شىنجاڭ ئىلى قازاق ئاپتونوم ئوبلاستىنىڭ موڭغۇلكۈرە ناھىيەسى 1-ئاينىڭ 5-كۈنى ئۈرۈمچى شەھىرىدە «2024-يىللىق شىنجاڭ ئىلى موڭغۇلكۈرە تۇنجى نۆۋەتلىك تۇلپار قار-مۇز ساياھەت بايرىمى»نى تونۇشتۇرۇش يىغىنى ئېچىپ، «تۇلپارلار قارلىق دالىدا، موڭغۇلكۈرە قىزغىنلىقتا» باش تېمىسىدىكى تۇنجى نۆۋەتلىك تۇلپار قار-مۇز ساياھەت بايرىمىنىڭ 1-ئاينىڭ 14-كۈنى موڭغۇلكۈرە سۇلۇق يەر باغچىسىدا داغدۇغىلىق باشلىنىدىغانلىقىنى جاكارلىدى.
1-ئاينىڭ 5-كۈنى، ئارتىسلار «2024-يىللىق شىنجاڭ ئىلى موڭغۇلكۈرە تۇنجى نۆۋەتلىك تۇلپار قار-مۇز ساياھەت بايرىمى»نى تونۇشتۇرۇش يىغىنىدا نومۇر ئورۇندىماقتا. (زۇ يى فوتوسى)
ئىگىلىنىشىچە، تۇنجى نۆۋەتلىك تۇلپار قار-مۇز ساياھەت بايرىمىنىڭ باشلىنىش مۇراسىمىدا، «قىشتا موڭغۇلكۈرەگە كېلىپ قارنى تاماشا قىلىش»، «تۇلپارلارنىڭ قار كېچىشى»، «قار-مۇزدا كەلگۈسىگە يۈزلىنىش» قاتارلىق ئۈچ ئىجادىي ناخشا تۇنجى قېتىم تارقىتىلىدىكەن، 100 كىشىلىك ئۇسسۇل «سوغۇق شەبنەم» ۋە تۇلپارلارنىڭ قار كېچىشى قاتارلىق نومۇرلار كۆرسىتىلىدىكەن.
موڭغۇلكۈرە ناھىيەسى ئۆز جايىنىڭ قار-مۇز ساياھەت بايلىقىنى تونۇشتۇرۇش ئۈچۈن، قارلىق دالىدىكى قىز قۇۋار، ئوغلاق تارتىشىش، ئات بەيگىسى قاتارلىق خەلق ئۆرپ-ئادىتى پائالىيەتلىرى، مۇز ئۈستى ۋېلىسپىتى، قار چەمبىرىكى، نۇر، چانا قاتارلىق مۇز ئۈستى ھېس قىلىش پائالىيەتلىرى ھەم ئۆزگىچە تائاملار كۆرگەزمىسى ئۆتكۈزۈپ، ساياھەتچىلەرنى قار-مۇز گۈزەل مەنزىرىسىدىن ھۇزۇرلاندۇرۇش بىلەن بىللە، ئۇلارغا قويۇق رايون مەدەنىيەت خاسلىقىنى ھېس قىلدۇرىدۇ. شۇنىڭ بىلەن بىللە، قار-مۇز باغچىسى بەرپا قىلىدۇ، بۇ، سېپىل راۋىقى مۇز ئويمىسى، پانۇس مۇز تۈۋرۈكى، تۇلپار ئەگمە ئات مۇز ئويمىسى ھەمدە شىنجاڭدىكى ئەڭ ئۇزۇن 100 مېتىرلىق مۇز تېيىلىش يولى، مۇز سىرلىق ئوردىسى، ئولىمپىك نۇر مۇنارى قاتارلىقلارنى ئۆز ئىچىگە ئالىدۇ؛ «10-نۆۋەتلىك مەملىكەتلىك ئاممىۋى قار-مۇز پەسلى . قاردا چاقنىغان تىيانشان» ئاپتونوم رايونلۇق قارلىق دالا پۇتبول مۇسابىقىسى ۋە ئىلى ئوبلاستلىق 7-نۆۋەتلىك قارلىق دالا پۇتبول مۇسابىقىسى ئۆتكۈزۈلۈپ، تاللانغان مۇنەۋۋەر پۇتبول كوماندىسى شىنجاڭغا ۋاكالىتەن دۆلەت دەرىجىلىك قارلىق دالا پۇتبول مۇسابىقىسىگە قاتنىشىدۇ؛ 2024-يىللىق مەملىكەتلىك مۇز ئۈستى يەلكەنلىك كېمە ئاشكارا مۇسابىقىسى ۋە شىنجاڭ تۇنجى نۆۋەتلىك يۈخۇ مۇز ئۈستى يەلكەنلىك كېمە مۇسابىقىسى ئۆتكۈزۈلۈپ، دۆلەت ئىچى ۋە سىرتىدىكى مۇز يەلكەن ماھىرلىرى مۇسابىقىگە قاتنىشىشقا ۋە سىناپ بېقىشقا تەكلىپ قىلىنىدۇ.
300 مىڭ مەستانىسى بار تور دارىنى لى ياڭ يۇرتى موڭغۇلكۈرەنى تونۇشتۇرغاندا مۇنداق دېدى: «مەن بىۋاسىتە كۆرسىتىش ئارقىلىق تورداشلارغا موڭغۇلكۈرەنىڭ گۈزەل مەنزىرىسىنى كۆرسەتتىم، نۇرغۇن مەستانىلەر كېلىپ ئۆز كۆزى بىلەن كۆرۈپ باقىدىغانلىقىنى ئېيتتى. بۇ قېتىمقى قار-مۇز ساياھەت بايرىمىدا كۆپچىلىكنى موڭغۇلكۈرەگە كېلىپ داكا قىلىشقا سەمىمىي تەكلىپ قىلىمەن».
«تۇلپارلارنىڭ قار كېچىشى» موڭغۇلكۈرە ناھىيەسىدىكى تۇلپار ساياھەت-مەدەنىيەت باغچىسىدا ئورۇندالدى (2023-يىلى 12-ئاينىڭ 23-كۈنى تارتىلغان سۈرەت. تاڭ يۇڭ فوتوسى)
«موڭغۇلكۈرە ناھىيەسى <قار-مۇز + تەنتەربىيە>، <قار-مۇز + مەدەنىيەت>، <قار-مۇز + ساياھەت>، <قار-مۇز + ئات كەسپى> قاتارلىق كۆپ خىل كەسىپلەرنىڭ يۇغۇرما تەرەققىياتىغا سىجىل تۈرتكە بولۇپ، <سوغۇق بايلىق>نى <ئىسسىق ئىقتىساد>قا ئايلاندۇرىدۇ، كۆپچىلىكنىڭ مېھمان بولۇپ كېتىشىنى قارشى ئالىمىز». موڭغۇلكۈرە ناھىيەلىك پارتىيە كومىتېتىنىڭ مۇئاۋىن شۇجىسى، ھاكىم ئابىلەن ئابىلقايىر شۇنداق دېدى.
2023-يىلى 12-ئاينىڭ 19-كۈنى، 2-نۆۋەتلىك جۇڭگو مېتېئورولوگىيە ساياھەت كەسپى تەرەققىيات يىغىنىدا موڭغۇلكۈرە ناھىيەسى «تىيانشان قار يۇرتى . جۇڭگو موڭغۇلكۈرە» دېگەن شەرەپلىك نامغا ئېرىشكەن.
