ھەر يىلى چېچەكلەر ئېچىلىدۇ، بۇ يىل ئەتىيازدا تېخىمۇ پورەكلەپ ئېچىلدى. 4-ئاينىڭ 17-كۈنى، ئۈچ كۈن داۋاملاشقان «بۈگۈر ئاق ئۆرۈكى، جۇڭگودىكى شىرىن تەم» بۈگۈر ناھىيەسى تۇنجى نۆۋەتلىك ئاق ئۆرۈك مەدەنىيەت-ساياھەت بايرىمىنىڭ «نەشپۈت چېچەكلىدى» چېچەك سەيلىسى يۈرۈشلۈك پائالىيىتى ئاخىرلاشتى. 20 مىڭدىن ئارتۇق ساياھەتچى باھار سەيلىسى قىلىپ چېچەكلەرنى تاماشا قىلدى.
پائالىيەت كۈنى. ئىختىيارىي مۇخبىر تۇرسۇن ئوسمان فوتوسى
نەشپۈت چېچىكى بايرىمىنىڭ ئۆتكۈزۈلۈشى بۈگۈر ناھىيەسىنىڭ تونۇلۇش دەرىجىسىنى كېڭەيتىپلا قالماي، يېزا-كەنت ساياھەتچىلىكى بايلىقىنى قوزغىتىپ، ساياھەت كەسپىنى زورايتتى ۋە كۈچەيتتى. قاراباغ يېزىسى ئۆرۈك چېچىكى، نەشپۈت چېچىكى قاتارلىق ئەۋزەل بايلىقلارنى جارى قىلدۇرۇپ، كەنت ئاھالىلىرىنى ئۆرۈك چېچىكى بايرىمى، نەشپۈت چېچىكى بايرىمى سۇپىسىغا تايىنىپ، «ساياھەت تامىقى» يېيىش ئىمكانىيىتىگە ئىگە قىلىپ، ساياھەت كەسپى ئارقىلىق كەنت ئاھالىلىرىنىڭ كىرىمىنى ئاشۇرۇپ بېيىشىغا تۈرتكە بولۇپ، يېزا ئىگىلىكى بىلەن ساياھەت بىرلەشتۈرۈلگەن «گۈل سەيلىسى ئىقتىسادى» يولىنى تېپىپ چىقتى.
بۇ بىر نەچچە كۈندە، بۈگۈر ناھىيەسىنىڭ قاراباغ يېزىسى قوشتۈگمەن كەنتىدىكى 100 يىللىق نەشپۈتلۈكتە كۈلكە ساداسى ياڭرىدى. نەشپۈتلۈكنىڭ سىرتىدىكى 100 دىن ئارتۇق دۇكان، دېھقانلار ئارامگاھى مېھمانلار بىلەن لىق تولدى. نەشپۈت چېچىكى بايرىمى مەزگىلىنىڭ تۈرتكىسىدە كەنت ئاھالىلىرىنىڭ كىرىمى 200 مىڭ يۈەندىن ئاشتى.
نەشپۈت چېچىكى بايرىمىنىڭ تۈرتكىسىدە، ئەتراپتىكى ئامما بەس-بەستە مەنزىرە رايونىدا كاۋاپ يايمىسى ئاچتى، ئۆزگىچە قول ھۈنەر بۇيۇملىرى ۋە تۈرلۈك ئۇششاق تاۋارلارنى ساتتى، نەشپۈت چېچىكى كەنتنى گۈزەللەشتۈرۈپلا قالماي، يەنە كەنت ئاھالىلىرىنىڭ ھەميىنىنىمۇ تومپايتتى.
ھەر يىلى ئۆرۈك چېچىكى بايرىمى، نەشپۈت چېچىكى بايرىمىدا، قوشتۈگمەن كەنتىدىكى روزى ئابلا نەق مەيدانغا بېرىپ يايما يېيىپ كاۋاپ، پولۇ ساتتى، ھەر قېتىملىق نەشپۈت چېچىكى بايرىمىدا، ئۇ 3000 يۈەندىن ئارتۇق كىرىم قىلىپ، ئۆيىنىڭ ئالدىدىلا پۇل تاپىدىغان بولدى، بۇ ئۇنىڭ ئائىلىسىدىكىلەرنى ناھايىتى خۇشال قىلدى.
كەنت ئاھالىلىرى ساياھەتچىلەرگە ئۆزىنىڭ قول ھۈنەر بۇيۇملىرىنى تونۇشتۇرماقتا. ئىختىيارىي مۇخبىر لى شىنفاڭ فوتوسى
«سىرتتا ئىشلىگەندىن كۆپ ياخشىكەن.» دېھقانلار ئارامگاھىنىڭ سودىسى توغرىسىدا پاراڭلاشقاندا، قوشتۈگمەن كەنتىدىكى ياڭگۇاڭ ئاشخانىسىنىڭ خوجايىنى ئامىنە ئابدۇراخمان خۇشال ھالدا مۇنداق دېدى: «ھەر يىلى ئۆرۈك چېچىكى، نەشپۈت چېچىكى ئېچىلىدىغان مەزگىل سودا ئەڭ ياخشى بولىدىغان مەزگىل، بۇلتۇر 50 مىڭ يۈەندىن ئارتۇق پۇل تاپتىم.»
«بۇ قېتىمقى نەشپۈت چېچىكى بايرىمىغا بىز ئۆزىمىز ئېچىتقان مېۋە ھارىقىنى ئېلىپ كەلدۇق، كۆپچىلىك ھەقسىز تېتىپ باقسا بولىدۇ. نۇرغۇن ساياھەتچى نەق مەيداندا تېتىغاندىن كېيىن تېلېفون نومۇرۇمنى قوشۇۋالدى، مېۋە ھارىقىمنىڭ سېتىلىش يوللىرى ئېچىلدى.» دېدى قاراباغ يېزىسى شىڭخۇا كەنتى كەسىپلەر رايونى بەيگوچۈەن ھاراق زاۋۇتىدىن كەلگەن جاڭ چۈەنلېي.
«قاراباغ يېزىسى يېزا-كەنت ساياھەت نام كارتىسىنى چاقنىتىپ، ئۆرۈك چېچىكى بايرىمى، ئاق ئۆرۈك مەدەنىيەت بايرىمى قاتارلىق ساياھەت بايراملىرىنى ئۇدا ئۆتكۈزۈپ، يېزا-كەنت ساياھەتچىلىكىنى تەرەققىي قىلدۇرۇپلا قالماي، يەنە تونۇلۇش دەرىجىسىنى ئۆستۈردى، شۇنداقلا ئاممىنىڭ كىرىمىنى ئاشۇرۇشقا تۈرتكە بولۇپ، يېزا-كەنتلەرنىڭ گۈللىنىشىگە كۈچ قوشتى.» دېدى بۈگۈر ناھىيەسى قاراباغ يېزىلىق پارتىيە كومىتېتىنىڭ شۇجىسى لۈ جيابىڭ.
مەملىكەتنىڭ ھەر قايسى جايلىرىدىن كەلگەن ساياھەتچىلەر گۈل دېڭىزىدا سەيلە قىلماقتا. ئىختىيارىي مۇخبىر لى شىنفاڭ فوتوسى
يېقىنقى يىللاردىن بۇيان، بۈگۈر ناھىيەسى چېچەكنى ۋاسىتە قىلىپ، ئۆرۈك چېچىكى، نەشپۈت چېچىكى، شاپتۇل چېچىكى قاتارلىق ئوخشاش بولمىغان چېچەك مەزگىلىدىكى خاس ساياھەت تۈرلىرىنى ئۈزلۈكسىز بەرپا قىلىپ، ساياھەتچىلەرنى گۈل سەيلىسى قىلىشقا جەلپ قىلىش بىلەن بىللە، باھار سەيلىسى، گۈزەل يېزا-كەنت ساياھىتى، خەلق ئۆرپ-ئادەت ساياھىتى بىر گەۋدىلەشكەن «گۈل سەيلىسى ئىقتىسادى» نى داۋاملىق بەرپا قىلىپ، «ئىستىراھەت ساياھىتى+ئۈزۈش باغچىسى+دېھقان ئائىلىسى» دىن ئىبارەت ھەمتۈرتكە بولۇش ئەندىزىسىنى بەرپا قىلىش ئارقىلىق، «چېچەك سەيلىسى+يېزا-كەنت ساياھىتى» كەسىپ زەنجىرىنى شەكىللەندۈرۈپ، زامانىۋى يېزا ئىگىلىكى بىلەن ساياھەتچىلىكنىڭ بىرلىشىشىنى كۈچلۈك ئىلگىرى سۈرۈپ، يېزا-كەنت ساياھىتى ئارقىلىق يېزا-كەنتلەرنى گۈللەندۈرۈشكە كۈچ قوشۇپ، يېزا-كەنتلەرنى گۈللەندۈرۈشكە ھاياتىي كۈچ قوشتى.
(ئىختىيارىي مۇخبىر لى شىنفاڭ)
