ئانار بۇلۇت\شىنجاڭ گېزىتى خەۋىرى (مۇخبىرىمىز جاڭ شياۋمى خەۋەر قىلىدۇ) 4-ئاينىڭ 16-كۈنى، مۇخبىرىمىزنىڭ ئاپتونوم رايونلۇق مەدەنىيەت ۋە ساياھەت نازارىتىدىن ئىگىلىشىچە، 5-ئاينىڭ 19-كۈنى 13-قېتىملىق «جۇڭگو ساياھەت كۈنى»دە، پۈتۈن شىنجاڭنىڭ ھەرقايسى جايلىرى 100 خىلدىن ئارتۇق مول مەزمۇنلۇق مەدەنىيەت-ساياھەت پائالىيىتىنى قانات يايدۇرىدىكەن.
ئاپتونوم رايونلۇق مەدەنىيەت ۋە ساياھەت نازارىتى، بايىنغولىن موڭغۇل ئاپتونوم ئوبلاستلىق خەلق ھۆكۈمىتى مەسئۇل بولۇپ ئۆتكۈزگەن شۆبە يىغىن مەيدانى پائالىيىتى لوپنۇر ناھىيەسىنىڭ لوپنۇرلۇقلار كەنتىدە ئۆتكۈزۈلىدۇ.
لوپنۇر ناھىيەسىنىڭ لوپنۇرلۇقلار كەنتى مەنزىرە رايونىدا، ساياھەتچىلەر دىنامىكىلىق ئۈچ بۇلۇڭلۇق قاناتقا ئولتۇرۇپ قۇملۇق مەنزىرىسىنى تاماشا قىلماقتا.
ئاپتونوم رايونلۇق مەدەنىيەت ۋە ساياھەت نازارىتى ساياھەتچىلىكنى ئومۇملاشتۇرۇش ۋە تاشقى ئالاقە باشقارمىسىنىڭ باشقارما باشلىقى جاڭ رۇيخۇا تونۇشتۇرۇپ مۇنداق دېدى: بۇ يىلقى جۇڭگو ساياھەت كۈنىنىڭ باش تېمىسى <گۈزەل جۇڭگو، بەخت سەپىرى>، بىز كۆپ خىل پائالىيەتلەر ئارقىلىق ساياھەتچىلىك بىلەن شۇغۇللانغۇچىلارنىڭ ئىشەنچىسىنى يەنىمۇ ئاشۇرۇپ، ساياھەت بازىرىنىڭ ئىستېمال يوشۇرۇن كۈچىنى ئۇرغۇتۇپ، مەدەنىيەت ۋە ساياھەت بازىرىنىڭ تېز ئەسلىگە كېلىشى ۋە تەرەققىياتىنى ئىلگىرى سۈرۈپ، ئومۇمىي خەلقنىڭ ساياھەتتىن ئورتاق بەھرىمەن بولۇشىنى ئىشقا ئاشۇرىمىز».
ساياھەتچىلەر لوپنۇر ناھىيەسى لوپنۇرلۇقلار كەنتى مەنزىرە رايونىدا تۆگە مىنمەكتە.لى فېي فوتوسى
جۇڭگو ساياھەت كۈنى مەزگىلىدە، ئاپتونوم رايونىمىز «ئاممىۋى ساياھەتنى چوڭقۇر ئىلگىرى سۈرۈش، يېشىل ساياھەتچىلىكنى راۋاجلاندۇرۇش ئۈستىدە ئىزدىنىش، ئاقىل ساياھەتچىلىكنى تېز يېتىلدۈرۈش، مەدەنىي ساياھەتنى پائال تەشەببۇس قىلىش، مەدەنىيەت بىلەن ساياھەتنىڭ چوڭقۇر يۇغۇرۇلۇشىنى ئىلگىرى سۈرۈش»نى تېما قىلىپ، لوپنۇرلۇقلارنىڭ كۆچۈش، يۇغۇرۇلۇش يولىدا قايتا مېڭىش، «يىپەك يولىدىكى تاغ-دەريالار، ھەيۋەتلىك ھەم گۈزەل شىنجاڭ» ساياھەت بايلىقىنى تونۇشتۇرۇش يىغىنى، «شىنجاڭغا جەم بولۇش، بۇلۇتتا بايىنغولىن ئوبلاستىنى ساياھەت قىلىش» توردا كېڭەيتىش، «چېگرادا قەدىمىي قاپىيە، يىپەك يولىدىكى يېڭى سادا» غەيرىي ماددىي مەدەنىيەت مىراسلىرى كۆرگەزمىسى قاتارلىق بىر قاتار مەدەنىيەت-ساياھەت ئاساسىي تېما پائالىيىتى قاتارلىقلارنى تەشكىللەيدۇ.
