ئانار بۇلۇت\شىنجاڭ گېزىتى خەۋىرى (مۇخبىر جاڭ شياۋمى خەۋەر قىلىدۇ) 5-ئاينىڭ 12-كۈنى، مۇخبىرنىڭ ئاپتونوم رايونلۇق مەدەنىيەت ۋە ساياھەت نازارىتىدىن ئىگىلىشىچە، 5-ئاينىڭ 19-كۈنىدىكى 13-قېتىملىق «جۇڭگو ساياھەت كۈنى»دە، شىنجاڭ ئىچىدىكى كۆپ قىسىم جايلاردىكى مەنزىرە رايونلىرى، مەنزىرە نۇقتىلىرى ھەم ساياھەت كارخانىلىرى بەس-بەستە ھەقسىز بولۇش، باھاسىنى چۈشۈرۈش، مەدەنىيەت-ساياھەت ئىستېمال بېلىتى تارقىتىش قاتارلىق ئېتىبار بېرىش تەدبىرلىرىنى ئوتتۇرىغا قويۇپ، شىنجاڭ مەدەنىيەت-ساياھەت بازىرىنىڭ ھاياتىي كۈچىنى ئۇرغۇتىدىكەن.
لوپنۇرلۇقلار كەنتى مەنزىرە رايونىدا كولدۇرما ئاۋازى ياڭرىدى.ۋاڭ خەنبىڭ فوتوسى
كۆپلىگەن مەنزىرە رايونلىرى 5-ئاينىڭ 19-كۈنى كىرىش بېلىتىنى ھەقسىز قىلىش پاراۋانلىقىنى يولغا قويىدۇ، بۇ، چۆچەك شەھىرىدىكى بارلىق مەنزىرە رايونلىرى، موڭغۇلكۈرە ناھىيەسىدىكى دۆلەت 4A ،3A دەرىجىلىك ساياھەت مەنزىرە رايونلىرى، ئاقسۇ شەھىرىدىكى A دەرىجىلىك 10 مەنزىرە رايونى، نارات مەنزىرە رايونى، شوربۇلاق ھاراق مەدەنىيىتى كىچىك بازىرى، نىلقا ناھىيەسى سۇلۇق يەر قەدىمىي تېرەك مەنزىرە رايونى، كۈنەس مەنزىرە رايونى، كۆكتوقاي ئاز ئۇچرايدىغان مېتاللار دۆلەتلىك كان باغچىسى، قەشقەر ۋىلايىتى قۇتادغۇبىلىك مەنزىرە رايونى، مارالبېشى ئاناركۆل مەنزىرە رايونى، قورغاس ناھىيەسى تۈكە قۇملۇقى شادلىق دۇنياسى مەنزىرە رايونى قاتارلىقلارنى ئۆز ئىچىگە ئالىدۇ.
كۆپلىگەن مەنزىرە رايونلىرى كىرىش بېلىتىدە باھانى چۈشۈرۈپ ئېتىبار بېرىشنى يولغا قويىدۇ. شۇ كۈنى، بايىنبۇلاق مەنزىرە رايونىنىڭ ئارىلىق ئاپتوموبىلى، كىرىش بېلىتىدە %50 ئېتىبار قىلىنىدۇ. كۆكدالا يايلىقى ساۋيۈەنجيې ئۆرپ-ئادەت باغچىسىنىڭ كىرىش بېلىتى يېرىم باھادا، غۇلجا ناھىيەسى تىيانشان گۈل دېڭىزى مەنزىرە رايونىنىڭ تۈرلۈك كۆڭۈل ئېچىش ئەسلىھەلىرى يېرىم باھادا بولىدۇ. خېجىڭ ناھىيەسىدىكى ھەرقايسى A دەرىجىلىك ساياھەت مەنزىرە رايونلىرى، يۇلتۇز دەرىجىلىك ساياھەت مېھمانسارايلىرى ساياھەت ئاممىۋى پاراۋانلىقى ئارقىلىق خەلققە نەپ يەتكۈزۈشنى يولغا قويىدۇ. لوپ ناھىيەسىدىكى A دەرىجىلىك ساياھەت مەنزىرە رايونلىرى ساياھەت كوپىراتىپلىرىنىڭ كوللېكتىپ ساياھەتچىلەرگە قارىتا مەنزىرە رايونلىرىنىڭ كىرىش بېلىتىدە %50 ئېتىبار قىلىدۇ. ئاقتۇ ناھىيەسىدىكى A دەرىجىلىك مەنزىرە رايونلىرىنىڭ كىرىش بېلىتى يېرىم باھادا سېتىلىدۇ. قومۇل ئاراتۆرۈك توغراقلىق مەنزىرە رايونىنىڭ كىرىش بېلىتىنىڭ باھاسى چۈشۈرۈلىدۇ، غەلىتە تاغ مەنزىرە رايونى بىلەن گاۋجياخۇ مەنزىرە رايونى بىرلىشىپ كىرىش بېلىتى باھاسىدا ئېتىبار بېرىشنى يولغا قويىدۇ.
جامبۇلاق مەنزىرە رايونىنىڭ گۈزەل مەنزىرىسى. ئاپتونوم رايونلۇق مەدەنىيەت-ساياھەت نازارىتى تەمىنلىگەن
ساياھەتچىلەر يەنە مەدەنىيەت-ساياھەت ئىستېمال ئېتىبارىدىن بەھرىمەن بولالايدۇ. قاراقاش ناھىيەسى لالىيكۆل كۆڭۈل ئېچىش مەيدانى مەدەنىيەت-ساياھەت ئىستېمال بېلىتىدىن 5000نى تارقىتىدۇ، ساياھەتچىلەر بۇ بېلەت بىلەن مەنزىرە رايونىنىڭ كىرىش بېلىتى ھەققىدە ئېتىبار بېرىش، كەچۈرۈم قىلىشقا ئېرىشىدۇ ھەم بىر تۈرلۈك كۆڭۈل ئېچىش ئۈسكۈنىسىدىن ھەقسىز بەھرىمەن بولالايدۇ، دېھقانلار ئارامگاھى، ئۈزۈش باغچىسىمۇ ئىستېمال سوممىسى توشقاندا بېلەت سوۋغا قىلىش، باھاسىنى چۈشۈرۈش پائالىيىتىنى يولغا قويىدۇ. ساياھەتچىلەر گۇما ناھىيەسىدىكى 3A دەرىجىلىك مەنزىرە رايونىدا مال سېتىۋالسا، ئەسلىي باھاسىنىڭ %90ى بويىچە ھەق ئېلىنىدۇ، مەنزىرە رايونىدىكى ئەدەبىيات-سەنئەت نومۇرلىرىنى ھەقسىز كۆرسە بولىدۇ. ئىپارخان باغچىسى مەنزىرە رايونى شۇ كۈندىكى ساياھەتچىلەرگە ئاتكرىتكا سوۋغا قىلىدۇ ھەم ئىپارخان باغچىسىنىڭ مەخسۇس پوچتا تامغىسىنى بېسىپ بېرىدۇ.
