ئانار بۇلۇت\شىنجاڭ گېزىتى خەۋىرى (مۇخبىر ما يىنىڭ خەۋەر قىلىدۇ) مۇخبىرنىڭ ئۈرۈمچى ئاۋىياتسىيەسى چەكلىك مەسئۇلىيەت شىركىتىدىن ئىگىلىشىچە، ئۈرۈمچى ئاۋىياتسىيەسى 5-ئاينىڭ 3-كۈنىدىن باشلاپ ئۈرۈمچى — شياڭگاڭ ئاۋىياتسىيە لىنىيەسىنى رەسمىي ئېچىشنى پىلانلىغان، بۇ، شىنجاڭ بويىچە شياڭگاڭغا توختىماي بىۋاسىتە ئۇچىدىغان تۇنجى قەرەللىك يولۇچى توشۇش لىنىيەسى ھېسابلىنىدىكەن.
ئۈرۈمچى — شياڭگاڭ ئاۋىياتسىيە لىنىيەسىدە ھەر چارشەنبە كۈنى بىر قېتىم بېرىپ-كېلىشنى ئىجرا قىلىش پىلانلانغان بولۇپ، بوئېن 800-737 تىپلىق يولۇچىلار ئايرۇپىلانى ئۇچۇش ۋەزىپىسىنى ئىجرا قىلىدۇ. بېرىش مۇساپىسىدە UQ2637 نۆۋەتچى ئايروپىلانى سائەت 10دىن 15 مىنۇت ئۆتكەندە ئۈرۈمچى دىۋوپۇ خەلقئارا ئايروپورتىدىن ئۇچۇپ، سائەت 15تىن 35 مىنۇت ئۆتكەندە شياڭگاڭ خەلقئارا ئايروپورتىغا قونىدۇ. قايتىش مۇساپىسىدە UQ2638 نۆۋەتچى ئايروپىلانى سائەت 16دىن 35 مىنۇت ئۆتكەندە شياڭگاڭ خەلقئارا ئايروپورتىدىن ئۇچۇپ، سائەت 22دىن 20 مىنۇت ئۆتكەندە ئۈرۈمچى دىۋوپۇ خەلقئارا ئايروپورتىغا يېتىپ كېلىدۇ.
ئۈرۈمچى ئاۋىياتسىيەسى 5-ئاينىڭ 3-كۈنىدىن باشلاپ ئۈرۈمچى — شياڭگاڭ ئاۋىياتسىيە لىنىيەسىنى رەسمىي ئېچىشنى پىلانلىدى، بۇ، شىنجاڭ بويىچە شياڭگاڭغا توختىماي بىۋاسىتە ئۇچىدىغان تۇنجى قەرەللىك يولۇچى توشۇش لىنىيەسى ھېسابلىنىدۇ. ئۈرۈمچى ئاۋىياتسىيەسى تەمىنلىگەن سۈرەت
ئىگىلىنىشىچە، ئۈرۈمچى — شياڭگاڭ بىۋاسىتە ئاۋىياتسىيە لىنىيەسى يولۇچى مىقدارى ۋە سەپەرگە چىقىش ئېھتىياجىغا بىرلەشتۈرۈلۈپ، ئالدىنقى مەزگىلدە ئېچىلغان ئۈرۈمچى — جېڭجوۋ — شياڭگاڭ ئاۋىياتسىيە لىنىيەسىنى ئەلالاشتۇرۇش ئارقىلىق تەڭشەلگەن. توختاپ ئۇچۇش لىنىيەسى بىۋاسىتە ئۇچۇش لىنىيەسىگە ئەلالاشتۇرۇلۇپلا قالماي، يولۇچىلار پەقەت بەش سائەتتىن كۆپرەك ۋاقىتتىلا ئۈرۈمچىدىن شياڭگاڭغا يېتىپ بارالايدۇ. نۆۋەتچى ئايرۇپىلان ۋاقتىمۇ يولۇچىلارنىڭ سەپەرگە چىقىش ئېھتىياجىغا تېخىمۇ يېقىنلاشتۇرۇلغان بولۇپ، شىنجاڭ — شياڭگاڭ رايونلىرى ئارا يولۇچىلارنىڭ بېرىش-كېلىشىگە قولايلىق يارىتىدۇ.
ئۈرۈمچى ئاۋىياتسىيەسى ماركېتىڭ بۆلۈمى خەلقئارا كەسىپ مەركىزىنىڭ دىرېكتورى دۇ چۇنيى مۇنداق دېدى: ئاۋىياتسىيە لىنىيەسىنىڭ ئېچىلىشى شىنجاڭ، شياڭگاڭدىن ئىبارەت ئىككى جايدىكى يولۇچىلارنىڭ بېرىش-كېلىشىگە زور قولايلىق يارىتىدۇ، شۇنىڭ بىلەن بىللە، شىنجاڭنىڭ تىجارەت-سودا مۇھىتىنى ئەلالاشتۇرۇپ، ئىقتىسادنىڭ راۋان ئايلىنىشىنى ئىلگىرى سۈرۈپ، گۇاڭدۇڭ — شياڭگاڭ — ئاۋمېن چوڭ قولتۇق رايونىنىڭ ئىقتىساد-سودا ھەمكارلىقىنى كۈچلۈك قاتناش كاپالىتىگە ئىگە قىلىدۇ. كەلگۈسىدە، ئۈرۈمچى ئاۋىياتسىيەسى ئۈرۈمچىدىن باڭكوكقا قاتنايدىغان خەلقئارا ۋە رايون ئاۋىياتسىيە لىنىيەسىنىڭ سىجىل جانلىنىشىغا پائال تۈرتكە بولۇپ، تېخىمۇ مۇكەممەل بولغان ئاۋىئاتسىيە تورى ئارقىلىق رايون ئىقتىسادىنىڭ گۈللىنىشىنى ئىلگىرى سۈرىدۇ.
يولۇچىلارنىڭ ئۈرۈمچى — شياڭگاڭ بىۋاسىتە ئاۋىياتسىيە لىنىيەسىنى داكا قىلىشى، ھېس قىلىپ بېقىشىغا قولايلىق يارىتىش ئۈچۈن، ئۈرۈمچى ئاۋىياتسىيەسى ئالاھىدە ئېتىبار بېرىش پائالىيىتىنى يولغا قويدى: ئۈرۈمچى — شياڭگاڭ يەككە لىنىيە بېلەت باھاسى 1500 يۈەندىن باشلىنىدۇ، شياڭگاڭ — ئۈرۈمچى يەككە لىنىيە بېلەت باھاسى 1580 يۈەندىن باشلىنىدۇ(يۇقىرىقى باھا يېقىلغۇ ماي ھەم باج ھەققىنى ئۆز ئىچىگە ئالمايدۇ).
