شىنجاڭ گېزىتى، ئۈرۈمچى، 12-ئاينىڭ 18-كۈنى خەۋىرى ئانار بۇلۇت\شىنجاڭ گېزىتى مۇخبىرى ياۋ گاڭ خەۋەر قىلىدۇ: تېمپېراتۇرىنىڭ بىردىنلا تۆۋەنلىشىگە، قار يېغىشىغا ئەگىشىپ، شىنجاڭنىڭ قار - مۇز ساياھىتى پەسلى باشلاندى. قار - مۇز ساياھىتىنى تەرەققىي قىلدۇرۇشتا، دۇنيادا 1-قاتاردا تۇرىدىغان تەبىئىي بايلىقىدىن باشقا، شىنجاڭنىڭ ئىشەنچى يەنە قەيەردىن كەلدى؟ ئاپتونوم رايونلۇق مەدەنىيەت ۋە ساياھەت نازارىتىنىڭ ئىستاتىستىكىلىق سانلىق مەلۇماتىدا كۆرسىتىلىشىچە، ھازىرغىچە، پۈتۈن شىنجاڭدا تۈرلۈك قار - مۇز مەيدانىدىن جەمئىي 188ى بار، بۇنىڭ ئىچىدە قار تېيىلىش مەيدانىدىن 101ى، مۇز تېيىلىش سارىيىدىن 27سى، قار - مۇز شادلىق باغچىسىدىن 60ى بولۇپ، 14 ۋىلايەت، ئوبلاست، شەھەرنى قار - مۇز مەيدانى بىلەن تولۇق قاپلاش ئىشقا ئاشۇرۇلغان.
ئاپتونوم رايونلۇق مەدەنىيەت ۋە ساياھەت نازارىتى بايلىق ئېچىش باشقارمىسىنىڭ مۇئاۋىن باشقارما باشلىقى جيا رۇي مۇنداق تونۇشتۇردى: شىنجاڭنىڭ قار - مۇز بايلىقى مول، نۆۋەتتە ئالتاي تېغى، تىيانشان قار - مۇز ساياھىتى بەلبېغى، ئۈرۈمچى قار - مۇز ساياھىتى يىغىلىش - تارقىلىش مەركىزى، جۇڭغار غەربىي قىسىم تاغلىق يەر قار - مۇز ساياھىتى ئۆمىكى، پامىر ئېگىزلىكى قار - مۇز خاس ساياھىتى ئۆمىكى، كوئېنلۇن تاغ تىزمىسى قار - مۇز ساياھىتى ئۆمىكى، قەشقەر قار - مۇز ساياھىتى ئۆمىكىدىن ئىبارەت «N+1+2» ئەندىزىسى دەسلەپكى قەدەمدە شەكىللەندى، ئالتاي ۋىلايىتى، ئۈرۈمچى شەھىرى، سانجى خۇيزۇ ئاپتونوم ئوبلاستى، ئىلى قازاق ئاپتونوم ئوبلاستى، بورتالا موڭغۇل ئاپتونوم ئوبلاستى قاتارلىقلارنىڭ ھەممىسى قار تېيىلىش ھەۋەسكارلىرى ياخشى كۆرىدىغان قار - مۇز ساياھەت مەنزىلگاھى بولۇپ قالدى. قار - مۇز ساياھەت بايلىقىنىڭ بوشلۇق جەھەتتىكى تەشكىللىنىشىدە شىمالدا كۆپ، جەنۇبتا ئاز بولۇش، كۆپ مەنبە ئۆزئارا تولۇقلاش، ئۆمەك تەشكىللەپ تەرەققىي قىلىشتەك ئالاھىدىلىكلەر نامايان بولدى.
يېقىنقى يىللاردىن بۇيان، شىنجاڭ قار تېيىلىش ئىستىراھەت رايونى قۇرۇلۇشىغا كۈچەپ تۈرتكە بولۇپ، ئالتاي شەھىرى، ئۈرۈمچى شەھىرىدىكى نەنسەن، كۆكتوقاي ناھىيەسىدىكى كۆكتوقايدىن ئىبارەت دۆلەت دەرىجىلىك ئۈچ قار تېيىلىش ساياھەت ئىستىراھەت ئورنى؛ تىيانشان بوغدا كۆلى، قۇم جىكبېلېڭ، قورغاس فۇشوۋشەن تېغى، تېكەس قاراجون قاتارلىق ئاپتونوم رايون دەرىجىلىك بەش قار تېيىلىش ساياھەت ئىستىراھەت ئورنىنى بەرپا قىلدى. 101 قار تېيىلىش مەيدانى ئىچىدە، 5S دەرىجىلىك قار تېيىلىش مەيدانىدىن ئالتىسى، 4S دەرىجىلىك قار تېيىلىش مەيدانىدىن ئونى بار، قار تېيىلىش يولىنىڭ كۆلىمى 100 گېكتاردىن ئاشىدىغىنىدىن يەتتىسى بار.
ئىستاتىستىكا قىلىنىشىچە، يېقىنقى بىرنەچچە يىلدا، ھەرقايسى جايلار ئۆتكۈزگەن قار - مۇز بايرىمى ۋە مۇسابىقىسى، خەلق ئۆرپ - ئادەت مەدەنىيىتى كۆرگەزمە، كۆرەك پائالىيىتى قاتارلىقلار يىلىغا ئوتتۇرا ھېساب بىلەن 3500 مەيدان قېتىمدىن ئېشىپ، قار - مۇز تەنھەرىكىتىگە قاتناشقانلار 3 مىليون 200 مىڭ ئادەم قېتىم بولۇپ، قار - مۇز ساياھىتى بىلەن مۇسابىقە پائالىيەتلىرىنىڭ يەنىمۇ يۇغۇرۇلۇشىغا تېز تۈرتكە بولغان.
