□ئانار بۇلۇت\شىنجاڭ گېزىتى مۇخبىرى ياۋ گاڭ
يېقىندا، مەدەنىيەت ۋە ساياھەت مىنىستىرلىقى، تەنتەربىيە باش ئىدارىسى 2 - تۈركۈمدىكى دۆلەت دەرىجىلىك قار تېيىلىش ساياھەت ئىستىراھەت ئورۇنلىرى تىزىملىكىنى ئېلان قىلدى، كۆكتوقايدىكى كۆكتوقاي قار تېيىلىش ساياھەت ئىستىراھەت ئورنى تىزىملىكتىن ئورۇن ئالدى، بۇلتۇر ئالتاي قار تېيىلىش ساياھەت ئىستىراھەت ئورنى، ئۈرۈمچى نەنسەن تېغى قار تېيىلىش ساياھەت ئىستىراھەت ئورنىمۇ بۇ دۆلەت دەرىجىلىك نامغا ئېرىشكەنىدى.
شىنجاڭدىكى ئۈچ جاينىڭ ئىككى يىلدا دۆلەت دەرىجىلىك قار تېيىلىش ساياھەت ئىستىراھەت ئورنى دېگەن نامغا ئېرىشىشى ساياھەت يۈرۈشلۈك مۇلازىمەت ئەسلىھەلىرىنىڭ بارغانسېرى مۇكەممەللىشىپ، يەككە قار پەسلى تىجارىتىدىن تۆت پەسىل ساياھەت ئىستىراھەت تىجارىتىگە قاراپ تەرەققىي قىلىپ، قار تېيىلىش ساياھەت ئىستىراھەت كەيپىياتىنىڭ ئۈزلۈكسىز يۇقىرى كۆتۈرۈلۈپ، ساياھەتچىلەرنى تېخىمۇ كەسپىي ئىستىراھەت مۇلازىمىتى بىلەن تەمىنلەپ، سوغۇق بايلىقنى قىزغىن ئىپادىلەشنى ئىشقا ئاشۇرغانلىقىدىن بولدى.
بۇ يىل 3 - ئاينىڭ 1 - كۈنىگىچە، شىنجاڭدىكى S دەرىجىلىك 36 قار تېيىلىش مەيدانى جەمئىي 993 مىڭ 321 ئادەم قېتىم ساياھەتچىنى كۈتۈۋېلىپ، 105 مىليون يۈەن ساياھەت كىرىمى ياراتتى. بۇنىڭ ئىچىدە 5S ،4S قار تېيىلىش مەيدانلىرى جەمئىي 765 مىڭ 179 ئادەم قېتىم ساياھەتچىنى كۈتۈۋالغان بولۇپ، S دەرىجىلىك قار تېيىلىش مەيدانلىرى كۈتۈۋالغان ئومۇمىي ئادەم سانىنىڭ ％77.03ىنى ئىگىلەپ، 89 مىليون يۈەن ساياھەت كىرىمى ياراتتى. «سانلىق مەلۇماتلارنى تەھلىل قىلىش ئارقىلىق شۇنى كۆرۈۋېلىشقا بولىدۇكى، 5S ،4S قار تېيىلىش مەيدانلىرىنى چۆرىدەپ بەرپا قىلىنغان ئالتاي، ئۈرۈمچى نەنسەن تېغى قار تېيىلىش ساياھەت ئىستىراھەت ئورنى نۇرغۇن ساياھەتچىنى جەلپ قىلغان. قار تېيىلىش مەيدانى ھەمدە ئەتراپتىكى ئائىلىۋى مېھمانخانا، مېھمانساراي، يېمەك - ئىچمەك، كۆڭۈل ئېچىش قاتارلىق يۈرۈشلۈك ئەسلىھەلەرنىڭ مۇكەممەللىشىشى كىشىلەرنىڭ قار تېيىلىش ساياھەت ئىستىراھەت ئېھتىياجىنى قاندۇردى» دېدى ئاپتونوم رايونلۇق مەدەنىيەت ۋە ساياھەت نازارىتى بازار باشقارمىسىنىڭ باشقارما باشلىقى ساۋ جىخۇي.
3 - ئاينىڭ 4 - كۈنىدىن 5 - كۈنىگىچە، 2022 − 2023 - يىللىق ئۈرۈمچى شەھىرى شەھەر ئاھالىلىرى قىشلىق تەنھەرىكەت مۇسابىقىسىنىڭ ياشلار، ئۆسمۈرلەر ئېگىز تاغدا قار تېيىلىش مۇسابىقىسى يىپەك يولى خەلقئارا ئىستىراھەت رايونىدا ئۆتكۈزۈلدى. بۇ ئىستىراھەت رايونى ئۈرۈمچى نەنسەن تېغى قار تېيىلىش ساياھەت ئىستىراھەت ئورنىغا جايلاشقان بولۇپ، بۇلتۇر قىش، بۇ يىل ئەتىيازدا مارافونچە قار تېيىلىش، ياشلار، ئۆسمۈرلەر ئېگىز تاغدا قار تېيىلىش مۇسابىقىسى، يەككە تاختا باغچىسىدا ئىختىيارىي ماھارەت كۆرسىتىش مۇسابىقىسى قاتارلىق ئون تۈرگە يېقىن مۇسابىقە ئۆتكۈزۈلدى. «قىشتا قار تېيىلغىلى، قار تاماشاسى قىلغىلى، ئارشاڭغا چۈشكىلى، يازدا سەيلە قىلغىلى، پىيادە ماڭغىلى، دالىدا قونغىلى بولىدۇ.» بۇ ئىستىراھەت رايونى ماركا كېڭەيتىش بۆلۈمىنىڭ دىرېكتورى جەي تىڭفېي مۇنداق دېدى: ئىستىراھەت رايونى قار تېيىلىش، يېمەك - ئىچمەك، مېھمانساراي، ئارشاڭ، سەيلە - ساياھەت قاتارلىق بىر قاتار ئىستىراھەت مەھسۇلاتلىرىنى شەكىللەندۈردى.
ئۈرۈمچى شەھىرى نەنسەن تېغى مەنزىرە رايونى باشقۇرۇش كومىتېتىنىڭ مۇئاۋىن مۇدىرى، ئۈرۈمچى ناھىيەلىك مەدەنىيەت - تەنتەربىيە - رادىيو - تېلېۋىزىيە ۋە ساياھەت ئىدارىسى پارتىيە گۇرۇپپىسىنىڭ شۇجىسى ۋېي جيەنيې مۇنداق تونۇشتۇردى: ئۈرۈمچى نەنسەن تېغى قار تېيىلىش ساياھەت ئىستىراھەت ئورنى قار - مۇز بايلىقىنى چۆرىدەپ، قار - مۇز خاس كىچىك بازارلىرىغا تايىنىپ قىشلىق قار - مۇز تەنھەرىكىتى، ساياھەتچىلىكىنى تەرەققىي قىلدۇردى، ئەتىياز، ياز، كۈز پەسىللىرىدە ئېكولوگىيەلىك سەيلە - ساياھەت، ئىستىراھەت - دەم ئېلىش، تەنتەربىيە مۇسابىقىسى، ساغلاملىق - كۈتۈنۈش، سودا ئىشلىرى، ئېكسپېدىتسىيە، ئائىلىۋى ساياھەت، مەدەنىيەت تەسىراتى، ئۆزى ئاپتوموبىل ھەيدەپ ساياھەت قىلىش قاتارلىق ساياھەت مەھسۇلاتلىرىنى ئاچتى.
«قار - مۇز ساياھەت بايلىقىنى بىرىكتۈرۈپ، قار - مۇز بايلىقىغا بىرلەشتۈرۈپ كۆپ مەنبەلىك قار - مۇز ساياھەت مەھسۇلاتلىرىنى ئاچتۇق، بۇ جەھەتتە قار - مۇز ساياھەت ئىستىراھەت ئورۇنلىرى كۆلەملىك توپلىشىش ئېففېكتىنى جارى قىلدۇردى» دېدى شىنجاڭ قار - مۇز تەنتەربىيە ھەرىكىتى جەمئىيىتىنىڭ مۇئاۋىن جەمئىيەت باشلىقى ۋاڭ جىڭ.
نۆۋەتتە، شىنجاڭدىكى ھەرقايسى جايلار ئاپتونوم رايوننىڭ «يەنىمۇ ئىلگىرىلىگەن ھالدا بوغما ھالەت چەكلىمىسىنى بۇزۇپ تاشلاپ، ئاپتونوم رايوننىڭ قار - مۇز تەنھەرىكىتى ۋە قار - مۇز ساياھىتىنىڭ يۇقىرى سۈپەتلىك تەرەققىياتىغا تۈرتكە بولۇش توغرىسىدىكى ھەرىكەت لايىھەسى (2022 - يىلىدىن 2025 - يىلىغىچە)»گە ئاساسەن، قار - مۇز ساياھەت ئىستىراھەت ئورنى قۇرۇلۇشىنى جىددىي ئورۇنلاشتۇرماقتا. ئاپتونوم رايونلۇق مەدەنىيەت ۋە ساياھەت نازارىتى بايلىق ئېچىش باشقارمىسىنىڭ مۇئاۋىن باشقارما باشلىقى جوۋ خاۋ مۇنداق تونۇشتۇردى: ئىلى قازاق ئاپتونوم ئوبلاستى، ئالتاي ۋىلايىتى، بورتالا موڭغۇل ئاپتونوم ئوبلاستى، سانجى خۇيزۇ ئاپتونوم ئوبلاستى، ئۈرۈمچى شەھىرى قاتارلىق نۇقتىلىق رايونلاردا يېڭىدىن بىردىن ئىككىگىچە دۆلەت دەرىجىلىك قار تېيىلىش ساياھەت ئىستىراھەت ئورنى، بىردىن ئىككىگىچە دۆلەت تەنتەربىيە ساياھىتى بويىچە ئۈلگە كۆرسىتىش بازىسى كۆپەيتىلىدۇ.
«قار تېيىلىش ساياھەت ئىستىراھەت ئورۇنلىرىنى پىلانلاپ ئورۇنلاشتۇرۇش بىلەن بىللە، بۇ ۋىۋىسكىنى تېخىمۇ ياخشى قوغداش ۋە ئۇنىڭدىن ياخشى پايدىلىنىش كېرەك.» شىنجاڭ مالىيە - ئىقتىساد داشۆسى ساياھەت شۆيۈەنىنىڭ مۇئاۋىن تەتقىقاتچىسى شۈ شياۋلياڭ مۇنداق تەكلىپ بەردى: قار تېيىلىش ساياھەت ئىستىراھەت ئورۇنلىرى خەلقئارا قار تېيىلىش ساياھەت ئىستىراھەت ئورۇنلىرىنىڭ تەرەققىيات يېڭى يۈزلىنىشى بويىچە ئۆلچەمگە توغرىلىنىپ، شارائىتقا قاراپ ئىش كۆرۈپ، بىرلا خىل قار پەسلى تىجارىتىدىن تۆت پەسىل ساياھەت ئىستىراھەت تىجارىتىگە قاراپ تەرەققىي قىلىش يولى ۋە ئەندىزىسىنى ئەمەلىيەتتىن ئۆتكۈزۈش ئۈستىدە پائال ئىزدىنىپ، «كۆپ كەسىپ ھالىتى، كۆپ يول ھەمكارلىقىنى كېڭەيتىپ، قار - مۇز مۇسابىقىسى بويىچە ماھارەت كۆرسىتىش، قار تېيىلىش ئىستىراھەت ساياھىتى، زاكازلىق كۆڭۈل ئېچىش پائالىيىتى، خاس بايرام تەنتەنىسى، قار - مۇز تەنھەرىكىتى بويىچە تەربىيەلەش قاتارلىق كۆپ ئۆلچەملىك قار - مۇز ساياھەت مەھسۇلاتلىرى ھەمدە قار تېيىلىش ساياھىتى ئۇزارتىلغان تۆت پەسىل ئىستىراھەت مەھسۇلاتلىرىدا يېڭىلىق يارىتىپ، قار تېيىلىش ساياھەت ئىستىراھەت كەيپىياتىنى گەۋدىلەندۈرۈشى كېرەك».
