ئانار بۇلۇت\شىنجاڭ گېزىتى مۇخبىرلىرى فەن چيۇڭيەن، گو لىڭ
يولغا چىقىشنى ئىلتىماس قىلىش، تەكشۈرۈپ تەستىقلاش. ئاپتوموبىل ئىسكىلاتىنى ئېچىپ، ئاپتوموبىل، ئۈسكۈنىلەرنى تەكشۈرۈپ، سىستېمىدا بىخەتەرلىك ئۇچۇرلىرىنى مەلۇم قىلىپ، يولغا چىقىش! 8ـ ئاينىڭ 24ـ كۈنى سائەت 10دىن 11 مىنۇت ئۆتكەندە، جۇڭگو تېلېگراف پاي چەكلىك شىركىتى قەشقەر ئۇزۇن يوللۇق يوللاش شۆبە ئىدارىسىنىڭ لىنىيە چارلىغۇچىسى ئادىل ھاشىم بىر ھەپتىلىك ئاپتوموبىل بىلەن دائىملىق لىنىيە چارلاشنى باشلىدى.
ھەيۋەتلىك پامىر ئېگىزلىكى چېگراسىدىكى يىراق تاغلاردا، تاغلار بىلەن تۇتاشقان نۇر كابېل دۆلىتىمىز بىلەن پاكىستاننىڭ خەۋەرلىشىش ئىشلىرىنىڭ راۋانلىقىغا كاپالەتلىك قىلماقتا، شۇنداقلا جۇڭگو ـ پاكىستان دوستلۇقىغا گۇۋاھ بولماقتا.
ئادىل ھاشىم جۇڭگو ـ پاكىستان نۇر كابېلىنى قوغدايدىغان لىنىيە چارلىغۇچى بولۇپ، قەشقەر شەھىرىدىن تاشقورغان تاجىك ئاپتونوم ناھىيەسىگىچە يەنە قونجىراپ چېگرا مۇداپىئە قاراۋۇلخانىسىغىچە بولغان لىنىيەدىكى 155.2 كىلومېتىر كېلىدىغان نۇر كابېلنى قوغداشقا مەسئۇل، بۇنىڭ ئىچىدە 96 كىلومېتىرى ئادەمسىز رايوندا بولۇپ، تەبىئىي مۇھىتى ناچار.
«بىر بەلباغ، بىر يول»نى ئورتاق قۇرۇش تەشەببۇسىنىڭ ئوتتۇرىغا قويۇلۇشىغا ئەگىشىپ، 2014ـ يىلىنىڭ كېيىنكى يېرىمىدا، جۇڭگو تېلېگرافى شىنجاڭ شىركىتى جۇڭگو بىلەن پاكىستاننى تۇتاشتۇرىدىغان تۇنجى چېگرا ھالقىغان بىۋاسىتە قۇرۇقلۇق نۇر كابېلى − «جۇڭگو ـ پاكىستان نۇر كابېلى» تۈرىدە قۇرۇلۇش باشلىدى، بۇ نۇر كابېل جۇڭگو ئۈرۈمچى شەھىرىدىن قەشقەرگە يەتكۈزۈلۈپ، جۇڭگو ـ پاكىستان چېگراسىدىكى قونجىراپ پورتىدىن ئۆتۈپ، ئاندىن پاكىستاننىڭ راۋالپىندى شەھىرىگە تۇتاشتۇرۇلىدۇ، ئومۇمىي ئۇزۇنلۇقى 2950 كىلومېتىر بولۇپ، بۇ تۈر 2015 ـ يىلىنىڭ بېشىدا پۈتتى.
جۇڭگو تېلېگراف پاي چەكلىك شىركىتى قەشقەر ئۇزۇن يوللۇق يەتكۈزۈش شۆبە ئىدارىسى 900 كىلومېتىردىن ئارتۇق چېگرا ھالقىغان نۇر كابېل لىنىيەسىنى باشقۇرىدۇ. بۇ شۆبە ئىدارىنىڭ مۇئاۋىن ئىدارە باشلىقى ئابدۇۋاھاپ روزى مۇنداق تونۇشتۇردى: جۇڭگو ـ پاكىستان نۇر كابېلى قاراقۇرۇم تاغ تىزمىسى، ھىندىقۇش تېغى، پامىر ئېگىزلىكى، ھىمالايا تاغ تىزمىسىنى كېسىپ ئۆتىدۇ، دېڭىز يۈزىدىن ئېگىزلىكى 4733 مېتىر بولغان قونجىراپ پورتىدىن ئۆتىدۇ، پۈتۈن مۇساپىدىكى كۆپ قىسىم رايونلارنىڭ گېئولوگىيەلىك يەر شەكلى مۇرەككەپ، دېڭىز يۈزىدىن ئېگىزلىكى يۇقىرى بولۇپ، 100 كىلومېتىرغا يېقىن ئادەمسىز رايوننى كېسىپ ئۆتۈشكە توغرا كېلىدۇ.
«جۇڭگو ـ پاكىستان نۇر كابېلى قۇرۇلغاندىن كېيىن، ئادىل ھاشىم شارائىتى ئەڭ جاپالىق بولغان ئاشۇ لىنىيەنى قوغداش خىزمىتىگە مەسئۇل بولدى، بۈگۈنگىچە توققۇز يىلغا يېقىن ئىشلەپ، قۇرۇلۇش پۈتكەندىن بۇيان مەسئۇل بولغان لىنىيەنىڭ توسالغۇغا ئۇچراش سەۋەبىدىن ئۈزۈلۈپ قالماسلىقىدەك ياخشى نەتىجىنى ياراتتى» دېدى ئابدۇۋاھاپ روزى.
«بۇ يەردىن باشلاپ نۇر كابېل يەر ئاستىدىن يەر ئۈستىگە ئۆتىدۇ، بۇ يەر دەل 1ـ نومۇرلۇق ئىستولبا.» مۇخبىرلار 47 ياشلىق ئادىل ھاشىمغا ئەگىشىپ قەشقەر شەھىرىنىڭ G314 دۆلەت يولى بىلەن يېڭىئايماق يولى كېسىشكەن جايغا كەلدى، ئۇ مۇخبىرلارغا بىر ئورۇندىكى ئىستولبىنى كۆرسىتىپ تۇرۇپ، ئۆزى مەسئۇل بولۇپ قوغداۋاتقان لىنىيەدە مۇشۇنداق ئىستولبىدىن جەمئىي 2225ى بارلىقىنى، لىنىيە چارلىغاندا ھەربىر مۇنارسىمان ئىستولبىدىن ئۆتۈشكە، ھەتتا يامىشىشقا توغرا كېلىدىغانلىقىنى ئېيتتى.
ئادىل ھاشىم ئىستولبا ئاستىدا تۇرۇپ، ئالدى بىلەن توك تەقسىملەش ئەھۋالىنى ئۆلچەش قەلىمى بىلەن توك قېچىش ئەھۋالىنىڭ بار ـ يوقلۇقىنى ئۆلچىدى، ئاندىن ئىككى قولى بىلەن ئىستولبىنى چىڭ قۇچاقلاپ، پۈتۈن كۈچى بىلەن تەۋرەتتى. «ئىستولبىدىن نۇرغۇن ئورۇنلار ئورتاق بەھرىلىنىدۇ، ئىشلىتىلىۋاتقىلى ئون يىل بولاي دېدى، ئۇنىڭ مۇستەھكەم ياكى مۇستەھكەم ئەمەسلىكىنى تەكشۈرمىسەك بولمايدۇ.» ئۇ سۆزلىگەچ بىخەتەرلىك ئارغامچىسىنى باغلاپ، پۇت ئىلمىكىنى كىيىپ، بىر قەدەم ـ بىر قەدەمدىن ئىستولبىنىڭ ئۇچىغا يامىشىپ چىقىپ، زاپچاسلارنىڭ كونىراپ كەتكەن ـ كەتمىگەنلىكىنى، بۇزۇلغان ـ بۇزۇلمىغانلىقىنى تەكشۈردى.
شىنجاڭ گېزىتخانىسى(گۇرۇھى)نىڭ «ئۇچقاندەك ئىلگىرىلەش يولى − <بىر بەلباغ، بىر يول> لىنىيەسى بويىدىكى چوڭ تىپتىكى پۈتۈن تاراتقۇلۇق خەۋەر قىلىش» زىيارەت تارماق ئەترىتىنىڭ مۇخبىرى ئىستولبىغا يامىشىپ سىناپ باقتى، ئىككى مېتىر كېلىدىغان جايغا كەلگەندە، پۇتى توختىماي تىترەشكە باشلىدى، ئەمما ئادىل ھاشىم ئەڭ كۆپ بولغاندا بىر كۈندە 60 ئىستولبىغا يامىشىدۇ. «بۇ ھېچقانچە ئىش ئەمەس، دېڭىز يۈزىدىن ئېگىزلىكى 4700 مېتىردىن يۇقىرى جايلاردا چارلاپ تەكشۈرگەندە ئىستولبىغا ياماشقاندا نەپەس ئالغىلىمۇ بولمايدۇ، باشمۇ ئاغرىيدۇ» دېدى ئادىل ھاشىم.
ئادىل ھاشىم بىر ھەپتىدە ئىككى قېتىم ئاپتوموبىللىق چارلاشقا چىقىدۇ، بىر قېتىمدا سەككىز كىلومېتىردىن ئارتۇق پىيادە چارلايدۇ، ھەر يىلى جەمئىي 1125 كىلومېتىردىن ئارتۇق پىيادە چارلايدۇ. ھەر قېتىملىق لىنىيە چارلاشنىڭ ھەممىسى بىر قېتىملىق جاسارەت ۋە جىسمانىي كۈچ سىنىقى بولۇپ، تاغ ـ داۋانلاردىن ئېشىپ، دەريادىن ئاسما ئارقان بىلەن سىيرىلىپ ئۆتۈش دائىملىق ھالەت ھېسابلىنىدۇ، ئۇ قاتتىق سوغۇققا، دېڭىز يۈزىدىن ئېگىز جايغا، ئوكسىگېن كەمچىل بولۇشقا ئاللىبۇرۇن ئادەتلىنىپ كەتكەنىدى.
توققۇز يىلغا يېقىن چارلاش، قوغداش جەريانىدا، ئادىل ھاشىم پىيادە چارلىغان لىنىيە مۇساپىسى 10 مىڭ 125 كىلومېتىرغا، ئاپتوموبىلدا چارلىغان مۇساپە 310 مىڭ كىلومېتىرغا يەتتى، بۇ، يەرشارىنى سەككىز قېتىمغا يېقىن ئايلانغانغا باراۋەر.
لىنىيەنىڭ ئالدىنقى 60 كىلومېتىرى كىشىلەر ئولتۇراقلاشقان رايون بولۇپ، كىشىلەر پائالىيىتىنىڭ نۇر كابېلنى بۇزغۇنچىلىققا ئۇچرىتىشىنىڭ ئالدىنى ئېلىشقا توغرا كېلىدۇ؛ كېيىنكى 96 كىلومېتىرى ئادەمسىز رايون بولۇپ، تەبىئىي مۇھىتى مۇرەككەپ، قۇم ـ بوران، تاش چۈشۈپ كېتىش نۇر كابېلدا كاشىلا پەيدا قىلىدۇ. «كاشىلا كۆرۈلگەن ھامان، مەيلى كېچە ياكى كۈندۈز بولۇشىدىن، ھاۋارايىنىڭ قانداقلىقىدىن قەتئىينەزەر، نەق مەيدانغا دەرھال يېتىپ بېرىپ رېمونت قىلىشىم كېرەك» دېدى ئادىل ھاشىم.
ئۇ يىل بويى يول يۈرۈپ لىنىيەنى چارلاپ، لىنىيەنىڭ راۋانلىقىغا كاپالەتلىك قىلدى. چۆل ـ باياۋانلارنى كېسىپ ئۆتۈپ، ئېگىز تاغلاردىن ھالقىپ، دەريا ـ ئېقىنلارنى كېچىپ، بىپايان دەشت ـ چۆللەردە ئۆزى يالغۇز يول يۈرۈپ، ئادەتتىكى كىشىلەر چىدىيالمايدىغان زېرىكىشكە بەرداشلىق بەردى، ئادىل ھاشىم نەچچە يىلنى بىر كۈندەك ئۆتكۈزۈپ، قەتئىيلىك بىلەن ئۆزىنى بېغىشلىغانلىقىنىڭ ئەرزىيدىغانلىقىنى ھېس قىلدى، ئۇ مۇنداق دېدى: «خىزمىتىم گەرچە ئاددىي بولسىمۇ، لېكىن ئەھمىيىتى مۇھىم، زور، بىزنىڭ قوغدايدىغىنىمىز پەقەت خەۋەرلىشىش لىنىيەسى بولۇپلا قالماي، تېخىمۇ مۇھىمى ئادەملەر ئارىسىدىكى، دۆلەتلەر ئارىسىدىكى دوستلۇق رىشتى».