□ ئانار بۇلۇت\شىنجاڭ گېزىتى مۇخبىرلىرى رايىدە، ليۇ دۇڭلەي
گۈدۈك ئاۋازىغا ئەگىشىپ، قىزىل، ئاق، سېرىق، يېشىل... رەڭدىكى ئېغىر تىپتىكى يۈك ئاپتوموبىللىرى يېنىمىزدىن ئۆتۈپ كەتتى. 8- ئاينىڭ 23- كۈنى، شىنجاڭ گېزىتخانىسى (گۇرۇھى) «ئۇچقاندەك ئىلگىرىلەش يولى − <بىر بەلباغ، بىر يول> لىنىيەسى بويىدىكى چوڭ تىپتىكى پۈتۈن تاراتقۇلۇق خەۋەر قىلىش» زىيارەت تارماق ئەترىتى شىئەن ئىقتىساد تېخنىكا تەرەققىيات رايونىنىڭ جىڭۋېي سانائەت باغچىسىغا جايلاشقان شەنشى ئاپتوموبىل پاي كونترول گۇرۇھى چەكلىك شىركىتىنىڭ باش ئىشتابىغا كەلدى، ھەرقايسى ئىشلەپچىقىرىش باغچە رايونلىرىدىكى ئالدىراش مەنزىرىلەرنى كۆرۈپ مۇخبىرلار ئىختىيارسىز توختىماي ماختاپ كەتتى.
شەنشى ئاپتوموبىل پاي كونترول گۇرۇھىنىڭ شىئەن سودا ئاپتوموبىلى كەسىپلەر باغچىسىدا، ئاق خالات كىيگەن رېن مىنكاڭ ھەرقايسى زاپچاس ئامبارلىرى ئارىسىدا توختىماي مېڭىپ يۈرەتتى.
ئىشلەپچىقىرىش قەرەللىك يىغىنى ئېچىش، زاكاز تالونىنى تەكشۈرۈپ كۆرۈش، ئىشلەپچىقىرىش پىلانىنى كۆرۈش، ئاپتوموبىللارنى ئورۇنلاشتۇرۇش، ماتېرىيال تەشكىللەش، ئاپتوموبىلغا قاچىلىنىپ بولغان ئۇششاق زاپچاسلارنىڭ سانىنى ئېلىش... بۇ، شەنشى ئاپتوموبىل پاي كونترول گۇرۇھى شىنجاڭ ئاپتوموبىل چەكلىك شىركىتى شىئەن ئىش بېجىرىش ئورنىنىڭ مۇدىرى رېن مىنكاڭنىڭ كۈندىلىك خىزمىتى.
«ماللار بۇ يەردىن يولغا سېلىنىپ، ئاپتوموبىل ئارقىلىق توشۇلۇپ 80 نەچچە سائەتتە ئۈرۈمچىگە يېتىپ بارىدۇ. بىز جەزمەن شىنجاڭدىكى شىركەت ئېھتىياجلىق بولغان زاپچاسلارنى دەل جايىدا، خاتاسىز تولۇق سەپلەپ بېرىشىمىز كېرەك، ۋېنتىدىن بىرى كەم بولۇپ قالسا ئىشلەپچىقىرىش سۈرئىتىگە دەخلى يەتكۈزىدۇ» دېدى رېن مىنكاڭ.
رېن مىنكاڭنىڭ شەنشى ئاپتوموبىل گۇرۇھى چەكلىك شىركىتىنىڭ باش ئىشتابىدىن شەنشى ئاپتوموبىل گۇرۇھى شىنجاڭ شىركىتىنىڭ شىئەن ئىش بېجىرىش ئورنىغا يۆتكىلىپ كەلگىنىگە ئالتە يىل بولدى. بۇ مەزگىلدىكى ئۇنىڭ ئەڭ چوڭ تەسىراتى بارغانسېرى ئالدىراش بولۇشتىن ئىبارەت. «بولۇپمۇ 2021- يىلىدىن باشلاپ، بۇ جايدىن شىنجاڭ شىركىتىگە ئەۋەتىلىدىغان موتور، كابىنكا، سۈرئەت ئۆزگەرتىش ساندۇقى قاتارلىق زاپچاسلار بارغانسېرى كۆپەيدى. سان كۆپەيگەچكە، مېنىڭ خىزمىتىم تەبىئىيلا تېخىمۇ ئالدىراش بولۇپ كەتتى» دېدى رېن مىنكاڭ.
2011- يىلى، شەنشى ئاپتوموبىل گۇرۇھى شىنجاڭ شىركىتى شىنجاڭدا ماكانلاشتى، 2012- يىلى ئىشلەپچىقىرىشقا كىرىشتۈرۈلگەندىن بۇيان، جەمئىي 35 مىڭ ئاپتوموبىل ئىشلەپچىقىرىپ، سېتىپ، مەھسۇلات قىممىتى جەمئىي 10 مىليارد 100 مىليون يۈەن بولدى.
«2017- يىلىدىن باشلاپ، شىنجاڭ شىركىتى ئىشلەپچىقارغان ئېغىر تىپتىكى يۈك ئاپتوموبىللىرىنىڭ زاپچاسلىرىنىڭ ھەممىسىنى مەن تەشكىللەپ ئەۋەتىپ بەردىم» دېدى رېن مىنكاڭ پەخىرلەنگەن ھالدا.
2013- يىلى، «بىر بەلباغ، بىر يول»نى ئورتاق قۇرۇش تەشەببۇسى ئوتتۇرىغا قويۇلدى. جۇڭگونىڭ تۇنجى تۈركۈمدىكى ئاپتوموبىل ھەم زاپچاس ئېكسپورت كارخانىسى بولۇش سۈپىتى بىلەن، شەنشى ئاپتوموبىل گۇرۇھى «بىر بەلباغ، بىر يول»نى ئورتاق قۇرۇش پۇرسىتىنى چىڭ تۇتۇپ، خەلقئارا بازاردىكى ئەۋزەل بايلىقنى تولۇق بىرىكتۈرۈپ، خەلقئارادىكى مۇنەۋۋەر ھەمراھلار بىلەن زىچ ھەمكارلىشىپ، چەت ئەلدىكى بولۇپمۇ «بىر بەلباغ، بىر يول» لىنىيەسى بويىدىكى ئورۇنلاشتۇرۇشنى ئۈزلۈكسىز تېزلەتتى.
ئوتتۇرا ئاسىيا رايونى «بىر بەلباغ، بىر يول» تۇنجى قېتىم تەشەببۇس قىلىنغان جاي، شۇنداقلا شەنشى ئاپتوموبىل گۇرۇھىنىڭ ئەنئەنىۋى ئەۋزەل بازىرى.
«يېقىنقى يىللاردىن بۇيان، <بىر بەلباغ، بىر يول>نى ئورتاق قۇرۇشنىڭ چوڭقۇر ئالغا سىلجىتىلىشىغا ئەگىشىپ، شىنجاڭنىڭ ئوتتۇرا ئاسىيادىكى بەش دۆلەت بىلەن بولغان ئىقتىساد، سودا ئالاقىسى بارغانسېرى قويۇقلاشتى، ئۈرۈمچىگە ماكانلاشقان شەنشى ئاپتوموبىل گۇرۇھى شىنجاڭ شىركىتى <سۇ بويىدىكى راۋاققا ئاي شولىسى بالدۇر چۈشەر> دېگەندەك ئەۋزەللىككە ئىگە بولدى». رېن مىنكاڭ مۇنداق دېدى: 2021- يىلى شەنشى ئاپتوموبىل گۇرۇھى شىنجاڭ شىركىتى ئوتتۇرا ئاسىياغا 300دىن كۆپرەك ئاپتوموبىل ئېكسپورت قىلغانىدى، 2022- يىلى 1600دىن كۆپرەكنى ئېكسپورت قىلدى، بۇ يىل 8- ئاينىڭ ئاخىرىغىچە ئېكسپورت قىلىنىدىغان ئاپتوموبىلنىڭ 2900دىن ئاشىدىغانلىقى مۆلچەرلەندى.
بۈگۈنكى كۈندە، شىنجاڭ ئۆزگىچە رايون ئورنى ئەۋزەللىكىنى جارى قىلدۇرۇپ، يېڭى تەرەققىيات ئەندىزىسىگە پائال مۇلازىمەت قىلىپ ۋە سىڭىشىپ، ئەمەلىيەتتىن چىقىش قىلىپ سىرتقا ئېچىۋېتىش خىزمىتىنى چىڭ تۇتۇپ، دۆلىتىمىزنىڭ غەربكە ئېچىۋېتىشتىكى كۆۋرۈك بېشى ئىستىھكامىغا ئايلاندى.
«1- ئايدىن 8- ئايغىچە، شىنجاڭ شىركىتى 4000دىن كۆپرەك ئاپتوموبىل ئىشلەپچىقاردى، بۇنىڭ يېرىمىدىن كۆپرەكى ئوتتۇرا ئاسىياغا ئېكسپورت قىلىندى. مانا مۇشۇ پەيتتە، شىنجاڭدىكى ئالاتاۋ پورتى، قورغاس پورتى، باقتۇ پورتى قاتارلىق جايلاردا، بىزنىڭ ئېغىر تىپتىكى يۈك ئاپتوموبىللىرىمىز دۆلەت دەرۋازىسىدىن چىقماقتا» دېدى رېن مىنكاڭ.
«بۇ بىرنەچچە يىلدا، مەن شەنشى ئاپتوموبىل گۇرۇھى شىنجاڭ شىركىتىنىڭ تەرەققىياتىغا گۇۋاھ بولۇپلا قالماي، يەنە شىنجاڭنىڭ تاشقى سودىسىنىڭ تەرەققىياتىغىمۇ گۇۋاھ بولدۇم. بۈگۈنكى كۈندە، شىنجاڭنىڭ ئوتتۇرا ئاسىيادىكى ھەرقايسى دۆلەتلەر بىلەن بولغان سودا ئالاقىسى بارغانسېرى قويۇقلاشتى، ھەرقايسى پورتلارنىڭ تاموژنىدىن ئۆتكۈزۈش ئۈنۈمى بارغانسېرى يۇقىرى كۆتۈرۈلۈپ، ئېغىر تىپتىكى يۈك ئاپتوموبىلى ئېكسپورتىمىزنى نۇرغۇن قولايلىق بىلەن تەمىنلىدى. شەنشى ئاپتوموبىل گۇرۇھى شىنجاڭ شىركىتىنىڭ بىر خادىمى بولۇش سۈپىتىم بىلەن، بۇنىڭدىن كېيىن مەن ئىلگىرىكىگە ئوخشاشلا شىركەتنىڭ ئېھتىياجلىق زاپچاسلارنى ئىشلەپچىقىرىشى، ياخشى سەپلىشى ئۈچۈن، <بىر بەلباغ، بىر يول>نى ئورتاق قۇرۇش ئۈچۈن كۈچ قوشىمەن» دېدى رېن مىنكاڭ.
