گېزىتىمىز ئوبزورچىسى
ساياھەت گۈللەنسە، ھەممە كەسىپ گۈللىنىدۇ. ئاپتونوم رايونلۇق ساياھەت تەرەققىيات يىغىنى شىنجاڭ ساياھەتچىلىكىنىڭ «قايتا ئاتلىنىش» ئاتاكا سىگنالىنى ياڭراتتى، بۇ، ساياھەت ئارقىلىق شىنجاڭنى گۈللەندۈرۈش ئىستراتېگىيەسىنى چوڭقۇر يولغا قويۇپ، شىنجاڭ ساياھەتچىلىكىنىڭ يۇقىرى سۈپەتلىك تەرەققىياتىغا تۈرتكە بولۇشنى تېزلىتىپ، ئاپتونوم رايونىمىزنىڭ ساياھەت بايلىقى چوڭ رايوندىن ساياھەت ئىقتىسادى كۈچلۈك رايونغا ئايلىنىشىغا تۈرتكە بولۇشتا مۇھىم ئەھمىيەتكە ئىگە.
يىغىندا، باش شۇجى شى جىنپىڭنىڭ مەدەنىيەت ۋە ساياھەت خىزمىتى توغرىسىدىكى مۇھىم بايانلىرىنىڭ روھى چوڭقۇر ئىزچىللاشتۇرۇلۇپ، ئەمەلىيلەشتۈرۈلۈپ، يېڭى دەۋردىكى پارتىيەنىڭ شىنجاڭنى ئىدارە قىلىش تەدبىرى تولۇق، دەل جايىدا ئىزچىللاشتۇرۇلۇپ، ساياھەت تەرەققىيات ۋەزىيىتى تەھلىل قىلىنىپ ۋە مۇھاكىمە قىلىنىپ، ھازىرقى ۋە بۇنىڭدىن كېيىنكى بىر مەزگىلدىكى ئاپتونوم رايونىمىزنىڭ ساياھەتچىلىكنىڭ يۇقىرى سۈپەتلىك تەرەققىياتىغا تۈرتكە بولۇشتىكى مۇھىم ۋەزىپىسى ۋە كاپالەتلەندۈرۈش تەدبىرلىرى ئايدىڭلاشتۇرۇلدى. ئاپتونوم رايون بويىچە يۇقىرىدىن تۆۋەنگىچە ئىجتىمائىي مۇقىملىق ۋە ئەبەدىي ئەمىنلىك باش نىشانىنى ئىشقا ئاشۇرۇشقا تۈرتكە بولۇش ئىستراتېگىيە يۈكسەكلىكىدە تۇرۇپ، ساياھەتچىلىكنى تەرەققىي قىلدۇرۇشنىڭ مۇھىم رولىنى چوڭقۇر تونۇپ، شىنجاڭ ساياھەتچىلىكىنىڭ يۇقىرى سۈپەتلىك تەرەققىياتىغا تۈرتكە بولۇشتىكى مەسئۇلىيەت تۇيغۇسى ۋە تەخىرسىزلىك تۇيغۇسىنى ھەقىقىي كۈچەيتىش كېرەك.
شىنجاڭنىڭ تەبىئىي مەنزىرىسى ئاجايىپ گۈزەل ھەم ھەيۋەتلىك، تارىخىي مەدەنىيەت ئاساسى چوڭقۇر، مىللەتلەر ئۆرپ ـ ئادىتى قويۇق ھەم رەڭدار، مۇشۇنداق مول، ئەلا سۈپەتلىك ساياھەت بايلىقىغا ئىگە ھەم ئالاھىدە بولغان رايون ئەۋزەللىكىنى ھازىرلىغان شىنجاڭ ساياھەتچىلىكىنىڭ تەرەققىياتى زور ئىستىقبالغا ئىگە. ساياھەتچىلىكنى تەرەققىي قىلدۇرۇش ئىقتىسادىي قۇرۇلمىنى ئەلالاشتۇرۇش، كەسىپ تەرەققىياتىغا تۈرتكە بولۇش، ئىستېمال ئېھتىياجىنى قوزغىتىش، ئىشقا ئورۇنلىشىش، كىرىمنى ئاشۇرۇشنى ئىلگىرى سۈرۈش، مىللەتلەر ئىتتىپاقلىقىنى ئىلگىرى سۈرۈش، مەدەنىيەت تۇرمۇشىنى بېيىتىش، شىنجاڭ ئوبرازىنى نامايان قىلىشتا مۇھىم رول ئوينايدۇ، بۇ، يېڭى دەۋردىكى پارتىيەنىڭ شىنجاڭنى ئىدارە قىلىش تەدبىرىنى ئىزچىللاشتۇرۇش، ئەمەلىيلەشتۈرۈش، شىنجاڭنىڭ ئىجتىمائىي مۇقىملىق ۋە ئەبەدىي ئەمىنلىك باش نىشانىنى ئىشقا ئاشۇرۇشتىكى مۇقەررەر تەلەپ، يېڭى تەرەققىيات ئىدىيەسىنى ئىزچىللاشتۇرۇش، ئەمەلىيلەشتۈرۈش، شىنجاڭنىڭ يۇقىرى سۈپەتلىك تەرەققىياتىغا تۈرتكە بولۇشتىكى مۇھىم تەدبىر، خەلق تۇرمۇشىنى ياخشىلاش، نامراتلىقتىن قۇتۇلدۇرۇش ئۆتكىلىگە ھۇجۇم قىلىش نەتىجىلىرىنى مۇستەھكەملەش، كېڭەيتىش، يېزا ـ كەنتلەرنى گۈللەندۈرۈشنى ئومۇميۈزلۈك ئالغا سىلجىتىشتىكى ئۈنۈملۈك يول.
يېقىنقى يىللاردىن بۇيان، يولداش شى جىنپىڭ يادرولۇقىدىكى پارتىيە مەركىزىي كومىتېتىنىڭ كۈچلۈك رەھبەرلىكىدە، ئاپتونوم رايونىمىز ساياھەت ئارقىلىق شىنجاڭنى گۈللەندۈرۈش ئىستراتېگىيەسىنى زور كۈچ بىلەن يولغا قويدى، ساياھەتچىلىك جۇش ئۇرۇپ تەرەققىي قىلىدىغان تېز سۈرئەتلىك يولغا كىردى. ئەسىر يۇقۇمى ئالدىدا، ساياھەتچىلىكنىڭ تەرەققىياتى بەلگىلىك تەسىرگە ئۇچرىغان، ساياھەتچىلەر سانى سەل ئازلىغان بولسىمۇ، لېكىن يۇقۇمنىڭ دائىملىق ئالدىنى ئېلىش ـ تىزگىنلەشنىڭ تېخىمۇ دەل جايىدا، ئۈنۈملۈك بولۇشىغا ئەگىشىپ، ئىقتىساد، جەمئىيەت تەرەققىياتىنىڭ پوتېنسىيال ئېنېرگىيەسى قويۇپ بېرىلدى، ھەرقايسى جايلاردىكى ساياھەتچىلەرنىڭ گۈزەل شىنجاڭدىن ھۇزۇرلىنىش ئارزۇسى ئىنتايىن كۈچلۈك بولدى، ساياھەتچىلىكنىڭ جانلىنىش، ئەسلىگە كېلىش ئىستىقبالى ياخشى بولۇپ، شىنجاڭ ساياھەتچىلىكىنىڭ تەرەققىيات يوشۇرۇن كۈچى غايەت زور.
شۇنىڭ بىلەن بىللە، بىز يەنە شۇنى سەگەكلىك بىلەن تونۇپ يېتىشىمىز كېرەككى، قېرىنداش ئۆلكە، ئاپتونوم رايون، بىۋاسىتە قاراشلىق شەھەرلەر، بولۇپمۇ ساياھەتچىلىك تەرەققىي قىلغان ئۆلكىلەر بىلەن سېلىشتۇرغاندا، تەرەققىيات ئىدىيەسى، بايلىق تەقسىملەش، ماركا يارىتىش، ماركېتىڭنى تەشۋىق قىلىش، مۇلازىمەت سۈپىتى، ئىستېمالغا تۈرتكە بولۇش، ئىختىساسلىقلارنى يېتىشتۈرۈش قاتارلىق جەھەتلەردە بىزدە يەنىلا بىرقەدەر زور پەرق مەۋجۇت. ئەھمىيەت بېرىش ۋە پىلانلاش يېتەرلىك بولماسلىق، بايلىق ئېچىش يېتەرلىك بولماسلىق، ئىستېمالغا تۈرتكە بولۇش ئىقتىدارى بىرقەدەر ئاجىز بولۇش، مۇلازىمەت ئىقتىدارىدا يەنىلا كەمتۈكلۈك بولۇش، بازار سۇبيېكتلىرى كۈچلۈك بولماسلىق، مەدەنىيەت بىلەن ساياھەتنىڭ يۇغۇرۇلۇش دەرىجىسى چوڭقۇر بولماسلىق، ئىختىساسلىقلار قوشۇنى كەمچىل بولۇش قاتارلىقلاردا كونكرېت ئىپادىلىنىۋاتىدۇ. بۇ مەسىلىلەرگە قارىتا، بىز جەزمەن يۈكسەك ئەھمىيەت بېرىپ، تېخىمۇ زور ئىرادە، تېخىمۇ كۈچلۈك تەدبىر ئارقىلىق ئەستايىدىل تەتقىق قىلىپ ھەل قىلىشىمىز كېرەك.
ساياھەتچىلىك ئۇنىۋېرسال كەسىپ بولۇپ، ئىقتىسادنىڭ ئېشىشىغا تۈرتكە بولىدىغان مۇھىم ھەرىكەتلەندۈرگۈچى كۈچ. بىز ساياھەتچىلىكنىڭ يېتەكلەش، تۈرتكە بولۇش رولىنى ئۈنۈملۈك جارى قىلدۇرۇپ، ساياھەتچىلىكنىڭ يۇقىرى سۈپەتلىك تەرەققىياتىنى ئاساسىي لىنىيە، تەمىنات تەرەپلىك قۇرۇلمىلىق ئىسلاھاتنى تۇتقا قىلىپ، نۇقتىلىق ھالقىلارنى چىڭ تۇتۇپ، پىكىر يولى، تەدبىرلەردە يېڭىلىق يارىتىپ، ساياھەت ئارقىلىق شىنجاڭنى گۈللەندۈرۈش ئىستراتېگىيەسىنى چوڭقۇر يولغا قويۇشىمىز كېرەك. سىستېمىلىق پىلانلاشتا چىڭ تۇرۇپ، بايلىق ئېچىشنى ياخشى ئىشلىشىمىز؛ ئېچىۋېتىش سالمىقىنى زورايتىپ، ئىستېمال يوشۇرۇن كۈچىنى قوزغىتىشىمىز؛ ئۇل ئەسلىھەلەرنى مۇكەممەللەشتۈرۈپ، مۇلازىمەت سۈپىتىنى ئۆستۈرۈشىمىز؛ بازار سۇبيېكتلىرىنى زورايتىپ، تەرەققىيات مۇھىتىنى ئەلالاشتۇرۇشىمىز؛ بازار ماركېتىڭىنى كېڭەيتىپ، ساياھەت ماركىسىنى جۇلالاندۇرۇشىمىز؛ مەدەنىيەت ئىچكى خاس مەزمۇنىنى چوڭقۇر قېزىپ، مەدەنىيەت بىلەن ساياھەتنىڭ يۇغۇرما تەرەققىياتىغا تۈرتكە بولۇشىمىز؛ ساياھەت يوشۇرۇن كۈچىنى قېزىپ، يېڭى ئېشىش نۇقتىسى بەرپا قىلىپ، ساياھەت بايلىقى ئەۋزەللىكىنى ھەقىقىي تۈردە تەرەققىيات ئەۋزەللىكىگە ئايلاندۇرۇشىمىز كېرەك.
يېڭى بۇرچ چاقىرماقتا، يېڭى ئۈمىد جۇش ئۇرماقتا. يېڭى ۋەزىيەتتە، بىز ئىشەنچنى چىڭىتىپ، تولۇق غەيرەتكە كېلىپ، ۋەزىيەتكە قاراپ ئىلگىرىلەپ، پائال نەتىجە يارىتىپ، ساياھەتچىلىكنىڭ ساغلام تەرەققىياتى، يۇقىرى سۈپەتلىك تەرەققىياتىغا تۈرتكە بولۇپ، تىرىشىپ ئاپتونوم رايونىمىز ساياھەتچىلىكىنى ئىقتىسادنىڭ يۇقىرى سۈپەتلىك تەرەققىياتىدىكى گۈللىنىۋاتقان كەسىپ، ھەر مىللەت ئاممىنىڭ كىرىمىنى ئاشۇرۇپ بېيىشىدىكى خەلققە نەپ يەتكۈزىدىغان كەسىپ ۋە شىنجاڭنىڭ ئىتتىپاق مۇقىم، ئىناق، بەختلىك، ئېكولوگىيەسى ياخشى بولغان ۋەزىيىتىنى نامايان قىلىدىغان چولپان كەسىپكە ئايلاندۇرۇپ، ئەمەلىي ھەرىكىتىمىز ئارقىلىق پارتىيە 20 ـ قۇرۇلتىيىنىڭ غەلىبىلىك ئېچىلىشىنى كۈتۈۋېلىشىمىز كېرەك.
