6 ـ ئاينىڭ 27 ـ كۈنى، ئاپتونوم رايونلۇق ساياھەت تەرەققىيات يىغىنى غۇلجا شەھىرىدە ئېچىلدى. ئاپتونوم رايونلۇق پارتىيە كومىتېتىنىڭ شۇجىسى ما شىڭرۇي يىغىنغا قاتناشتى ھەم سۆز قىلدى.□ئانار بۇلۇت\شىنجاڭ گېزىتى مۇخبىرى سۈي جىجيەن فوتوسى

ئانار بۇلۇت\شىنجاڭ گېزىتى مۇخبىرلىرى ياۋ تۇڭ، ۋاڭ شىڭرۇي خەۋەر قىلىدۇ: ئاپتونوم رايونلۇق ساياھەت تەرەققىيات يىغىنى 6 ـ ئاينىڭ 27 ـ كۈنى غۇلجا شەھىرىدە ئېچىلدى. ئاپتونوم رايونلۇق پارتىيە كومىتېتىنىڭ شۇجىسى ما شىڭرۇي يىغىنغا قاتناشتى ھەم سۆز قىلدى، ئۇ مۇنداق تەكىتلىدى: باش شۇجى شى جىنپىڭنىڭ مەدەنىيەت ۋە ساياھەت خىزمىتى توغرىسىدىكى مۇھىم بايانلىرىنى چوڭقۇر ئىزچىللاشتۇرۇپ، ئەمەلىيلەشتۈرۈپ، باش شۇجى شى جىنپىڭنىڭ شىنجاڭ توغرىسىدىكى بىر قاتار مۇھىم سۆزى، مۇھىم يوليورۇقى، تەستىقىي يوليورۇقىنىڭ روھى ۋە 3 ـ قېتىملىق مەركەز شىنجاڭ خىزمىتى سۆھبەت يىغىنىنىڭ روھىنى ئىزچىللاشتۇرۇپ، يېڭى دەۋردىكى پارتىيەنىڭ شىنجاڭنى ئىدارە قىلىش تەدبىرىنى تولۇق، دەل جايىدا ئىزچىللاشتۇرۇپ، شىنجاڭنىڭ ئىجتىمائىي مۇقىملىقى ۋە ئەبەدىي ئەمىنلىكىنى ئىشقا ئاشۇرۇشقا تۈرتكە بولۇش ئىستراتېگىيە يۈكسەكلىكىدە تۇرۇپ، ئىشەنچنى چىڭىتىپ، پائال نەتىجە يارىتىپ، ئاپتونوم رايونىمىز ساياھەتچىلىكىنى تىرىشىپ ئىقتىسادنىڭ يۇقىرى سۈپەتلىك تەرەققىياتىدىكى يېڭىدىن تەرەققىي قىلىۋاتقان كەسىپكە، ھەر مىللەت ئاممىنىڭ كىرىمنى ئاشۇرۇپ بېيىشىدىكى خەلققە نەپ يەتكۈزىدىغان كەسىپكە ۋە شىنجاڭنىڭ ئىتتىپاق ـ مۇقىم، ئىناق ـ بەختلىك، ئېكولوگىيەسى ياخشى بولغان ۋەزىيىتىنى نامايان قىلىدىغان چولپان كەسىپكە ئايلاندۇرۇپ، ئەمەلىي ھەرىكىتىمىز ئارقىلىق پارتىيە 20 ـ قۇرۇلتىيىنىڭ غەلىبىلىك ئېچىلىشىنى كۈتۈۋېلىشىمىز كېرەك.

ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، ئاپتونوم رايوننىڭ رەئىسى ئەركىن تۇنىياز يىغىنغا رىياسەتچىلىك قىلدى. ئاپتونوم رايون رەھبەرلىرىدىن نۇرلان ئەبىلمەجىن، لى يىفېي، مەدەنىيەت ۋە ساياھەت مىنىستىرلىقىنىڭ ئالاقىدار تارماقلىرىدىكى مەسئۇل يولداشلار يىغىنغا قاتناشتى.

ما شىڭرۇي سۆزىدە شىنجاڭنىڭ ساياھەت بايلىقى مول بولۇش، ساياھەتچىلىك ئىستىقبالى پارلاق بولۇشتەك ئەۋزەللىكىنى تەھلىل قىلىپ، شىنجاڭ ساياھەتچىلىكىدىكى تەرەققىيات ئىدىيەسى، بايلىق ئېچىش، ماركا يارىتىش، مۇلازىمەت سۈپىتى، مەدەنىيەت بىلەن ساياھەتنىڭ يۇغۇرۇلۇشى، ئىختىساسلىقلارنى يېتىشتۈرۈش قاتارلىق جەھەتلەردە ساقلىنىۋاتقان يېتەرسىزلىكىنى كۆرسىتىپ بېرىپ، ساياھەت ئارقىلىق شىنجاڭنى گۈللەندۈرۈش ئىستراتېگىيەسىنى چوڭقۇر يولغا قويۇش، ئاپتونوم رايونىمىزنىڭ ساياھەت بايلىقى چوڭ رايوندىن ساياھەت ئىقتىسادى كۈچلۈك رايونغا ئايلىنىشىغا تۈرتكە بولۇشتىكى يەتتە تۈرلۈك نۇقتىلىق خىزمەتنى ئوتتۇرىغا قويدى. بىرىنچى، سىستېمىلىق پىلانلاشتا چىڭ تۇرۇپ، بايلىق ئېچىشنى ياخشى ئىشلەش كېرەك. «بىر ئوق، بىر يادرو، ئىككى چەمبەر، ئۈچ كارىدور، تۆت دەرۋازا، كۆپ تۈگۈن» تەرەققىيات ئەندىزىسىنى تېز بەرپا قىلىپ، ساياھەت يېڭى كەسىپ ھالىتى، يېڭى ئەندىزىسى، يېڭى مەھسۇلاتلىرىنى تەرەققىي قىلدۇرۇپ، نادىر تۈر قۇرۇلۇشىنى يولغا قويۇپ، بىر تۈركۈم دۇنيا دەرىجىلىك ساياھەت مەنزىرە رايونلىرىنى بەرپا قىلىپ، ساياھەت كۆپ كەسىپ ھالىتىنىڭ يۇغۇرما تەرەققىياتىغا تۈرتكە بولۇش كېرەك. ئىككىنچى، ئېچىۋېتىش سالمىقىنى زورايتىپ، ئىستېمال يوشۇرۇن كۈچىنى قوزغىتىش كېرەك. پائال تۈردە «ساياھەتچىلەرنى شىنجاڭغا كېلىشكە جەلپ قىلىپ»، ئۆلكە ھالقىغان ئۆمەك ساياھىتىنى تەرتىپلىك ئەسلىگە كەلتۈرۈپ، شىنجاڭغا ياردەم بېرىۋاتقان ئۆلكە، بىۋاسىتە قاراشلىق شەھەرلەردىكى ساياھەتچىلەرنىڭ شىنجاڭغا يەتكۈزۈلۈشىگە زور كۈچ بىلەن تۈرتكە بولۇپ، «شىنجاڭلىقلار شىنجاڭنى ساياھەت قىلىش»قا ئىلھام بېرىپ، ساياھەت ئىستېمال بازىرىنى جانلاندۇرۇپ، ساياھەتچىلىك ئارقىلىق خەلققە نەپ يەتكۈزۈش، خەلقنى بېيىتىشقا تۈرتكە بولۇش كېرەك. ئۈچىنچى، ئۇل ئەسلىھەلەرنى مۇكەممەللەشتۈرۈپ، مۇلازىمەت سۈپىتىنى ئۆستۈرۈش كېرەك. «تېز كىرىش، ئاستا ساياھەت قىلىش»تىن ئىبارەت پۈتۈن رايون ساياھىتى قاتناش سىستېمىسىنى بەرپا قىلىپ، «پويىزغا ئولتۇرۇپ شىنجاڭنى ساياھەت قىلىش» ماركىسىنى يارىتىپ، تاشيولنى «مەنزىرە رايونلىرى، مەنزىرە نۇقتىلىرىغا تۇتاشتۇرۇش»نى ئالغا سىلجىتىپ، ئاۋىياتسىيە لىنىيەسى تورىنى تاكامۇللاشتۇرۇپ، ساياھەت «ھاجەتخانا ئىنقىلابى»نى ئالغا سىلجىتىپ، «بىر يان تېلېفون بىلەن شىنجاڭنى ساياھەت قىلىش»قا تۈرتكە بولۇپ، يانداش ئەسلىھەلەرنى ئەلالاشتۇرۇپ، مۇلازىمەت ئىقتىدارىنى ئۆستۈرۈپ، بازار تەرتىپىنى قېلىپلاشتۇرۇپ، كەڭ ساياھەتچىلەرنى خۇشاللىق بىلەن كېلىدىغان، خۇشال ـ خۇرام ساياھەت قىلىدىغان، مېھرىنى ئۈزەلمەي قايتىدىغان قىلىش كېرەك. تۆتىنچى، بازار سۇبيېكتلىرىنى زورايتىپ، تەرەققىيات مۇھىتىنى ئەلالاشتۇرۇش كېرەك. بىر تۈركۈم چوڭ تىپتىكى ساياھەت باشلامچى كارخانىلىرىنى يېتىلدۈرۈپ، ئوتتۇرا، كىچىك، ئۇششاق كارخانىلار ۋە يېڭىچە ساياھەت تەرەققىيات سۇبيېكتلىرىنى يۆلەپ، تۈرلۈك ئەۋزەل كاپىتالنى شىنجاڭغا مەبلەغ سېلىشقا يېتەكلەپ، بىر تۈركۈم بەلگە خاراكتېرلىك نادىر تۈرلەر، چوڭ تۈرلەر، كىلاسسىك مەدەنىيەت ـ ساياھەت تۈرلىرىنى كىرىپ ماكانلىشىشقا جەلپ قىلىش كېرەك؛ مەدەنىيەت ـ ساياھەت ساھەسىدىكى «بېرىش، باشقۇرۇش، مۇلازىمەت قىلىش» ئىسلاھاتىنى چوڭقۇرلاشتۇرۇپ، بازارلاشقان، قانۇنچىللاشقان، خەلقئارالاشقان تىجارەت ـ سودا مۇھىتى بەرپا قىلىش كېرەك. بەشىنچى، بازار ماركېتىڭىنى كېڭەيتىپ، ساياھەت ماركىسىنى جۇلالاندۇرۇش كېرەك. ماركېتىڭنى بىرتۇتاش پىلانلاشقا ئەھمىيەت بېرىپ، بىر قاتار يۇقىرى سەۋىيەلىك، خەلقئارالاشقان تەشۋىق قىلىش، كېڭەيتىش پائالىيەتلىرىنى كۆڭۈل قويۇپ پىلانلاپ، «شىنجاڭ ياخشى جاي» ئومۇمىي ئوبرازىنى تۇرغۇزۇش كېرەك؛ دەل جايىدا بولغان ماركېتىڭنى گەۋدىلەندۈرۈپ، ئېھتىياجنى دەل جايىدا پەرقلەندۈرۈش، زاكازلىق مۇلازىمەت قىلىش، بازارنى كېڭەيتىش كېرەك؛ ماركېتىڭدا يېڭىلىق يارىتىشقا ماھىر بولۇپ، پۈتۈن تاراتقۇ، پۈتۈن تور ماركېتىڭ مېخانىزمى بەرپا قىلىپ، يول، شەكىلنى كېڭەيتىپ، ساياھەت يىغىن ـ كۆرگەزمە پائالىيىتىدە يېڭىلىق يارىتىپ، ئۇنى ياخشى ئۆتكۈزۈش كېرەك. ئالتىنچى، مەدەنىيەت ئىچكى خاس مەزمۇنىنى چوڭقۇر قېزىپ، مەدەنىيەت بىلەن ساياھەتنىڭ يۇغۇرما تەرەققىياتىغا تۈرتكە بولۇش كېرەك. شىنجاڭنى مەدەنىيەت ئارقىلىق ئوزۇقلاندۇرۇش قۇرۇلۇشىنى چوڭقۇر يولغا قويۇپ، مەنزىرە رايونلىرىنىڭ مەدەنىيەت ئىچكى خاس مەزمۇنىنى ئۆستۈرۈپ، مەدەنىيەت بىلەن ساياھەت يۇغۇرۇلغان نادىر مەھسۇلاتلارنى بەرپا قىلىپ، دۇنيا مىراسلىرى باغچىسى، دۆلەت ئارخېئولوگىيە باغچىسى قۇرۇشنى پائال ئىلتىماس قىلىپ، مەدەنىيەت ـ ساياھەت ماركىسىنى زورايتىپ، مەدەنىيەت بىلەن ساياھەتنىڭ يۇغۇرما تەرەققىيات يېڭى كەسىپ ھالىتىنى يېتىلدۈرۈش كېرەك. يەتتىنچى، ساياھەت يوشۇرۇن كۈچىنى قېزىپ، يېڭى ئېشىش نۇقتىسى بەرپا قىلىش كېرەك. قار ـ مۇز ساياھىتى ماركا ئىستراتېگىيەسىنى يولغا قويۇپ، خاسلىققا ئىگە يۇقىرى دەرىجىلىك ساياھەتنى ئالغا سىلجىتىش ئۈستىدە ئىزدىنىپ، ئېكولوگىيە ساياھىتىنى مۇۋاپىق تەرەققىي قىلدۇرۇپ، يىپەك يولى ساياھىتىنى پائال تەرەققىي قىلدۇرۇپ، تېخىمۇ كۆپ شىنجاڭ ساياھىتى نام كارتىسى بەرپا قىلىش كېرەك.

ما شىڭرۇي مۇنداق تەكىتلىدى: ھەر دەرىجىلىك پارتىيە كومىتېتلىرى ۋە ھۆكۈمەتلەر، بولۇپمۇ پارتىيە، ھۆكۈمەتنىڭ «بىرىنچى قول رەھبەر»لىرى يۈكسەك ئەھمىيەت بېرىپ، سىستېمىلىق پىلانلاپ، چوڭ ساياھەت تەرەققىيات تۈزۈلمە ـ مېخانىزمىنى مۇكەممەللەشتۈرۈپ، سىياسەت، مەبلەغ، ئىختىساسلىقلار قاتارلىق جەھەتلەردىكى كاپالەتنى يەنىمۇ كۈچەيتىشى كېرەك. «ئىككىنى بىرتۇتاش پىلانلاش»نى ياخشى تۇتۇپ، يۇقۇمنىڭ ئالدىنى ئېلىش ـ تىزگىنلەش، كىشىلەر ئېقىمىنىڭ راۋانلىقىغا ئەڭ زور دەرىجىدە كاپالەتلىك قىلىشنى قانۇن بويىچە، ئىلمىي، دەل جايىدا ياخشى ئىشلەپ، ئاپتونوم رايونىمىز ساياھەتچىلىكىنىڭ يۇقىرى سۈپەتلىك تەرەققىياتىغا تۈرتكە بولۇشى كېرەك.

ئەركىن تۇنىياز مۇنداق كۆرسەتتى: ھەرقايسى جايلار، ھەرقايسى تارماقلار تەشەببۇسكارلىق بىلەن مەسئۇلىيەتنى زىممىگە ئېلىپ نەتىجە يارىتىپ، ساياھەت ئارقىلىق شىنجاڭنى گۈللەندۈرۈش ئىستراتېگىيەسىنى چوڭقۇر يولغا قويۇپ، ساياھەت كەسىپ ئورۇنلاشتۇرمىسىنى ئەلالاشتۇرۇپ، ساياھەت مەھسۇلاتلىرى تەمىناتىنى بېيىتىپ، مەدەنىيەت بىلەن ساياھەتنىڭ يۇغۇرۇلۇشىنى ئالغا سىلجىتىپ، مەدەنىيەت ـ ساياھەت نادىر مەھسۇلاتلىرىنى يارىتىپ، ئۇل ئەسلىھەلەرنى مۇكەممەللەشتۈرۈپ، ئاقىل ساياھەتنى ئىلگىرى سۈرۈپ، مۇلازىمەت سۈپىتىنى ئۆستۈرۈپ، يۇقۇمنىڭ ئالدىنى ئېلىش ـ تىزگىنلەش بىلەن ساياھەتچىلىكنىڭ تەرەققىياتىنى يۇقىرى ئۈنۈملۈك بىرتۇتاش پىلانلاپ، مەدەنىيەت ـ ساياھەت كەسپىنىڭ تەرەققىيات ئۈنۈمى ئارقىلىق ئىقتىساد، جەمئىيەتنىڭ يۇقىرى سۈپەتلىك تەرەققىياتىغا تۈرتكە بولۇش كېرەك.

يىغىندا، نارات ساياھەت ـ ئىستىراھەت رايونى، ئۈرۈمچى شەھىرى چوڭ بازار مەنزىرە رايونى، قەشقەر شەھىرى قەشقەر قەدىمىي شەھىرى مەنزىرە رايونى تەسىرات كوچىسى، ئۈرۈمچى نەنسەن تېغى قار تېيىلىش ساياھەت ـ ئىستىراھەت ئورنى، ئالتاي قار تېيىلىش ساياھەت ـ ئىستىراھەت ئورنى، ئۈرۈمچى شەھىرى تىيانشان رايونى چوڭ بازار ساياھەت ـ ئىستىراھەت كوچا رايونى، غۇلجا شەھىرى ئالتە شۇئار كوچىسى تارىخىي مەدەنىيەت كوچا رايونى، غۇلجا شەھىرى ۋە نىلقا ناھىيەسىدىن ئىبارەت دۆلەت دەرىجىلىك توققۇز مەدەنىيەت ـ ساياھەت داڭلىق ئورنىغا ۋىۋىسكا بېرىلدى؛ پۈتۈن ئاپتونوم رايوننىڭ ساياھەت خىزمىتى توغرىسىدىكى دوكلات ئاڭلاپ ئۆتۈلدى؛ ئىلى قازاق ئاپتونوم ئوبلاستى، ئالتاي ۋىلايىتى، قەشقەر ۋىلايىتى ۋە ئاپتونوم رايونلۇق تەرەققىيات ۋە ئىسلاھات كومىتېتى، قاتناش ـ تىرانسپورت نازارىتىدىكى مەسئۇل يولداشلار پىكىر ئالماشتۇرۇپ سۆز قىلدى.

يىغىن مەزگىلىدە، يىغىنغا قاتناشقان خادىملار ئىلىدىكى بىر قىسىم مەدەنىيەت ـ ساياھەت مەنزىرە رايونلىرىغا چوڭقۇر چۆكۈپ كۆزدىن كەچۈردى، تەكشۈرۈپ تەتقىق قىلدى.

يىغىن تېلېۋىزىيە ـ تېلېفون يىغىنى شەكلىدە ھەرقايسى ۋىلايەت، ئوبلاست، شەھەر، ناھىيە، شەھەر، رايونلارغىچە ئېچىلدى. چېن ۋېيجۈن، ياڭ فاسېن، سۈن خۇڭمېي قاتارلىقلار يىغىنغا قاتناشتى. ھەرقايسى ۋىلايەت، ئوبلاست، شەھەرلىك پارتىيە كومىتېتلىرى ۋە مەدەنىيەت ـ ساياھەت تارماقلىرىدىكى ئاساسلىق مەسئۇل يولداشلار، ئاپتونوم رايون (مەركەز)غا بىۋاسىتە قاراشلىق ئورۇنلاردىكى مەسئۇل يولداشلار، شىنجاڭغا ياردەم بېرىۋاتقان 19 ئۆلكە، بىۋاسىتە قاراشلىق شەھەرنىڭ ئالدىنقى سەپ قوماندانلىق ئىشتابلىرىدىكى ئاساسلىق مەسئۇل يولداشلار، ئاپتونوم رايوننىڭ ئالاقىدار ساياھەت ساھە جەمئىيىتى ۋە بىر قىسىم مەدەنىيەت ـ ساياھەت كارخانىلىرىدىكى مەسئۇل يولداشلار قاتارلىقلار ئاساسىي يىغىن مەيدانىدا يىغىنغا قاتناشتى.