□ئانار بۇلۇت\شىنجاڭ گېزىتى مۇخبىرى ۋاڭ جىڭجىڭ
4 - ئاينىڭ 29 - كۈنى سائەت 11لەردە، سايرام كۆلى بويىدا، كېلېچىڭ مۇزىكا ئەترىتى نەق مەيداندا ئورۇنلىغان «قەدەھ تۇتۇش ناخشىسى»غا جور بولۇپ، ئۇسسۇلچىلار ساياھەتچىلەرگە خادا تەقدىم قىلدى. «قار - مۇزلار تېخى تولۇق ئېرىمىگەن، ھاۋا سەل سوغۇق بولسىمۇ، ئەمما باغچىنىڭ ئاجايىپ مۇراسىم تۇيغۇسىغا تولغان ئېچىلىش مۇراسىمى قەلبىمنى ئىللىتتى.» شاڭخەيلىك ساياھەتچى گاۋ يۈەنيۈەننىڭ سۆزلىرىدىن ھاياجانغا تولغانلىقى چىقىپ تۇراتتى، ئويۇن ئاخىرلاشقاندىن كېيىن، ئۇ كۆرۈپ قانمىغاندەك تۇيغۇغا چۆمۈپ سەھنىگە چىقىپ ھەربىر ئارتىس بىلەن سۈرەتكە چۈشۈپ خاتىرە قالدۇردى.
«1 - ماي»لىق دەم ئېلىشنىڭ 1 - كۈنى، شىنجاڭدىكى ھەرقايسى چوڭ مەنزىرە رايونلىرى، مەنزىرە نۇقتىلىرى شىنجاڭنىڭ ئىچى - سىرتىدىن كەلگەن نۇرغۇن ساياھەتچىنى كۈتۈۋالدى، ۋاقىت بۆلىكىگە ئايرىپ ئالدىن كېلىشىپ باغچىغا كىرىش، ئاقىل ساياھەت سىستېمىسى ئارقىلىق ساياھەتچىلەر مەنزىرە رايونلىرىغا تەرتىپلىك كىرىپ، گۈزەل شىنجاڭنى ھېس قىلدى.
باھار سەيلىسى قىلىش، چېچەك سەيلىسى قىلىش «1 - ماي»دا ساياھەتكە چىقىشنىڭ مۇھىم مەزمۇنى بولۇپ، نۇرغۇن ساياھەتچى گۈل - چېچەكلەرنىڭ ھەمراھلىقىدا، باھار كەيپىياتىنى ھېس قىلدى. 4 - ئاينىڭ 29 - كۈنى، شىخەنزە جياڭجۈن تېغى لياۋجياڭ ئېكولوگىيە باغچىسىدا، بىنەپشە رەڭلىك، ھال رەڭلىك جىيىڭخۇا گۈلى قاقاس تاغقا رەڭدار تون ياپتى، «مىننەتدارلىق بىلدۈرۈپ جاسارەت بىلەن ئىلگىرىلەشتە <جىيىڭخۇا>مۇ بار» باش تېما قېلىنغان تۇنجى نۆۋەتلىك جىيىڭخۇا گۈلى مەدەنىيەت ساياھەت بايرىمى بۇ يەردە باشلاندى، ھەقسىز ئاممىۋى قاتناش مەخسۇس لىنىيەسى ئېچىلدى، ھەقسىز WiFi تورى مەنزىرە رايونىنى قاپلىدى، مۇھىت ئاسرايدىغان كۆچمە ئاممىۋى ھاجەتخانا يېڭىدىن كۆپەيتىلدى، شۇ جاي نۇرغۇن تەدبىرلەرنى قوللىنىپ ساياھەتچىلەرنىڭ ساياھەت تەسىراتىنى ئاشۇردى.
4 - ئاينىڭ 29 - كۈنى ئەتىگەندە، چۆچەك شەھىرىدىن مەخسۇس ساۋەنگە كەلگەن ليۇ بوخەي قىزىنىڭ ساۋەن شەھىرىنىڭ تۇنجى نۆۋەتلىك چاقلىق كانكى تېيىلىش تەكلىپ مۇسابىقىسىگە قاتنىشىشىغا ھەمراھ بولدى، تارباغاتاي ۋىلايىتىنىڭ ھەرقايسى ناھىيە، شەھەرلىرىدىن كەلگەن 220دىن ئارتۇق بالا بىر مەيداندا ماھارەت بويىچە مۇسابىقىلەشتى. مۇسابىقە ئاخىرلاشقاندىن كېيىن، ليۇ بوخەي بىر ئائىلە كىشىلىرى يەنە يېڭىدىن تىجارەت باشلىغان لۇجياۋۋەن مەنزىرە رايونىغا بېرىپ سەيلە - ساياھەت قىلدى. «لۇجياۋۋەن مەنزىرە رايونى يېڭىدىن تىجارەت باشلىدى، ئاتا - ئانىلار ۋە بالىلارنىڭ سەيلە - ساياھەت قىلىشىغا ماس كېلىدىغان نۇرغۇن تۈر بار. <1 - ماي> مەزگىلىدە بىز ساياھەتچىلەرنىڭ مەنزىرە رايونى ئىچىدىكى يېڭى كەسىپ ھالىتىگە بولغان پىكرىنى كەڭ دائىرىدە توپلاپ، تۈرلەرنى ئۈزلۈكسىز ياخشىلاپ، مۇكەممەللەشتۈرۈپ، ئاۋات پەسىلنىڭ يېتىپ كېلىشىنى كۈتۈۋالىمىز» دېدى ساۋەن شەھەرلىك مەدەنىيەت - تەنتەربىيە - رادىيو - تېلېۋىزىيە ۋە ساياھەت ئىدارىسى مەدەنىيەت - ساياھەت كەسىپلىرى بۆلۈمچىسىنىڭ مەسئۇلى ليۇ خۇەن.
مەيىن شامالدا ئۇچسا گەر لەگلەك، تىك ئۆرلەر ئىدى كۆك ئاسمانغا. ئاپتونوم رايونىمىزدىكى ھەرقايسى جايلار ئاتا - ئانىلار ۋە بالىلار پائالىيىتىگە ماس كېلىدىغان لەگلەك مۇسابىقىلىرىنى تەشكىللىدى. 4 - ئاينىڭ 29 - كۈنى، «جۇڭگو شىخەي . پەرۋاز قىلىپ ئارزۇغا ئىنتىلىش» تېمىسىدىكى باغراش ناھىيەسىنىڭ 4 - نۆۋەتلىك لەگلەك بايرىمى داخېكۇۋ مەنزىرە رايونىدىكى شىخەي قۇملۇق ساھىلىدا ئۆتكۈزۈلدى، شەكلى ھەر خىل، رەڭدار لەگلەكلەر باغراش كۆلى ئاسمىنىدا لەپىلدەپ ئۇچۇپ، بىر مەيدان ئىنتايىن ھۇزۇرلىنىشچانلىققا ئىگە لەگلەك كاتتا زىياپىتىنى نامايان قىلدى، مەنزىرە رايونى يەنە ساياھەتچىلەرنى لەگلەك مۇسابىقىسىگە قاتنىشىشقا رىغبەتلەندۈردى، غەلىبە قىلغۇچىلار مول مۇكاپات بۇيۇملىرىغا ئېرىشتى.
چاقلىق كانكى ۋە لەگلەك مۇسابىقىسىدىن باشقا يەنە، شىنجاڭدىكى ھەرقايسى جايلار بەس - بەستە كاۋاپ باش تېما قىلىنغان مۇسابىقە ياكى بايرام - تەبرىكلەش پائالىيەتلىرىنى تەشكىللىدى. ئۈرۈمچى شەھىرى تىيانشان رايونىنىڭ چوڭ بازار پىيادىلەر كوچىسىدا ئۆتكۈزۈلگەن «2023 - يىللىق شىنجاڭ تۇنجى نۆۋەتلىك كاۋاپ بايرىمى»دا، شىنجاڭ كاۋىپى «ئۈچ يۈرۈشلۈكى» − كاۋاپ + پىۋا + ئاق نان ئوتتۇرىغا چىقىرىلدى. «بىر چىشلەم ناننىڭ ئارىسىغا كاۋاپنى قىستۇرۇپ يەپ، بىر يۈتۈم پىۋا ئىچكەندە، بىردىنلا شىنجاڭلىقلارغىلا خاس خۇشاللىقنى ھېس قىلغىلى بولىدىكەن.» چېڭدۇلۇق ساياھەتچى فەن تيەننىڭ مۇنداق دېدى: بۇ قېتىمقى سەپىرىمنىڭ تۇنجى بېكىتى چوڭ بازار پىيادىلەر كوچىسى بولۇپ، تاسادىپىي كاۋاپ بايرىمىغا توغرا كېلىپ قېلىپ، شىنجاڭ كاۋىپىغا ئالاقىدار مول بىلىملەر بىلەن تونۇشتۇم، «جەنۇبىي شىنجاڭدا كۆپ قىسىم كاۋاپلارغا تېتىتقۇ سېلىنمايدىكەن، ئالتايدا بېلىق كاۋىپى ئەڭ ئوخشايدىكەن، كېيىنكى قەدەمدىكى شىنجاڭنى ساياھەت قىلىش سەپىرىمدە جەزمەن بېرىشقا تېگىشلىك جايلارنىڭ ھەممىسىگە بىر - بىرلەپ بارىمەن».
دەم ئېلىش مەزگىلىدە، خوتەن شەھىرى، لوپنۇر ناھىيەسى بەش كۈنلۈك كاۋاپ، مەززىلىك تائاملار بايرىمى تەشكىللەپ، ئاشپەزلىك ھۈنىرىنى بەسلەشتۈرۈش بىلەن بىللە، ھەرقايسى جايلاردىن كەلگەن ساياھەتچىلەرگە شىنجاڭ كاۋىپىنى تونۇشتۇرىدۇ.
ئۈرۈمچى نەنسەن كۆچەت يېتىشتۈرۈش بازىسىدا نوتا مەزگىلىدىكى تىيانشان شەمشادىنى كۆرگەندىن كېيىن، ئاندىن نەنسەن شياۋچۈزى مەنزىرە رايونىغا بېرىپ 50 يىللىق تىيانشان شەمشادىنى ئىزدەش؛ ئۈرۈمچى شەھىرى شياۋچۈزى مېتېئورولوگىيە پونكىتىدا مېتېئورولوگىيە خادىملىرىنىڭ خىزمەت مەزمۇنىنى چۈشىنىش... «قىزىمنى ئېلىپ نەنسەنگە كۆپ قېتىم بارغانىدىم، بۇ قېتىمقى تەتقىقات، ئۆگىنىش ساياھىتىدە نەزەر دائىرەم كېڭەيدى.» شەھەر ئاھالىسى سۈبھىنۇر مۇنداق دېدى: بالام ئۈرۈمچى شەھەرلىك 2 - باشلانغۇچ مەكتەپنىڭ 2 - يىللىقىدا ئوقۇيدۇ، بۇ دەم ئېلىش مەزگىلىدە، بالامنى ئېلىپ بىر كۈنلۈك ساياھەت تەتقىقات، ئۆگىنىش پائالىيىتىگە قاتناشتىم، بالام يېڭى بىلىملەرنى ئۆگىنىپلا قالماي، مەنمۇ ھايۋانات، ئۆسۈملۈك توغرىسىدا بىلىملەرگە ئېرىشتىم.
مۇخبىرنىڭ ئىگىلىشىچە، «1 - ماي»لىق دەم ئېلىش مەزگىلىدە، نۇرغۇن تەتقىقات، ئۆگىنىش ئۆمەكلىرىنىڭ تىزىمغا ئالدۇرۇش سانى بالدۇرلا توشۇپ كەتكەن. «20 كىشىلىك نەنسەن <قىزىقارلىق دالا، تەبىئەت . باھارنى ئىزدەش> ئۆمىكى ئىككى كۈندىلا توشۇپ كەتتى، بۈگۈنمۇ يەنە بەزى ئاتا - ئانىلار كېلىپ تىزىملاتقان بالىلاردىن ۋاقتىنچە بارمايدىغانلارنىڭ بار - يوقلۇقىنى سورىدى» دېدى شىنجاڭ ئاۋيوۋ شىجىڭ ساياھەت كوپىراتىپى تەتقىقات، ئۆگىنىش دەرسلىكىنىڭ لايىھەلىگۈچىسى گو جىڭ. بىر كۈنلۈك ساياھەت تەتقىقات، ئۆگىنىش پائالىيىتىدىن باشقا، نۇرغۇن تەتقىقات، ئۆگىنىش ئاپپاراتلىرى يەنە تۇرپان، سايرام كۆلى قاتارلىق جايلاردا ئۇزۇن لىنىيەلىك تەتقىقات، ئۆگىنىش دەرسلىكىنى تەشكىللەپ، بىردەك ياخشى بازار ئىنكاسىغا ئېرىشتى، ئۆمەكلەر توشۇپ سەپەرگە ئاتلاندى.
