6-ئاينىڭ 14-كۈنى، ئاقتۇ ناھىيەسى ئويتاغ بازىرىنىڭ ئويتاغ مۇزلۇق باغچىسىدا ھەيۋەتلىك قار كۆچۈش مەنزىرىسى شەكىللەندى.
ئانار بۇلۇت\شىنجاڭ گېزىتى ئۇنىۋېرسال خەۋىرى ئويتاغ مۇزلۇق باغچىسىنىڭ ئىگىلىگەن يەر كۆلىمى 50 نەچچە كىۋادىرات كىلومېتىر بولۇپ، بۇ يەردە تەخمىنەن 40 كىۋادىرات كىلومېتىرلىق ئىپتىدائىي ئورمان ۋە ئېگىز تاغ چىملىقى بار، قويۇق ئورمانلىقنىڭ ئىچكىرىسى يىلپىز، كۈمۈش رەڭ تۈلكىلەرنىڭ پاناھلىنىدىغان جايى. بۇ جاينىڭ ئەڭ ياخشى ساياھەت ۋاقتى 7-ۋە 8-ئاي بولۇپ، ئاقتۇ ناھىيە بازىرىنىڭ تېمپىراتۇرىسى 30 سېلسىيە گىرادۇستىن ئاشقان ۋاقىتتا، بۇ يەرنىڭ تېمپىراتۇرىسى 10 سېلسىيە گىرادۇستىن 20 سېلسىيە گىرادۇسقىچە بولىدۇ.
2021-يىلى 7-ئاينىڭ 19-كۈنى، ساياھەتچىلەر ئاقتۇ ناھىيەسىگە جايلاشقان ئويتاغ مۇزلۇق باغچىسى مەنزىرە رايونىدا ساياھەت قىلماقتا.جەي رۇزېڭ فوتوسى
ئويتاغ مۇزلۇق باغچىسىنىڭ ئۈچ تەرىپىنى تاغ ئوراپ تۇرىدىغان بولۇپ، ساياھەتچىلەر بۇ يەردە يىل بويى قار بىلەن قاپلىنىپ تۇرىدىغان ئايلانىش قارلىق تېغىنى كۆرۈپلا قالماي، يەنە ئاز ئۇچرايدىغان تۆۋەن كەڭلىكتىكى ھازىرقى زامان مۇزلۇقى ــــ چىكىرئېغىز مۇزلۇقىنىمۇ تاماشا قىلالايدۇ. چىكىرئېغىز مۇزلۇقىنىڭ دېڭىز يۈزىدىن ئېگىزلىكى 2804 مېتىرلا كېلىدىغان بولۇپ، دۆلىتىمىز تەۋەسىدىكى دېڭىز يۈزىدىن ئېگىزلىكى ئەڭ تۆۋەن مۇزلۇق ھېسابلىنىدۇ، تەلەيلىك ساياھەتچىلەر بۇ يەردە قار كۆچۈش مەنزىرىسىنىمۇ كۆرەلەيدۇ.
بىراق ھەرگىز جىددىيلەشمەڭ، باغچىدىكى قار كۆچۈش پەقەتلا بىر تاماشا قىلىدىغان مەنزىرە. ھەر يىلى 7-، 8-ئايلاردا، مۇزلۇقتىكى قېلىنلىقى 100 مېتىردىن ئاشىدىغان يىغىندى قار كۈچلۈك قۇياش نۇرىدا ئېرىپ تاغ باغرىغا ئاستا-ئاستا سىيرىلىپ چۈشىدۇ، پۈتكۈل جەريان پەقەت بىر مىنۇت ئەتراپىدىلا داۋاملىشىدۇ، ساياھەتچىلەر تاغدىن سەككىز كىلومېتىر يىراقلىقتىكى مەنزىرە كۆرۈش سۇپىسىدا بۇ مەنزىرىنى تاماشا قىلىدۇ، ناھايىتى بىخەتەر.
ئىگىلىنىشىچە، ئويتاغ مۇزلۇق باغچىسى قەشقەر شەھىرىدىن تاشقورغان ناھىيەسىگە بارىدىغان يولدا بولۇپ، قەشقەر شەھىرىگە 120 كىلومېتىر كېلىدىكەن، دۆلەت يولى 314-لىنىيەسىنىڭ جۇڭگو-پاكىستان تاشيولى بويىدىكى كۆرسىتىش تاختىسى بويىچە ئويتاغ مۇزلۇق باغچىسى تەرەپكە قاراپ مېڭىپ يول تاختىسىنى كۆرگەندىن كېيىن ئوڭغا بۇرۇلۇپ كىرىپ، داۋاملىق ئالدىغا 30 كىلومېتىر ماڭغاندا يېتىپ بارغىلى بولىدىكەن.
سەمىمىي ئەسكەرتىش، باغچىنىڭ ئېچىلىش ۋاقتى سائەت 10:00 دىن 20:00 گىچە، ئىشىك بېلىتى + ئارىلىق ئاپتوموبىلى 53 يۈەن/ ئادەم. باغچىغا بېرىش ئۈچۈن چېگرا يول خېتى بېجىرىش كېرەك، كىملىكنى ئېلىپ نوپۇسى تۇرۇشلۇق جايدىكى جامائەت خەۋپسىزلىكى ئورگىنىدا بېجىرسە بولىدۇ. ساياھەتچىلەرنىڭ مەنزىرە رايونىدا پىيادە ماڭغاندا يېتەرلىك سۇ ۋە يېمەكلىك ئېلىۋېلىشىنى، شامال، ئاپتاپتىن، سوغۇقتىن ساقلىنىشقا دىققەت قىلىشىنى، ھاۋا ئوچۇق كۈنلەرنى تاللاپ، قارلىق تاغنىڭ پۈتۈن مەنزىرىسىنى تاماشا قىلىشىنى تەۋسىيە قىلىمىز.
ئۇنىۋېرسال مەنبە: ئاقتۇ ناھىيەلىك يۇغۇرما تاراتقۇ مەركىزى، شىنجاڭ ياخشى جاي، ئانار بۇلۇت تېرمىنالى
