلى كەلگەن، بۇ قېتىم قاراجون مەنزىرە رايونىغا كېلىپ، بۇ يەرنىڭ ناھايىتى گۈزەل ئىكەنلىكىنى ھېس قىلدىم، يېڭى تۇغۇلغان قوزىلارمۇ بەك ئوماق ئىكەن، مەنزىرىسى ھەقىقەتەن بەك چىرايلىق ئىكەن، كېيىن يەنە كېلىمەن».
قاراجون چوڭ ئوتلىقى
تېكەس ناھىيەسىنىڭ قارادالا بازىرى قاراجون كەنتىدىكى چارۋىچى ئۈنەر ئاۋباكىر مۇنداق دېدى: «بىز 5-ئاينىڭ 11-كۈنىدىن باشلاپ، قوزىلارنى ئېلىپ كېلىپ ساياھەتچىلەرنى سۈرەتكە تارتىپ قويدۇق، كۈندە 200 يۈەندىن 300 يۈەنگىچە، بىر ئايدا 6000 يۈەندىن 9000 يۈەنگىچە پۇل تاپالايمىز، 5-ئايدىن 9-ئايغىچە بۇ ئىش بىلەن شۇغۇللانغىلى بولىدۇ، كىرىمىمىز خېلى ياخشى».
يېقىنقى يىللاردىن بۇيان، تېكەس ناھىيەسى ساياھەت ئىستىراھەت يېڭى سۈپەتلىك ماركىسىنى ئۈزلۈكسىز بەرپا قىلدى، مەنزىرە رايونلىرى يېڭى كەسىپ ھالىتىنى زور كۈچ بىلەن يېتىلدۈرۈپ، مەۋقەنى بايلىققا قويۇپ بازار ئېھتىياجىنى قاندۇرىدىغان ساياھەت يېڭى مەھسۇلاتلىرىنى بەرپا قىلىپ، مەنزىرە رايونىنىڭ ھېس قىلىش تۇيغۇسىنى كۈچەيتىپ، ساياھەتچىلەرنىڭ رازى بولۇش دەرىجىسىنى ئۈزلۈكسىز ئاشۇردى.
(تېكەس ناھىيەلىك يۇغۇرما تاراتقۇ مەركىزى مۇخبىرى جاڭ جېڭبىن، دى ماۋ)
