12-ئاينىڭ 26-كۈنى، «قىشلىق ئولىمپىك تەنھەرىكەت مۇسابىقىسىنى خۇشال كۈتۈۋېلىش · قار-مۇز بىلەن قاپلانغان بايىنغولىن ئوبلاستىنى ساياھەت قىلىش» 8-نۆۋەتلىك مەملىكەتلىك ئاۋام قار-مۇز پەسلى ۋە كورلا شەھىرى 2021 قار-مۇز ساياھەت پەسلىنىڭ باشلىنىش مۇراسىمى نەق مەيدانىدا ئارتىسلار ئەجدىھا ئۇسسۇلى ئوينىماقتا. ئىختىيارىي مۇخبىر خۇاڭ ۋەنلى فوتوسى
ئانار بۇلۇت\شىنجاڭ گېزىتى خەۋىرى (مۇخبىر دۇ جيەنخۇي خەۋەر قىلىدۇ) 12-ئاينىڭ 26-كۈنى، «قىشلىق ئولىمپىك تەنھەرىكەت مۇسابىقىسىنى خۇشال كۈتۈۋېلىش، قار-مۇز بىلەن قاپلانغان بايىنغولىن ئوبلاستىنى ساياھەت قىلىش» 8-نۆۋەتلىك مەملىكەتلىك ئاۋام قار-مۇز پەسلى ۋە كورلا شەھىرى 2021 قار-مۇز ساياھەت پەسلى كورلا شەھىرىنىڭ لۇڭجىشەن دۇڭگۇي قار تېيىلىش مەيدانىدا رەسمىي باشلاندى.
پائالىيەت نەق مەيدانىدا ئېسىل قار-مۇز كۆرگەزمىسى، قاردا ئارغامچا تارتىشىش ھەمدە يەككە تاختا، قوش تاختىدا قار تېيىلىش قاتارلىق پائالىيەتلەر ئۆتكۈزۈلدى. «قار تېيىلىش مەيدانىنىڭ پائالىيەتلىرى ناھايىتى مول، ئىشىك ئالدىدىلا قار-مۇز تەنھەرىكىتىدىن ھۇزۇرلانغىلى بولىدۇ، ناھايىتى قولايلىق.» ساياھەتچى چى بىن خۇشال ھالدا شۇنداق دېدى.
كورلا شەھىرىنىڭ قار-مۇز ساياھەت پەسلى پائالىيىتى ئىككى ئايدىن كۆپرەك داۋاملىشىدۇ. پائالىيەت مەدەنىيەت-سەنئەت تۈرى، ساياھەت تۈرى ۋە تەنتەربىيە تۈرىگە ئايرىلغان بولۇپ، ئوخشاش بولمىغان قار-مۇز پەسلى ساياھەت لىنىيەسىدىن بەشى پىلانلانغان، مىللىي ئۆرپ-ئادەت ئويۇنى، ئاممىۋى ئەدەبىيات-سەنئەت كۆرىكى، ئات ئويۇنى، تەشتەكتە تىكىلگەن ئالمىنى تاماشا قىلىش، بۆلجۈرگەن ئۈزۈش ساياھىتى قاتارلىق 35 تۈرلۈك شەكلى يېڭى، مەزمۇنى مول پائالىيەتلەر ئۆتكۈزۈلىدۇ.
12-ئاينىڭ 26-كۈنى، باشلىنىش مۇراسىمى نەق مەيدانىدا، بالىلار خۇشال ھالدا سۈرەتكە چۈشتى. ئىختىيارىي مۇخبىر دىلارە ئەخمەت فوتوسى
بۇنىڭدىن بۇرۇن، كورلا شەھىرى يەنە شەھەر رايونىدىن شياڭلى نانچىلىق كەسىپلەر باغچىسىغا ھەقسىز قاتنايدىغان نۆۋەتچى ئاپتوبۇس سېلىپ، شەھەر ئاھالىلىرىنىڭ كېچىدە سىرتقا چىقىشىغا قولايلىق ياراتقانىدى. شۇنىڭ بىلەن بىللە، يەنە كورلا شەھىرىدىن باغراش كۆلى داخېكوۋ مەنزىرە رايونىغا، لوپنۇر ناھىيەسىدىكى لوپنۇرلۇقلار كەنتى مەنزىرە رايونىغا بارىدىغان قىشلىق ساياھەت مەخسۇس لىنىيەسىنى ئاچقانىدى.
كورلا شەھەرلىك پارتىيە كومېتىتى دائىمىي كومىتېتىنىڭ ئەزاسى، تەشۋىقات بۆلۈمىنىڭ بۆلۈم باشلىقى خېنىمگۈل ئەمەت مۇنداق دېدى: بۇ نۆۋەتلىك قار-مۇز ساياھەت پەسلى يۈرۈشلۈك پائالىيەتلىرىدە «ھۆكۈمەت سەھنە ھازىرلاش، كارخانىلار ماھارەت كۆرسىتىش»تىن ئىبارەت خىزمەت تەپەككۇرىدا چىڭ تۇرۇپ، «تەنتەربىيە + ساياھەت»نى مۇھىم نۇقتا قىلىپ، ياشلار، ئۆسمۈرلەر قار-مۇز تەنھەرىكىتىنى زور كۈچ بىلەن ئومۇملاشتۇرۇپ، كورلا شەھىرىنىڭ قىشلىق ساياھەت بايلىقىنى جانلاندۇرۇپ، قىشلىق ساياھەت مەھسۇلاتلىرىنىڭ يېڭى كەسىپ ھالىتىنى بەرپا قىلىپ، «سەيۋەيدىكى مەرۋايىت، تاغ-دەريالىق نەشپۈت شەھىرى» مەدەنىيەت-ساياھەت ماركىسىنىڭ تونۇلۇش دەرىجىسىنى ئۆستۈردى.
