ئانار بۇلۇت/شىنجاڭ گېزىتى مۇخبىرى ليۇ مېڭمېڭ
يېقىملىق مۇزىكا ياڭرىغاندا، چاي ئىچىشكە كەلگەن بىر نەچچە مېھمان لەرزان ئۇسسۇلغا چۈشتى، ئۈرۈمچىدىن كەلگەن ئۇسسۇل ئوقۇتقۇچىسى ئىمامجان ھەسەنمۇ ئۆزىنى باسالماي شادىيانە ئۇسسۇلغا قوشۇلدى ___ بۇ، مۇخبىر 1-ئاينىڭ 16-كۈنى قەشقەر قەدىمىي شەھىرىدىكى «يۈز يىللىق قەدىمىي چايخانا»دا كۆرگەن بىر كۆرۈنۈش.
چايخانىدا، چاي ئىچىشكە كەلگەن مېھمانلار ساز چالماقتا. ئانار بۇلۇت/شىنجاڭ گېزىتى مۇخبىرى ليۇ مېڭمېڭ فوتوسى
چايخانىدا، تامنى بويلاپ ياسالغان， ئېگىزلىكى تەخمىنەن يېرىم مېتىر كېلىدىغان كاڭ بار بولۇپ، ئۈستىگە گىلەم سېلىنغانىدى، بۇ يەرگە دائىم چاي ئىچكىلى كېلىدىغان مېھمانلار كاڭدا باداشقان قۇرۇپ ئولتۇرۇپ پاراڭلىشىشنى ياخشى كۆرىدۇ، بەزىدە ئىلھامى كەلگەندە چايخانىنىڭ چالغۇلىرىنى چېلىپ ناخشا ئېيتىپ، ئۇسسۇل ئوينايدۇ. «ھەر يىلى قىشلىق، يازلىق تەتىلدە قەشقەرگە قايتقاندا، چايخانىدا بىر كۈن ئولتۇرۇپ، چاي ئىچىپ، ئۇسسۇل ئوينايمەن، بۇ مېنىڭ بالىلىق چاغلىرىمدىكى ئەسلىمىلىرىم» دېدى ئىمامجان.
«مەدەنىيەتنىڭ سېھرىي كۈچى مېنىڭ قەشقەرگە كېلىپ ساياھەت قىلىشنى تاللىشىمدىكى ئەڭ مۇھىم سەۋەب.» سىچۇەندىن كەلگەن قىز چېن لىن قەشقەرنى تاللىشىدىكى سەۋەب توغرىسىدا شۇنداق دېدى. ئۇ چۈشتىن كېيىن قەدىمىي چايخانىنىڭ ھەر بىر بۇلۇڭ-پۇچقاقلىرىدا فوتو ئاپپارات ۋە تېلېكامېرانى ئېلىپ بۇ گۈزەل تەسىراتلىرىنى خاتىرىلىدى. «مەيلى يىراقتىن كەلگەن ساياھەتچىلەر بولسۇن ياكى يېقىن ئەتراپتىكى قوشنىلار بولسۇن، بۇ يەرگە كەلسىلا، ئەركىن-ئازادە چۆرىدەپ ئولتۇرۇپ، چاي ئىچىپ، پاراڭلىشىپ، قاقاھلاپ كۈلۈشۈپ كېتىدۇ، بۇ خىل كەيپىيات بەك ياخشى».
چايخانىدا، چاي ئىچىشكە كەلگەن مېھمانلار ئۇسسۇلغا چۈشتى. ئانار بۇلۇت/شىنجاڭ گېزىتى مۇخبىرى ليۇ مېڭمېڭ فوتوسى
بىر پەدە مۇزىكا ئاخىرلاشتى، چاي ئىچىشكە كەلگەن مېھمانلار كۈلۈمسىرەپ، بەس-بەستە چاۋاك چېلىشتى. چايخانا چاي ئىچىشكە كەلگەن مېھمانلار بىلەن لىق تولغانىدى. يۈز يىللىق تارىخقا ئىگە قەدىمىي چايخانا بۇ جايدىكى كىشىلەر ئەڭ ياخشى كۆرىدىغان ئىجتىمائىي ئالاقە سورۇنى بولۇپ، سىرتتىن كەلگەن نۇرغۇن ساياھەتچىمۇ بۇ يەرنىڭ داڭقىنى ئاڭلاپ كېلىدۇ. «بىر چەينەك چاي، بىر نان چاي ئىچىشكە كەلگەن مېھمانلارنىڭ بىر چۈشتىن كېيىنكى ئىستېمالى. يازدا ساياھەتچىلەر زەپە، ئەتىرگۈل، لاچىندانە، ھەسەل قاتارلىق قوشۇمچە ماتېرىياللار قوشۇلغان دورىلىق چاينى تاللايدۇ» دېدى قەشقەر قەدىمىي شەھىرى مەنزىرە رايونىنىڭ چۈشەندۈرگۈچىسى سۈمەييە ئابلاجان.
«يۈز يىللىق تارىختا ئۆزگەرگىنى چاي دەملەش ھۈنىرى، ئۆزگەرمىگىنى كىشىلەرنىڭ چايغا بولغان ئامراقلىقى». چايخانىنىڭ 4-ئەۋلاد تىجارەتچىسى مەمەتكېرىم مەمەت مۇنداق تونۇشتۇردى: يېقىنقى يىللاردىن بۇيان، قەشقەر ساياھەتچىلىكىنىڭ تەرەققىي قىلىشىغا ئەگىشىپ، كونا چايخانا توردا داڭ چىقىرىپ، ھەرقايسى جايلاردىن كەلگەن ساياھەتچىلەرنى جەلپ قىلدى. ھازىر چايخانا تىجارەت باشلىغان دەسلەپكى مەزگىلدىكى ئالتە چاي ئۈستىلىدىن 14 چاي ئۈستىلى، بەش ئايرىمخانىغا تەرەققىي قىلدى.
يەرلىك ئالاھىدىلىككە ئىگە چاي. ئانار بۇلۇت/شىنجاڭ گېزىتى مۇخبىرى ليۇ مېڭمېڭ فوتوسى
بۇلتۇر، مەمەتكېرىم شاڭخەيگە بېرىپ ئۆگىنىپ، قايتىپ كېلىپلا ئىلغار تەجرىبىلەرنى ئۆرنەك قىلىپ، تىجارەت ئۇسۇلىنى ياخشىلاپ، دوۋيىن نومۇرى تەسىس قىلدى، يەنە چايخانىدا قۇرۇق مېۋە، تاتلىق تۈرۈم تۈرلىرىنى كۆپەيتىپ، يەرلىك ئالاھىدىلىككە ئىگە دورىلىق چايلارنى سېتىشقا باشلىدى، «بىز كۆپ يول ئارقىلىق تېخىمۇ كۆپ كىشىگە قەشقەرنىڭ خەلق ئۆرپ-ئادەت تۈسىنى چۈشەندۈرۈشنى ئۈمىد قىلىمىز».
