□ئانار بۇلۇت\شىنجاڭ گېزىتى مۇخبىرى يىن لۇ
12-ئاينىڭ 22-كۈنى، 17-نۆۋەتلىك شىنجاڭ قىشلىق ساياھەت كەسپى سودا كۆرگەزمىسى ھەم 2023-يىللىق شىنجاڭ ئىللىق قار بايرىمى ئۈرۈمچىدە باشلاندى، پائالىيەت مەزگىلىدە قار - مۇز ساياھىتى كەسپى تەرەققىيات مۇنبىرى، قىشلىق ساياھەت بايلىقىنى تونۇشتۇرۇش يىغىنى، مەملىكەتلىك ئۆلكە دەرىجىلىك دۆلەت ساياھەت گۇرۇھى ئىتتىپاقىنىڭ يىللىق يىغىنى، قىشلىق مەدەنىيەت - ساياھەت كەسپى بويىچە سودىگەر چاقىرىپ مەبلەغ جەلپ قىلىش - ئۇدۇللاشتۇرۇش يىغىنى قاتارلىقلار ئۆتكۈزۈلىدۇ. يىغىنغا قاتناشقان دۆلەت ئىچى - سىرتىدىكى كەسىپ، ساھە مۇتەخەسسىسلىرى ۋە كۆرگەزمىگە قاتناشقان سودىگەرلەر ۋەكىللىرى پائال چارە - تەدبىر كۆرسىتىپ، چوڭقۇر پىكىر ئالماشتۇرۇپ، قار - مۇز ساياھىتى ۋە قار - مۇز كەسپىنىڭ گۈللىنىشى، تەرەققىياتى ئۈچۈن ھەمكارلىقنى قانات يايدۇرىدۇ.
قار - مۇز ساھەسىدىكى «داڭلىق شەخس»لەر مۇنداق قارىدى: شىنجاڭ قار - مۇز ساياھىتىنىڭ تەبىئىي بايلىقى مول، قار - مۇز كەسپىنىڭ تەرەققىيات بوشلۇقى زور، شۇڭا رىقابەت كۈچى، جەلپ قىلىش كۈچى، تەسىر كۈچىنى سىجىل كۈچەيتىپ، پۈتۈن دۇنيادىكى قار - مۇز تەنھەرىكىتى ھەۋەسكارلىرىنى قار ئۈچۈن كېلىپ، شىنجاڭنىڭ قار - مۇز ساياھىتى مەستانىلىرى توپىغا ئايلىنىش ئىمكانىيىتىگە ئىگە قىلىش بىلەن بىللە، مۇھىم قار - مۇز تەنھەرىكىتى مۇسابىقىلىرىنىڭ ئۆتكۈزۈلۈشىنى كۈتۈۋېلىشقا توغرا كېلىدۇ.
چەت ئەللىك سودىگەرلەر قار - مۇز ساياھەت ھەمكارلىقىغا ئۈمىد باغلىدى
«قىشلىق ساياھەت كەسپى سودا كۆرگەزمىسىگە قاتنىشىپ، جۇڭگو شىنجاڭنىڭ قىشلىق قار - مۇز ساياھىتىنىڭ ئادەتتىن تاشقىرى جەلپ قىلىش كۈچىنى كۆردۈم، تەبىئىي مەنزىرىسىنىڭ جەلپكارلىقى كۈچلۈك ئىكەن، قار تېيىلىش مەيدانىنىڭ ئەسلىھەلىرى 1-قاتاردا تۇرىدىكەن، ئەتراپتا ئۆتكۈزۈلىدىغان خەلق ئۆرپ - ئادىتى كۆڭۈل ئېچىش پائالىيەتلىرى مول ئىكەن. بۇ يەردىكى قار - مۇز تۈرلىرى ئۆزبېكىستانلىق ساياھەتچىلەرنى ئىنتايىن جەلپ قىلدى، ئېچىشقا بولىدىغان غايەت زور بازار بار ئىكەن.» ئۆزبېكىستان دۆلەتلىك ساياھەت مەبلەغ سېلىش جەمئىيىتىنىڭ رەئىسى ئابدۇرەسۇل ئابدۇخەلىلوفنىڭ دېيىشىچە، كېيىنكى قەدەمدە ئۇ شىنجاڭنىڭ قار - مۇز ساياھەت بايلىقى كۆرۈنەرلىك بولغان بىرقانچە جايغا بېرىپ تەكشۈرۈشتە بولىدىكەن.
ئۇ مۇنداق دېدى: «بىر بەلباغ، بىر يول»نى ئورتاق بەرپا قىلىش تەشەببۇسى ئوتتۇرىغا قويۇلغان ئون يىلدىن بۇيان، جۇڭگو بىلەن ئۆزبېكىستان ناھايىتى يېقىن ئۆتىدىغان، ھەمكارلىشىپ ئورتاق نەپ ئالىدىغان ھەمراھلاردىن بولۇپ قالدى. بۇ قېتىمقى قىشلىق ساياھەت كەسپى سودا كۆرگەزمىسىگە قاتنىشىش ئارقىلىق شىنجاڭنىڭ تەبىئەت ۋە ئادىمىيەت جەھەتتىكى بايلىقنى ئېچىش ۋە ئۇنىڭدىن پايدىلىنىشتىكى قالتىس يۈرۈشتۈرۈش شەكلىنى چۈشەندىم، بۇ ئۆرنەك قىلىشقا ۋە ئورتاق بەھرىلىنىشكە ئەرزىيدۇ.
«جۇڭگو شىنجاڭ بىلەن قازاقىستاننىڭ ھەر ئىككىلىسى ئەلا سۈپەتلىك قار - مۇز بايلىقىغا ئىگە، قىشلىق ساياھەتنى ھەمكارلىشىپ تەرەققىي قىلدۇرۇش يوشۇرۇن كۈچى ناھايىتى زور.» قازاقىستان ئالمۇتاShymbulak خەلقئارا ئېگىز تاغ قار تېيىلىش مەيدانىنىڭ ۋەكىلى مۇستافا جېمىس مۇنداق دېدى: دۇنيا بويىچە 1-قاتاردا تۇرىدىغان ئېگىز تاغ قار تېيىلىش مەيدانى قۇرۇش، تېخىمۇ قولايلىق قاتناش شەكلىنى لايىھەلەش، سەپلىمىلىرى تېخىمۇ بىخەتەر، ئازادە بولغان قىشلىق ساياھەت ئۇنىۋېرسال ئىستىراھەت رايونى قۇرۇش قاتارلىق جەھەتلەردە، ئىككى تەرەپ تېخىمۇ ئاكتىپ، چوڭقۇر بولغان ھەمكارلىقنى سىناپ باقسا بولىدۇ.
بۇ قېتىمقى جۇڭگو شىنجاڭ سەپىرى مۇستافانى شىنجاڭدىكى نۇرغۇن قار - مۇز ساياھەت مەنزىللىرى ۋە ئۆزلىرىنىڭ بايلىق ئەۋزەللىكى، ئالاھىدىلىكىنى ئېنىق چۈشىنىش ئىمكانىيىتىگە ئىگە قىلدى، ئۇ مۇنداق قارىدى: «قار - مۇز+» بۇ قار چەمبىرىكىنى ئۈزلۈكسىز چوڭايتقىلى بولىدۇ، بۇنىڭغا چېگرا ساياھىتى، مال سېتىۋېلىش ساياھىتى، خەلق ئۆرپ - ئادىتى مەنزىرە ساياھىتىنى كىرگۈزگەندە، ئىككى دۆلەت ساياھەتچىلىرىنى تېخىمۇ كۈچلۈك جەلپ قىلغىلى بولىدۇ.
شىنجاڭنىڭ قار - مۇز ساياھىتى مەستانىلىرى توپى كېڭەيدى
ئالتاي ۋىلايىتى كۆرگەزمە رايونىدا قار تېيىلىش جابدۇقلىرى ئېكسكۇرسىيە قىلغۇچىلارنىڭ دىققىتىنى تارتتى، كۆرگەزمىگە قاتناشقان سودىگەرلەر كۆپچىلىككە قار تېيىلىش كىيىمى، تىۋىت دوپپا، شارپا، خۇرۇم پەلەي قاتارلىق قار تېيىلىشتا زۆرۈر بولغان بۇيۇملارنىڭ ئالاھىدىلىكى ۋە ئىقتىدارىنى تەپسىلىي تونۇشتۇردى.
يېقىنقى يىللاردىن بۇيان، شىنجاڭدىكى ھەرقايسى چوڭ قار تېيىلىش مەيدانلىرىنىڭ مۇلازىمەت ئىقتىدارىنىڭ ئۆسۈشىگە ئەگىشىپ، دۆلەت ئىچى - سىرتىدىكى داڭلىق ياكى يۇقىرى دەرىجىلىك قار - مۇز جابدۇقلىرى داڭلىق ماركىلىرى ئارقا - ئارقىدىن كىرىپ ماكانلاشتى، جياڭجۈن تېغى خەلقئارا قار تېيىلىش ئىستىراھەت رايونى، يىپەك يولى تاغلىق ئىستىراھەت رايونى، نارات خەلقئارا قار تېيىلىش ئىستىراھەت رايونى قاتارلىق جايلاردا قار تېيىلىش ھەۋەسكارلىرىنىڭ قار تېيىلىش بۇيۇملىرىنى تاللاپ سېتىۋېلىشىدا ناھايىتى كۆپ ئىمكانىيەت بار.
«جۇڭگودىكى قار تېيىلىش ئىستېمالى ئوبيېكتلىرىنىڭ ئەھۋالىدىن شۇنى كۆرۈۋېلىشقا بولىدۇكى، قار - مۇز تەنھەرىكىتىگە قاتنىشىدىغان ئاساسلىق كىشىلەر توپى 26 ياشتىن 42 ياشقىچە ئىكەن، ئەلا سۈپەتلىك قار - مۇز بايلىقىنى ئېچىپ پايدىلانغاندىن سىرت، شىنجاڭنىڭ بۇ ياش باسقۇچىدىكى كىشىلەر توپىنىڭ ئىستېمال ئېھتىياجى، ئىقتىدارى، قىممەت قارىشىنى تېخىمۇ تەتقىق قىلىشى، تەھلىل قىلىشىغا توغرا كېلىدۇ.» GOSKI╲لېڭشەن بىرلەشمىسىنىڭ قۇرغۇچىسى جوۋ خاڭ مۇنداق دېدى: يېقىنقى تۆت يىلدىن بۇيان، جۇڭگو قار تېيىلىش جابدۇقلىرىنىڭ تور ۋە تور سىرتىدىكى سودا مىقدارى سىجىل ئاشتى، تاۋباۋ ۋە تيەنماۋ سۇپىسىنىڭ بۇ يىلقى قار تېيىلىش جابدۇقلىرى سودا مىقدارىنى مىسالغا ئالساق، بۇلتۇرقىدىن ％40 يۇقىرى بولدى.
بېيجىڭ قىشلىق ئولىمپىك تەنھەرىكەت مۇسابىقىسى ئىمكانىيەتلىك سىجىل تەرەققىيات كومىتېتىنىڭ مۇئاۋىن مۇدىرى جاۋ يىڭگاڭمۇ «ياش - ئۆسمۈرلەر قار - مۇز تەنھەرىكىتى ھەۋەسكارلىرىنى چىڭ تۇتۇپ، شىنجاڭنىڭ قار - مۇز ساياھىتى ئۈچۈن ئەڭ مۇھىم مەستانىلەرنى يېتىشتۈرۈش» تەكلىپىنى ئوتتۇرىغا قويدى. «شىنجاڭدا كەسپىي ئېگىز تاغ قار تېيىلىش مەيدانىدىن باشقا، شەھەردىمۇ ئېچىشقا بولىدىغان مول قار - مۇز بايلىقى بار، قار تېيىلىش باغچىسى، قار تېيىلىش شادلىق باغچىسى قاتارلىقلارنى قۇرغىلى بولىدۇ. كەسپىي تەربىيەلەش كۈچلىرىنىڭ قوللىشى بىلەن، قار - مۇز لاگېرىدا تەربىيەلەش خىزمىتىنى ياخشى ئىشلەپ، شەھەرلەردىن تارتىپ تاغ ئارىسىغىچە بولغان ھەممىلا يەردە بەھۇزۇر قار - مۇز ئوينايدىغان جايلارنى كۆرگىلى بولىدىغان قىلىش كېرەك» دېدى جاۋ يىڭگاڭ.
قار - مۇز ئۈچۈن كەلگەن بولسىمۇ، لېكىن قار - مۇز بىلەنلا چەكلىنىپ قالمايدۇ
بۇ نۆۋەتلىك قىشلىق ساياھەت كەسپى سودا كۆرگەزمىسىدە، شىنجاڭنىڭ ھەرقايسى جايلىرىنىڭ كۆرگەزمە رايونلىرىدا خەلق ئىچى ئەدەبىيات - سەنئەت نومۇرلىرى، مەدەنىيەت ئىجادىيىتى مەھسۇلاتلىرى كۆرگەزمىسى، غەيرىي ماددىي مەدەنىيەت مىراسلىرى ماھارىتى كۆرىكى قاتارلىق شىنجاڭنىڭ قىشلىق ساياھەت ۋە ئادىمىيەت جەھەتتىكى بايلىقىنى گەۋدىلەندۈرىدىغان مەزمۇنلار تەسىس قىلىندى. دولان مۇقامى ئورۇنلىنىپ بولۇشى بىلەنلا، ئات باشلىق غېجەكنىڭ ئاۋازى يەنە ياڭرىدى، قاراجورغا، ساۋۇردىڭ قاتارلىق ئۇسسۇللارمۇ تاماشىبىنلارنىڭ ئالقىشىغا ئېرىشتى.
يېقىنقى يىللاردىن بۇيان، جىلىن بىلەن شىنجاڭ بىرلىشىپ چاڭبەيشەن ۋە ئالتاي تېغى جۇڭگو قار - مۇز كەسپى ئېگىزلىكىنى بەرپا قىلىپ، ئىككى جاينىڭ قار - مۇز كەسپىنىڭ تەرەققىياتىنى ئۈنۈملۈك ئالغا سىلجىتتى، بۇ قېتىم جىلىن ئۆلكىسى ئاساسلىق مېھمان ئۆلكە سۈپىتىدە قىشلىق ساياھەت كەسپى سودا كۆرگەزمىسىگە قاتناشتى.
«قىشلىق ساياھەت كەسپى سودا كۆرگەزمىسىدە، مەن شىنجاڭنىڭ قار - مۇز ساياھىتى بايلىقىنى ئېچىپ پايدىلىنىش، مۇۋاپىق تەقسىملەش جەھەتتىكى بىر قىسىم پائال ئىزدىنىشلىرىنى كۆردۈم، مەسىلەن، ساياھەتچىلەر قار - مۇز ئۈچۈن كەلگەن بولسىمۇ، لېكىن قار - مۇزنى كۆرۈش، قار - مۇزدا ئويناش بىلەنلا چەكلىنىپ قالمىدى، شىنجاڭنىڭ < قار - مۇز+>نىڭ تىپى مول، خاسلىقى گەۋدىلىك، ھېس قىلىش تۇيغۇسى يېتەرلىك، ئادىمىيەت جەھەتتىكى ھېسسىياتى تولۇق، بۇ، قار - مۇز ساياھىتىنىڭ يۇقىرى سۈپەتلىك تەرەققىياتىدىكى مۇھىم ياردەمچى كۈچ.» جىلىن ئۆلكىسى بەيشەن شەھىرى كۆرگەزمە رايونىنىڭ خىزمەتچىسى جاڭ شۇيۆ مۇنداق قارىدى: قار - مۇز كەسپىنىڭ تەرەققىياتىنى ئالغا سىلجىتىشتا، جىلىن بىلەن شىنجاڭنىڭ ئۆزئارا ئۆرنەك قىلىدىغان نۇرغۇن جايلىرى بار.
«شىنجاڭنىڭ قار - مۇز ساياھىتى كەسىپ ھالىتىنىڭ موللۇق دەرىجىسىدە يەنە ناھايىتى چوڭ كېڭەيتىش بوشلۇقى بار.» شەندۇڭ سېنلىنشۆ قار تېيىلىش ئۈسكۈنىلىرى چەكلىك شىركىتىنىڭ باش مۇدىرى ليۇ چاڭلى مۇنداق دېدى: «<قار - مۇز +> نىڭ تەرەققىياتى يېڭىلىق يارىتىش، ئىجاد قىلىش، لايىھەلەش، ئېچىشقا ئېھتىياجلىق، شۇنداقلا قاتتىق دېتال تېخنىكىسىنىڭ كۈچلۈك قوللىشىغا ئېھتىياجلىق. بىز شىنجاڭنىڭ ھەرقايسى جايلىرىدىكى قار تېيىلىش مەيدانلىرى، شەھەرلەردىكى قار - مۇز تەنھەرىكىتى سورۇنلىرى بىلەن بولغان ھەمكارلىقنى سىجىل كۈچەيتىپ، مەملىكەتنىڭ ھەرقايسى جايلىرى، ھەتتا دۇنيانىڭ ھەرقايسى جايلىرىدىن كەلگەن ساياھەتچىلەرگە شىنجاڭنى قىشتا ساياھەت قىلىش خۇشاللىقىنى ھېس قىلدۇرىمىز».
