ئانار بۇلۇت\شىنجاڭ گېزىتى مۇخبىرى جاڭ تىڭ، ئىختىيارىي مۇخبىر دۇڭ شىجۈ
6-ئاينىڭ 6-كۈنى، مۇخبىرنىڭ جۇڭگو جەنۇب ئاۋىياتسىيەسى شىنجاڭ شۆبە شىركىتى(تۆۋەندە قىسقارتىلىپ جەنۇب ئاۋىياتسىيەسى دېيىلىدۇ) ئالتاي تىجارەت ئورنىدىن ئىگىلىشىچە، 6-ئاينىڭ 16-كۈنىدىن باشلاپ، گۇاڭجوۋ−ئالتاي بىۋاسىتە ئۇچۇش ئاۋىياتسىيە لىنىيەسى رەسمىي ئەسلىگە كەلتۈرۈلۈپ، ھەر جۈمە كۈنى بىر قېتىم بېرىپ-كېلىپ قاتنايدىكەن. ئاۋىياتسىيە لىنىيەسىنىڭ ئەسلىگە كەلتۈرۈلۈشى ئالتايدىن بىرىنچى سەپتىكى شەھەرلەرگە بىۋاسىتە ئۇچىدىغان ئاۋىياتسىيە تىرانسپورت تورىنى يەنىمۇ كېڭەيتىپ، ئىككى جاي ئارىسىدا بېرىپ-كېلىپ قاتنايدىغان يولۇچىلارنىڭ سەپەرگە چىقىش ئېھتىياجىنى قاندۇرىدىكەن.
ئالتاي شۆدۇ ئايرودۇرۇمىنىڭ خىزمەتچىلىرى قاتناشنى ئەسلىگە كەلتۈرۈش تەييارلىق خىزمىتىنى پۈتۈن كۈچ بىلەن ياخشى ئىشلىمەكتە.ۋېي لەي فوتوسى
ئىگىلىنىشىچە، بۇ لىنىيەدە جەنۇب ئاۋىياتسىيەسى تىجارەت قىلىدىكەن، بوئىن 738 ياكى بوئىن 737 تىپلىق ئايروپىلان ۋەزىپە ئىجرا قىلىدىكەن. CZ3949 نۆۋەتچى ئايروپىلانى بېيجىڭ ۋاقتى سائەت 06:50تە گۇاڭجوۋ بەييۈن خەلقئارا ئايروپورتىدىن ئۇچۇپ، شۇ جاي ۋاقتى سائەت 13:00تە ئالتاي شۆدۇ ئايرودۇرۇمىغا يېتىپ بارىدىكەن؛ CZ3950 نۆۋەتچى ئايروپىلانى بېيجىڭ ۋاقتى سائەت 13:50تە ئالتاي شۆدۇ ئايرودۇرۇمىدىن ئۇچۇپ، شۇ جاي ۋاقتى 19:20دە گۇاڭجوۋ بەييۈن خەلقئارا ئايروپورتىغا يېتىپ بارىدىكەن، پۈتۈن مۇساپىدە بىۋاسىتە ئۇچىدىكەن، ئۇچۇش ۋاقتى بەش يېرىم سائەت ئىكەن.
ئالتاي شىمالىي شىنجاڭدىكى مۇھىم شەھەر بولۇش سۈپىتى بىلەن، رۇسىيە، قازاقىستان، موڭغۇلىيەدىن ئىبارەت ئۈچ دۆلەت بىلەن چېگرىلىنىدۇ، يىپەك يولى ئىقتىساد بەلبېغىنىڭ شىمالىي يولى ۋە شىنجاڭنىڭ جۇڭگو−موڭغۇلىيە−رۇسىيە ئىقتىساد كارىدورى قۇرۇلۇشىغا قاتنىشىشىدىكى مۇھىم تۈگۈن شەھەر ھېسابلىنىدۇ.
يېقىنقى يىللاردىن بۇيان، گۇاڭدوڭ ئۆلكىسى شىنجاڭنىڭ ساياھەت تۈرىدىكى مۇھىم ساياھەتچى مەنبەسىگە ئايلاندى، گۇاڭدوڭلۇق ساياھەتچىلەرنىڭ سانى يىلدىن-يىلغا ئاشتى، بۇ قېتىم گۇاڭجوۋدىن ئالتايغا بىۋاسىتە ئۇچىدىغان نۆۋەتچى ئايروپىلاننىڭ 6-ئاينىڭ ئوتتۇرىلىرىدا قاتناشنى ئەسلىگە كەلتۈرۈشنى تاللاشتىكى سەۋەب، ئاۋىياتسىيە شىركىتى يازلىق تەتىللىك ساياھەتنىڭ ئاۋات مەزگىلىنى كۆزلىگەن، قاتناش ئەسلىگە كەلتۈرۈلگەندىن كېيىن، ئالتاي ۋىلايىتىنىڭ يازلىق ساياھەتچىلىكىنىڭ تەرەققىياتىغا ئۈزلۈكسىز تۈرتكە بولۇپ، يولۇچىلارنىڭ سەپەرگە چىقىش ئېھتىياجىنى يەنىمۇ قاندۇرۇپ، گۇاڭجوۋ بىلەن ئالتاي ئارىسىدا تېز، قولايلىق ھاۋا بوشلۇقى كۆۋرۈكى بەرپا قىلىنىدۇ.
كېيىنكى مەزگىلدە، ئالتاي يەنە بېيجىڭ قاتارلىق جايلارغا بىۋاسىتە ئۇچۇش ئاۋىياتسىيە لىنىيەسىنى ئاچىدۇ.
