ئانار بۇلۇت/شىنجاڭ گېزىتى خەۋىرى 2-ئاينىڭ 19-كۈنى، شىنخۇا تورى تېڭشۈن ئورۇن چوڭ سانلىق مەلۇماتىغا ئاساسەن، 2024-يىلى باھار بايرىمىدا دۆلەت ئىچىدىكى قەدىمىي شەھەر/قەدىمىي بازار قىزغىنلىقى Top10 تىزىملىكىنى رەتلەپ چىقتى، قەشقەر قەدىمىي شەھىرى بۇ تىزىملىككە كىردى. سانلىق مەلۇماتتا كۆرسىتىلىشىچە، باھار بايرىمى مەزگىلىدە قەشقەرنى توردا ئىزدەش قىزغىنلىقى ئالدىنقى ئايدىكىدىن %270 ئاشقان بولۇپ، قەشقەر قەدىمىي شەھەر مەنزىرە رايونى 351 مىڭ ئادەم قېتىم ساياھەتچىنى كۈتۈۋالغان.
بۇ يىل مەركىزىي رادىيو-تېلېۋىزىيە باش ئىستانسىسى باھار بايرىمىلىق بىرلەشمە كۆڭۈل ئېچىش كېچىلىكىنىڭ شۆبە مەيدانى تۇنجى قېتىم قەشقەردە تەسىس قىلىندى، باھار بايرىمىلىق بىرلەشمە كۆڭۈل ئېچىش كېچىلىكى ئاخىرلاشقاندىن كېيىن سەھنە ساقلاپ قېلىندى. 2-ئاينىڭ 10-كۈنىدىن باشلاپ، مەركىزىي رادىيو-تېلېۋىزىيە باش ئىستانسىسى باھار بايرىمىلىق بىرلەشمە كۆڭۈل ئېچىش كېچىلىكىنىڭ شۆبە مەيدانى ساياھەتچىلەرگە رەسمىي ئېچىۋېتىلىپ، ساياھەتچىلەر بەس-بەستە كېلىپ داكا قىلىدىغان قىزىق ئورۇنغا ئايلاندى، نۇرغۇن ساياھەتچى دىلرابانىڭ «باھار بايرىمىلىق بىرلەشمە كۆڭۈل ئېچىش كېچىلىكىدىكىگە ئوخشاش پاسون»نىڭ داڭقىنى ئاڭلاپ ئىزدەپ كەلدى، كۈندىلىك ساياھەتچى ئېقىمى 150 مىڭ ئادەم قېتىمغا يەتتى، ساياھەت سۈرىتىگە تارتىش دۇكانلىرى باھار بايرىمى مەزگىلىدە كۈنىگە ئوتتۇرا ھېساب بىلەن 40 گۇرۇپپا سۈرەتكە تارتتى.
قەشقەر قەدىمىي شەھىرى چىڭخېيىڭ سۈرەتچىلىك ئىشخانىسى سۈرەتكە تارتقان ساياھەتچىلەر.چېن ۋېي تەمىنلىگەن سۈرەت
قەشقەرگە كەلمىسە شىنجاڭغا كەلگەن ھېسابلانمايدۇ، قەشقەرنى ساياھەت قىلىش قىزغىنلىقى داۋاملىق ئېشىپ، نۇرغۇن ساياھەتچى قەشقەرگە كېلىپ قەدىمىي شەھەرنى ئايلىنىپ، باھار بايرىمى كەيپىياتىنى ھېس قىلدى. قەشقەر ۋىلايىتىدىكى A دەرىجىلىك 57 مەنزىرە رايونىمۇ 2-ئاينىڭ 9-كۈنىدىن 24-كۈنىگىچە (باھار بايرىمىنىڭ ھارپا كۈنىدىن دېھقانلار كالىندارى بويىچە 1-ئاينىڭ 15-كۈنىگىچە) تۇنجى ئىشىكتىن كىرىش بېلىتىنى كەچۈرۈم قىلىپ، ساياھەتچىلەرنى قەشقەرگە كېلىپ قىشتىكى قۇملۇق، توغراقلارنى تاماشا قىلىشقا سەمىمىي تەكلىپ قىلدى. شۇنىڭ بىلەن بىللە، ھەر قايسى ناھىيە، شەھەرلەر يەنە «باھار بايرىمىنى تەبرىكلەش، يېڭى كەيپىياتنى نامايان قىلىش» قاتارلىق يۈرۈشلۈك تەبرىكلەش پائالىيەتلىرىنى ئۆتكۈزدى، پەيزاۋات ناھىيەسى، قاغىلىق ناھىيەسى، مەكىت ناھىيەسى، يوپۇغا ناھىيەسى قاتارلىق ناھىيە، شەھەرلەر ئاۋات كوچا ئويۇنى پائالىيەتلىرىنى ئۆتكۈزدى، يەنە دولان مۇقامى ئويۇنى، غەيرىي ماددىي مەدەنىيەت مىراسلىرى كۆرىكى، دېھقانلار رەسىمى ئىجادىيىتىنى ھېس قىلىش، خەلق ئۆرپ-ئادىتى ماھارەت پائالىيىتى، ناخشا-ئۇسسۇل ئويۇنى قاتارلىقلار بار.
ئىستاتىستىكا قىلىنىشىچە، باھار بايرىمى مەزگىلىدە قەشقەر ۋىلايىتى جەمئىي 1 مىليون 904 مىڭ 900 ئادەم قېتىم ساياھەتچىنى كۈتۈۋېلىپ، 1 مىليارد 566 مىليون يۈەن ساياھەت كىرىمى ياراتقان.
