تىيانشان تورى-شىنجاڭ گېزىتى خەۋىرى (مۇخبىر شېن زۇشياۋ، ئىختىيارىي مۇخبىر تيەن جىبىن خەۋەر قىلىدۇ) يېشىل، سۆسۈن رەڭلىك ئۈجمىلەر مەي باغلىغان يەنە بىر ياز يېتىپ كەلدى. 5-ئاينىڭ 7-كۈنى، پىچان ناھىيەسى ئۈجمە پەسلى «قۇم دېڭىزىدىكى تاتلىق ئۈجمە» پائالىيىتىنى قانات يايدۇردى، ئۈجمە ئۈزۈش، ئېسىل تائاملارغا ئېگىز تېگىش، ناخشا-ئۇسسۇلدىن ھۇزۇرلىنىش، ئاتا-ئانىلار ۋە بالىلار ساياھىتى قاتارلىق چۆكۈش شەكىلدىكى يېزا-كەنت ھېس قىلىش ساياھىتى نۇرغۇن ساياھەتچىنى جەزمەن كېلىشكە جەلپ قىلدى.
بۇ قېتىمقى پائالىيەتتە «مىڭ يىللىق قەدىمىي بازارنى ساياھەت قىلىش 100 يىللىق قەدىمىي ئۈجمىگە ئېغىز تېگىش» باش تېما قىلىنغان بولۇپ، پائالىيەتكە تۇرپان مۇقامى خاس ئەدەبىيات-سەنئەت كۆرىكى، «مۇقامگۈل» يېزا-كەنت مودا كىيىم كۆرگەزمىسى، 100 ياشلىق ياشانغانلاردىن شۈەنزاڭنىڭ غەربكە سەپەر قىلغانلىقىغا ئائىت تارىخىي مەدەنىيەت ھېكايىلىرىنى ئاڭلاش تۈرلىرى يۇغۇرۇلغان، گۇچياۋ ئائىلىۋى مېھمانخانىسىدا قونۇش، خاس ئېسىل تائاملارغا ئېغىز تېگىش، ئەتلەس، ساپال، ئۈجمە قوۋزىقىدىن قەغەز ياساش قاتارلىق غەيرىي ماددىي مەدەنىيەت ھۈنەر-سەنئىتىنى ھېس قىلىش تۈرلىرى ئارقىلىق، ساياھەتچىلەرگە قەدىمىي بازاردىكى ئۆرپ-ئادەتلەرنى تولۇق ھېس قىلدۇرۇپ، يېزا ئىگىلىك، ساياھەت ئىستېمالىنى ئىلگىرى سۈرىدىغان كاتتا مەرىكە بەرپا قىلدى.
ئېسىل، رەڭدار ئەدەبىيات-سەنئەت نومۇرلىرى پائالىيەت نەق مەيدانىنى شادلىق دېڭىزىغا ئايلاندۇردى، ئۈجمە، ئۈزۈم بايرىمىنى ئاساس قىلغان ئىشلەپچىقىرىش كارخانىلىرى بەس-بەستە قاتنىشىپ، كەسىپ تەرەققىياتىنىڭ يېڭى پىلانى ئۈستىدە ئورتاق ئىزدەندى، مارس لۈكچۈن قاتارلىق توردا ئالقىشلانغان مەنزىرە نۇقتىلىرى نۇرغۇن ساياھەتچىنى كېلىپ داكا قىلىشقا جەلپ قىلدى؛ يېزا ئىگىلىك ئالاھىدە مەھسۇلاتلىرىنى مەركەزلىك كۆرگەزمە قىلىپ سېتىش يېزا ئىگىلىك مەھسۇلاتلىرىنىڭ سېتىلىش يولىنى ئاچتى؛ بىر قاتار مول مەزمۇنلۇق پائالىيەتلەر نەق مەيداننى تېخىمۇ چوڭقۇر ھېس قىلىش تۇيغۇسىغا ئىگە قىلدى.
«بۇ يەردىكى ئۈجمىنىڭ دانىسى چوڭ، رەڭگى قىزىل، تەمى تاتلىق بولغاچقا، ھەر يىلى ئۇرۇق-تۇغقان، دوست-بۇرادەرلىرىم بىلەن كېلىشىپ ئۈجمە ئۈزگىلى كېلىمەن» دېدى ئۈجمە ئۈزۈۋاتقان ساياھەتچى ليۇ جۈن.
يېقىندا، لۈكچۈن بازىرى دۆلىتىمىزنىڭ مارس يەر شارى سۈرەت خاتىرىسىگە شەرەپ بىلەن يېزىلغان جۇڭگو تارىخىي مەدەنىيىتىدىكى 22 داڭلىق كەنت، داڭلىق بازارنىڭ بىرى بولۇش سۈپىتى بىلەن، مارستىكى ھالقىسىمان ئازگالغا نامى قالدۇرۇلغانىدى. يېقىندا، پىچان ناھىيەسى دۆلەتنىڭ 2023-يىللىق ئەنئەنىۋى كەنتلەرنى مەركەزلىك بىر تۇتاش قوغداپ پايدىلىنىدىغان ئۈلگە كۆرسىتىش ناھىيەسى قاتارىغا كىرگۈزۈلۈپ، شىنجاڭ بويىچە بىردىنبىر تاللانغان شەھەر بولۇپ قالدى، لۈكچۈن بازىرىدىكى ئالتە قەدىمىي كەنت يەنە ئىلگىرى-كېيىن بولۇپ جۇڭگونىڭ ئەنئەنىۋى كەنتلەر تىزىملىكىگە كىرگۈزۈلدى.
«بىز ‹بىر كەنتتە بىر مەنزىرە بولۇش، بىر كەنتتە بىر خاسلىق بولۇش› ئالاھىدىلىكىنى چۆرىدەپ، دېھقانلار ئارامگاھى، ئائىلىۋى مېھمانخانا، مېۋە ئۈزۈش، مۇقام تەتقىقات-ئۆگىنىش قاتارلىق كۆپ مەنبەلىك مۇلازىمەت كەسپىنى تىرىشىپ بەرپا قىلدۇق.» لۈكچۈن بازارلىق پارتىيە كومىتېتىنىڭ مۇئاۋىن شۇجىسى، بازار باشلىقى ئۆمەر مەخمۇت مۇنداق دېدى: «كېيىنكى قەدەمدە ئۈجمە بايرىمىنى پۇرسەت بىلىپ، لۈكچۈن بازىرىنىڭ چوڭقۇر مەدەنىيەت ئاساسىغا تايىنىپ، يېزا ئىگىلىكى، مەدەنىيەت-ساياھەت كەسپىنى ئۆزئارا بىرلەشتۈرۈشنى ئۈزلۈكسىز ئالغا سىلجىتىپ، سىرتتىن كەلگەن ساياھەتچىلەرگە مىڭ يىللىق قەدىمىي بازارنىڭ تۇرمۇش گۈزەللىكىنى ھېس قىلدۇرۇپ، مەدەنىيەت-ساياھەتنى گۈللەندۈرۈش ئارقىلىق يېزا-كەنتلەرنى گۈللەندۈرۈشكە تۈرتكە بولىمىز».
پىچان ناھىيەسىنىڭ ئۈجمە پەسلى پائالىيىتى 2008-يىلى ئۆتكۈزۈلگەندىن بۇيان، تارىخىي مەدەنىيەتكە ئىگە داڭلىق كەنت، داڭلىق بازار ئاساسىنى گەۋدىلەندۈرۈشتە چىڭ تۇرۇپ، ئۆزگىچە خاسلىققا ئىگە قەدىمىي دەرەخ، قەدىمىي كەنت بەرپا قىلىپ، كەڭ ساياھەتچىلەرنىڭ يېزا-كەنت ساياھەتچىلىكىنى ھېس قىلىش، سەھرا ھىدىدىن بەھرىمەن بولۇش ئېھتىياجىنى تىرىشىپ قاندۇردى.
